ADផ្ទាំងផ្សព្វផ្សាយពាណិជ្ជកម្ម

Picture

កងរាជអាវុធហត្ថ ជួប​សំណេះសំណាល​ និង​ជូន​ដំណើរបេក្ខជន២៩២​នាក់ ​ទៅ​ហ្វឹកហ្វឺន​បំពេញ​កាតព្វកិច្ច​យោធា

2 អាទិត្យ មុន

រាជធានី​ភ្នំពេញ ៖ បេក្ខជន​ចំនួន​ ២៩២​នាក់ ដែល​បាន​ជាប់ឈ្មោះ​ក្នុង​ការ​បំពេញ​កាតព្វកិច្ច​យោធា ​សម្រាប់​ឆ្នាំ​២០២៦ ក្រប​ខណ្ឌ​រាជធានី​ភ្នំពេញ ត្រូវ​បាន​កងរាជអាវុធហត្ថ រាជធានី​ភ្នំពេញ​រៀបចំជូន​ដំណើរ​ទៅត្រួត​ពិ​ត្យ​សុខភាព កាយសម្បទា រួច​បន្ត ដំណើរ ទៅ​កាន់​សាលា​ហ្វឹកហ្វឺន ​នៃ​កង​យុទ្ធ​ពល​ខេមរភូមិន្ទ ​។

ការ​រៀបចំ ​និង​ជូន​ដំណើរ​យុវជន​ស្ម័គ្រចិត្ត​បំពេញ​កាតព្វកិច្ច​ជា​ជំហាន​ដំបូង​នេះ ​បាន​ធ្វើ​ឡើង​នៅ​ព្រឹក​ថ្ងៃ​ទី​០៤​ ខែវិច្ឆិកា ឆ្នាំ​២០២៦ នៅ​ទីបញ្ជាការដ្ឋាន​កងរាជអាវុធហត្ថ​រាជធានី​ភ្នំពេញ ក្រោម​វត្តមាន​លោក សុខ ពេញ​វុ​ធ អភិបាលរង​រាជធានី​ភ្នំពេញ និង​លោក​ឧត្តមសេនីយ៍ឯក រ័​ត្ន ស្រ៊ា​ង មេបញ្ជាការ​រង​កងរាជអាវុធហត្ថ​លើ​ផ្ទៃ​ប្រទេស និង​ជា​មេបញ្ជាការ​កងរាជអាវុធហត្ថ​រាជធានី​ភ្នំពេញ ​ព្រមទាំង​មានការ
ចូលរួម​លើកទឹកចិត្ត​ពី​អាណាព្យាបាល ឪពុក​ម្តាយ​ និង​បងប្អូន​ផង​ដែរ ​។

លោកឧត្តមសេនីយ៍ឯក រ័​ត្ន ស្រ៊ា​ង មេបញ្ជាការ​រង​កងរាជអាវុធហត្ថ​លើ​ផ្ទៃ​ប្រទេស និង​ជា​មេបញ្ជាការ​កងរាជអាវុធហត្ថ​រាជធានី​ភ្នំពេញ ​ក៏ បាន​មាន​មតិ​លើកទឹកចិត្ត និង​គាំទ្រ​ចំពោះ​ការ​ស្ម័គ្រចិត្ត​របស់​ក្មួយ​ៗ ក៏​ដូច​ជាការ​ជម្រុញ​គាំទ្រ​ពី​ឪពុក​ម្តាយ អាណាព្យាបាល ដែល​អនុញ្ញាត​ឲ្យ​កូនក្មួយ​សាច់ញាតិ​របស់​ខ្លួន​ចូល​បំពេញ​កាតព្វកិច្ច ដែល​វា​ជា​ផ្នែក និង​ជា​ថ្នាល​ដ៏​សំខាន់​មួយ​ក្នុង​បុព្វហេតុ​បន្តវេន​បម្រើ​ការពារ​ប្រទេស​ជាតិ ប្រកបដោយ​ស្មារតី និង​សុ​ឆន្ទៈ​ខ្ពស់ ពិសេស គឺ​មនសិការ​រួបរួម​គ្នា​ជា​ថ្លុ​ង​តែ​មួយ ក្នុង​ការ​ទប់ទល់​នឹង​ខ្មាំងសត្រូវ​ប៉ង​ឈ្លានពាន​ទឹក​ដ៏​កម្ពុជា ។
ទន្ទឹម​នោះ យុវជនជាប់​ឈ្មោះ​កាតព្វកិច្ច ក៏​បាន​បង្ហាញ​គោល​ជំហរ​រឹង​មាំ និង​មុះ​មុត​ចំពោះ​ជាតិ​មាតុភូមិ ទោះ​ត្រូវ​លះបង់​ដោយ​តម្លៃ​ណា​ក៏​ដោយ ក្នុង​ពេល​ជាប់​កាតព្វកិច្ច​០២​ឆ្នាំ​នេះ អ្វី​ដែល​ពួក​គេ​អាច​ធ្វើ​បាន គឺ​ការ​ប្រឹងប្រែង​ហ្វឹកហាត់ ដើម្បី​អភិវឌ្ឍន៍​សមត្ថភាព​របស់​ខ្លួន ឲ្យ​ក្លាយជា​អ្នក​ការពារ​បន្តវេន​ដ៏​រឹង​មាំ និង​មាន​សក្តានុពល​សម្រាប់​ជាតិ ។

