ខេត្តស្វាយរៀង ៖ នៅព្រឹកថ្ងៃពុធ ទី៤ ខែវិច្ឆិកា ឆ្នាំ២០២៦ លោក ប៉េង ពោធិ៍សា អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីជួបសំណេះសំណាល និងជូនដំណើរប្រជាពលរដ្ឋ ដែលត្រូវចូលបំពេញកាតព្វកិច្ចយោធា ដើម្បីបន្តដំណើរទៅកាន់សាលាហ្វឹកហ្វឺនកងទ័ព ពិធីនេះត្រូវបានរៀបចំឡើងយ៉ាងអធិកអធម នៅបញ្ជាការដ្ឋានកងរាជអាវុធហត្ថខេត្តស្វាយរៀង ។
ក្នុងឱកាសនោះ ក៏មានការអញ្ជើញចូលរួមអមដំណើរពីសំណាក់ លោក-លោកស្រី អភិបាលរងខេត្ត លោកនាយករងរដ្ឋបាលសាលាខេត្តលោកឧត្តមសេនីយ៍ត្រី មេបញ្ជាការតំបន់ប្រតិបត្តិការសឹករងស្វាយរៀង ប្រធានមន្ទីរ-អង្គភាពនានាជុំវិញខេត្ត អភិបាលក្រុង-ស្រុកទាំង៨ និងនាយកទីចាត់ការហិរញ្ញវត្ថុសាលាខេត្ត លោក-លោកស្រី មេបញ្ជាការរង និងនាយសេនាធិការរងកងរាជអាវុធហត្ថខេត្ត ប្រធាន-អនុប្រធានមន្ទីរ នាយ-នាយរងការិយាល័យចំណុះមន្ទីរ នាយការិយាល័យហិរញ្ញវត្ថុ នាយលេខាធិការដ្ឋាន នាយការិយាល័យអធិការកិច្ច ប្រធានអង្គភាពជំនាញ ព្រមទាំងលោកមេបញ្ជាការ មេបញ្ជាការរង នាយសេនាធិការ និងជំនួយការ នៃមូលដ្ឋានកងរាជអាវុធហត្ថក្រុង-ស្រុកទាំង៨យ៉ាងច្រើនកុះករផងដែរ ។
ថ្លែងក្នុងពិធីសំណេះសំណាលនោះ លោក ប៉េង ពោធិ៍សា បានសម្តែងនូវការកោតសរសើរ និងវាយតម្លៃខ្ពស់ចំពោះទឹកចិត្តស្នេហាជាតិមាតុភូមិ និងការលះបង់ដ៏ធំធេងរបស់បងប្អូនប្រជាពលរដ្ឋ និងយុវជនទាំងអស់ ដែលបានស្ម័គ្រចិត្តចូលបម្រើក្នុងជួរកងទ័ព ដើម្បីបំពេញកាតព្វកិច្ចការពារជាតិ ។
លោកអភិបាលខេត្ត ក៏បានថ្លែងអំណរគុណយ៉ាងជ្រាលជ្រៅចំពោះមាតាបិតា និងអាណាព្យាបាលទាំងអស់ ដែលបានលើកទឹកចិត្ត និងអនុញ្ញាតឱ្យកូនចៅរបស់ខ្លួនចូលរួមក្នុងបុព្វហេតុការពារបូរណភាពទឹកដី និងសុខសន្តិភាពជូនប្រទេសជាតិ ។
ជាមួយគ្នានេះ លោកអភិបាលខេត្ត បានផ្តាំផ្ញើដល់ នៅពេលទៅដល់សាលាហ្វឹកហ្វឺន ត្រូវខិតខំយកចិត្តទុកដាក់រៀនសូត្រ ក្រេបជញ្ជក់យកចំណេះដឹង និងយុទ្ធវិធីនានាពីគ្រូបង្វឹក គោរពវិន័យកងទ័ពឱ្យបានម៉ឺងម៉ាត់ ចេះសាមគ្គីភាពគ្នាជាធ្លុងមួយ និងត្រូវថែរក្សាសុខភាពឱ្យបានល្អប្រសើរ ដើម្បីក្លាយជាកម្លាំងស្នូលដ៏រឹងមាំក្នុងការបម្រើជាតិមាតុភូមិ ។
មុននឹងបញ្ចប់ លោក ប៉េង ពោធិ៍សា និងគណៈអធិបតី ក៏បានជូនពរដល់ក្មួយៗ និងបងប្អូនប្រជាពលរដ្ឋ ដែលត្រូវចេញដំណើរទៅហ្វឹកហ្វឺននាពេលនេះ សូមទទួលបាននូវសុខសុវត្ថិភាពតាមផ្លូវ និងទទួលបានជោគជ័យគ្រប់ភារកិច្ច ៕










ចែករំលែកព័តមាននេះ