ទីក្រុងវ៉ាស៊ីនតោន៖ លោកដូណាល់ត្រាំមានប្រសាសន៍ថាលោក និងលោកណឺតាន់យ៉ាហ៊ូទើបតែព្រមព្រៀងគ្នាដើម្បីបិទបញ្ចប់ជំនួយ៤ពាន់លានដុល្លារត្រឹមដំណាច់ឆ្នាំនេះ។ លោកថ្លែងប្រាប់ទូរទស្សន៍ហ្វក់ (Fox) ថាអុីស្រាអែលលែងត្រូវការជំនួយតទៅទៀតហើយ និងថាក្រុមគណបក្សប្រជាធិបតេយ្យ និងក្រុមអ្នកនយោបាយឆ្វេងនិយមខ្លះប្រើប្រាស់ការឧបត្ថម្ភគាំទ្រផ្នែកហិរញ្ញវត្ថុរបស់អាមេរិកដើម្បីវាយប្រហារក្រុមសាធារណរដ្ឋ។ លោកថ្លែងបន្តទៀតថាឥឡូវនេះ លោកណឺតាន់យ៉ាហ៊ូ និងលោកបានព្រមព្រៀងគ្នាហើយថានៅឆ្នាំនេះយើងផ្ដល់ប្រាក់៤ពាន់លានដុល្លារឱ្យអុីស្រាអែល ហើយយើងព្រមព្រៀងគ្នាតាំងពីប៉ុន្មានខែមុនមកម៉្លេះយើងនឹងឈប់ផ្ដល់ជំនួយតទៅទៀតហើយ។
យើងឯកភាពគ្នាថាត្រឹមដំណាច់ឆ្នាំនេះ យើងលែងផ្ដល់ប្រាក់ឱ្យអុីស្រាអែលទៀតហើយ។ យើងនឹងជួយអុីស្រាអែលប្រសិនបើមានសំណូមពរ។ ក្រោយការថ្លែងដូច្នេះ ខុទ្ទកាល័យរបស់លោកណឺតាន់យ៉ាហ៊ូមិនទាន់ធ្វើអត្ថាធិប្បាយទៅលើរឿងនេះទេ។ ម៉្យាងទៀត គេក៏មិនទាន់ដឹងឱ្យប្រាកដថាតើមូលនិធិណាដែលលោកត្រាំចង់សំដៅនោះ។ សម្រាប់អនុស្សារណៈយោគយល់គ្នារវាងអុីស្រាអែល និងអាមេរិកដើម្បីផ្ដល់ជំនួយយោធា៣,៨ពាន់លានដុល្លារក្នុងមួយឆ្នាំៗនោះរហូតដល់ចុងឆ្នាំ២០២៨ទើបបិទបញ្ចប់។
ប្រទេសទាំង២ក៏បន្តជជែកគ្នាពាក់ព័ន្ធនឹងការផ្ដល់ជំនួយបន្ទាប់ពីនោះផងដែរ។ លោកត្រាំថ្លែងបន្តទៀតថាពួកគេចង់ទិញអ្វីក៏បានដែរតាមចិត្តចង់, ពួកអឺរ៉ុបក៏ដូចគ្នា, យើងផលិតអាវុធច្រើនជាងគេបំផុតនៅលើសាកលលោក។ នៅក្នុងលិខិតផ្ញើជូនសភាកាលពីខែមិថុនា លោកណឺតាន់យ៉ាហ៊ូសរសេររៀបរាប់ថាពេលវេលាបានមកដល់ហើយសម្រាប់អុីស្រាអែលដែលអាចចាកចេញពីក្រុមប្រទេសទទួលជំនួយពីអាមេរិក។ មតិរបស់ប្រជាជនអាមេរិកក្នុងការគាំទ្រអុីស្រាអែលថយចុះជាបន្តបន្ទាប់ចាប់តាំងពីសង្គ្រាមនៅហ្កាហ្សាផ្ទុះឡើងកាលពីឆ្នាំ២០២៣។ ជាពិសេស នៅក្នុងចំណោមអ្នកគាំទ្រគណបក្សប្រជាធិបតេយ្យ។
លទ្ធផលស្ទង់មិតកាលពីខែមិថុនាបង្ហាញថា៤៨%នៃពលរដ្ឋអាមេរិកដែលមានសិទ្ធិបោះឆ្នោត និង៦៦%នៃក្រុមអ្នកគាំទ្រគណបក្សប្រជាធិបតេយ្យជឿជាក់ថាអាមេរិកហាក់ដូចជាជួយជ្រោមជ្រែងអុីស្រាអែលជ្រុលពេកហើយ។ ទំហំនៃការគាំទ្រពីសំណាក់ពលរដ្ឋអាមេរិកាំងគាំទ្រគណបក្សប្រជាធិបតេយ្យចំពោះអុីស្រាអែលធ្លាក់ចុះជាបន្តបន្ទាប់។ បេក្ខជនអ្នកតំណាងរាស្ត្រដែលរិះគន់អុីស្រាអែលតែងតែឈ្នះអាសនៈ។ សូម្បីតែក្រុមអ្នកតំណាងរាស្ត្រនិយមកណ្ដាលក៏មានទំនោរទៅរកការផ្ដាច់ជំនួយគាំទ្រចំពោះអុីស្រាអែលផងដែរ។ ហេតុនេះហើយទើបបានជាលោកត្រាំថ្លែងថាក្រុមឆ្វេងនិយមប្រើប្រាស់ការផ្ដល់ជំនួយ៤ពាន់លានដុល្លារនោះដើម្បីវាយប្រហារក្រុមសាធារណរដ្ឋ។ បញ្ហានេះគ្មានអ្វីត្រូវលាក់បាំងទេ វាជាសញ្ញាមិនស្មើភាពគ្នា ហើយយើងមិនអនុញ្ញាតឱ្យបញ្ហានេះកើតឡើងទៀតឡើយ៕ ប្រភព៖ Reuters
ចែករំលែកព័តមាននេះ