ទីក្រុងវ៉ាស៊ីនតោន ៖ លោកប្រធានាធិបតី ដូណាល់ ត្រាំ (Donald Trump) បានអបអរសាទរគណបក្សប្រជាធិបតេយ្យ បន្ទាប់ពីលទ្ធផលនៃការបោះឆ្នោតសភាពាក់កណ្តាលអាណត្តិរបស់សហរដ្ឋអាមេរិក នៅយប់ថ្ងៃទី៣ ខែវិច្ឆិកា ឆ្នាំ២០២៦ (ម៉ោងនៅអាមេរិក) បានបង្ហាញថា គណបក្សសាធារណរដ្ឋរបស់លោក បាត់បង់ការគ្រប់គ្រងសំឡេងភាគច្រើនទាំងនៅរដ្ឋសភា (សភាតំណាងរាស្ត្រ) និងព្រឹទ្ធសភា។
លោក ត្រាំ បានផ្តល់បទសម្ភាសន៍តាមទូរស័ព្ទជាមួយប្រព័ន្ធផ្សព្វផ្សាយនៅក្នុងស្រុកទាំង Fox News និង CBS News ដោយអបអរសាទរចំពោះគណបក្សប្រជាធិបតេយ្យ និងទទួលស្គាល់ថា ពួកគេពិតជាបានធ្វើការងារយ៉ាងខ្លាំងក្លា និងប្រយុទ្ធតស៊ូអស់រយៈពេលយ៉ាងយូររហូតទទួលបានជ័យជម្នះនេះ។
ទន្ទឹមជាមួយគ្នានោះ លោកក៏បានបញ្ជាក់ពីការត្រៀមខ្លួនរួចជាស្រេចក្នុងការធ្វើការងាររួមគ្នាជាមួយគណបក្សប្រជាធិបតេយ្យ ដើម្បីផលប្រយោជន៍ជាតិ លើរបៀបវារៈមួយចំនួន ដូចជា បញ្ហាអន្តោប្រវេសន៍ជាដើម បើទោះបីជាគណបក្សមានការខ្វែងគំនិតនាខាងនយោបាយក៏ដោយ។
យ៉ាងណាមិញ លោក ត្រាំ មិនបានចាត់ទុកលទ្ធផលនេះថាជាការធ្លាក់ចុះប្រជាប្រិយភាព ឬការវាយប្រហារលើកេរ្តិ៍ឈ្មោះរបស់លោកនោះទេ។ លោកបានបញ្ជាក់នៅលើបណ្តាញសង្គម Truth Social បន្ទាប់ពីលទ្ធផលការបោះឆ្នោតពាក់កណ្តាលអាណត្តិឆ្នាំ ២០២៦ បង្ហាញថា គណបក្សប្រជាធិបតេយ្យបានទទួលជ័យជម្នះយ៉ាងធំធេងថា មូលហេតុដែលបេក្ខជនបក្សសាធារណរដ្ឋចាញ់ គឺដោយសារតែរូបលោកមិនមានឈ្មោះលើសន្លឹកឆ្នោត ហើយលោកជឿជាក់ថា ប្រសិនបើមានឈ្មោះលោកវិញ គណបក្សសាធារណរដ្ឋនឹងឈ្នះឆ្នោតភ្លូកទឹកភ្លូកដីជាមិនខាន។
នៅក្នុងការបង្ហោះមួយដោយឡែកផ្សេងទៀត លោកបានអះអាងថា លោកនឹងក្លាយជាអ្នកវិភាគនយោបាយ ទាំងល្អ និងអាក្រក់ ចំពោះមូលហេតុដែលបេក្ខជនទាំងនោះ ឈ្នះនិងចាញ់៕ ប្រភព ៖ The Hill និង AP
ចែករំលែកព័តមាននេះ