ក្រុម​យុវជន​ស្ម​ក្រ​ចិត្ត​បំពេញ​កាតព្វកិច្ច ​បាន​បង្ហាញ​ថា គ្មាន​បរទេស​ណា​មក​ជួយ​យើង ក្រៅពី​យើង​ខ្លាំង​ខ្លួនឯង​នោះ​ទេ ប្រទេស​កម្ពុជា
មិន​បំពាន​ប្រទេស​ណា​ឡើយ គឺ​ដើម្បី​ការពារ និង​រក្សា​សន្តិភាព​ និង​បូ​រណ​នភា​ព​ទឹកដី​របស់​ខ្លួន​តែ​ប៉ុណ្ណោះ ​។

នៅ​ក្នុង​ពិធី​ដូន​ដំណើរ​ដែល ឪពុក​ម្តាយ អាណាព្យាបាល បេក្ខជន​ជាប់​ឈ្មោះ បង្ហាញ​ការ​គាំទ្រ និង​អរគុណ​រាជរដ្ឋាភិបាល ដែល​បាន​បើកឱកាស​សម្រាប់​កូន​ៗ​របស់​ពួក​គាត់​បាន​រួមចំណែក​ជាមួយ​វិស័យ​ការពារ​ប្រទេស​ជាតិ ស្រប​ពេល​ដែល​ប្រទេស​ជាតិ កំពុង​ទទួល​រង​ការ​រំលោភ​បំពាន​មក​លើ​បូរណភាព​ទឹកដី និង​បានឈរជើង​កាន់កាប់​ទឹកដី​ដោយ​ខុសច្បាប់​អន្តរជាតិ ពី​សំណាក់​រដ្ឋ​បរទេស​ជិតខាង​នៅឡើយ ។

គួរ​បញ្ជាក់​ថា ក្នុង​ជំហាន​ដំបូង​នេះ គណៈកម្មាធិការ​ជាតិ​កាតព្វកិច្ច​យោធា បាន​សម្រេច​ជ្រើសរើស​យុវជន​ស្ម័គ្រចិត្ត​ចូល​បំពេញ​កាតព្វកិច្ច ចំនួន​៥​ពាន់​នាក់ នៅ​ទូ​ទាំង​ប្រទេស​សម្រាប់​ឆ្នាំ​២០២៦​នេះ ដើម្បី​ចូល​បំពេញ​កាតព្វកិច្ច​ជាមួយ​វិស័យ​ការពារ​ប្រទេស​ជាតិ និង​ដំណើរការ​បើក​វគ្គ​ហ្វឹកហ្វឺន​កាតព្វកិច្ច​យោធា​ដំបូង​នៅ​ថ្ងៃ​ទី​០៩ ខែវិច្ឆិកា ឆ្នាំ​២០២៦​ដែល​ជាថ្ងៃ បុណ្យ​ឯករាជ្យ​ជាតិ និង ថ្ងៃ​ខួប នៃ​ថ្ងៃ​បង្កើត​កង​យោធពលខេមរភូមិន្ទ ៕