ខេត្តមណ្ឌលគិរី ៖ យ៉ាងហោចណាស់ជនជាតិវៀតណាមម្នាក់ និងបក្ខពួក៥នាក់ទៀត ត្រូវកម្លាំងអធិការដ្ឋាននគរបាលស្រុកអូររាំង សហការជាមួយកម្លាំងជំនាញព្រហ្មទណ្ឌ និងអធិការដ្ឋាននគរបាលក្រុងសែនមនោរម្យ ឃាត់ខ្លួនក្នុងករណីលួចកាត់ខ្សែភ្លើង ។
ប្រតិបត្តិការនេះ បានធ្វើឡើងកាលពីវេលាម៉ោង១៥និង០០នាទីថ្ងៃទី១ ខែវិច្ឆិកា ឆ្នាំ២០២៦ នៅចំណុចផែស្ងួត (តំបន់Aអតីតអគារអនឡាញ) ស្ថិតក្នុងភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី ។
សេចក្ដីរាយការបានឱ្យដឹងថា វត្ថុតាងដែលសមត្ថកិច្ចដកហូតបាន រួមមានខ្សែភ្លើងចំនួន ៤ដុំ (ទម្ងន់សរុប ៩២គីឡូក្រាម)។ ម៉ូតូម៉ាក Honda Dream ស៊េរីឆ្នាំ២០២០ (ឡើងស៊េរីឆ្នាំ២០២២) ពណ៌ខ្មៅ គ្មានស្លាកលេខ ចំនួន ១គ្រឿង, មួកសុវត្ថិភាព ចំនួន ៣ និងកាបូបស្ពាយចំហៀងពណ៌ខ្មៅ ចំនួន ១ ។ ឧបករណ៍ធ្វើសកម្មភាព ៖ កន្ត្រៃកាត់ដែក (មុខកាត់ ៦សង់ទីម៉ែត្រ ប្រវែង ៤៥សង់ទីម៉ែត្រ) ចំនួន ១, កាំបិតចិតបន្លែដងឈើ (មុខកាត់ ២៦សង់ទីម៉ែត្រ ដងឈើ ២១សង់ទីម៉ែត្រ) ចំនួន ១, ខ្នោះដៃ ចំនួន ១, ម៉ាស៊ីនផ្លុំសក់ ចំនួន ១ និងខ្សែសាកទូរសព្ទមួយចំនួន ។ វត្ថុតាងពាក់ព័ន្ធផ្សេងទៀតមានទូរស័ព្ទដៃចំនួន ៦គ្រឿង និងទូរស័ព្ទខូចចំនួន ២គ្រឿង (រកឃើញក្នុងកាបូបស្ពាយ)។
បច្ចុប្បន្ន ជនសង្ស័យទាំង ៦នាក់ រួមជាមួយវត្ថុតាង ត្រូវបានការិយាល័យជំនាញព្រហ្មទណ្ឌ កសាងសំណុំរឿងបញ្ជូនទៅសាលាដំបូងខេត្តមណ្ឌលគិរី ដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