បេសកកម្មជាងកន្លះខែ៖ បង្ក្រាបក្រុមជនសង្ស័យផ្ទុះ.អា.វុ.ធ និងបោ.កគ្រា.ប់.បែ.កនៅក្រុងប៉ោយប៉ែត ឃាត់ខ្លួនជាង១០នាក់
- បន្ទាយមានជ័យ
ខេត្តបន្ទាយមានជ័យ ៖ បេសកកម្មរបស់សមត្ថកិច្ច ដែលបានខិតខំប្រឹងប្រែងទាំងយប់ទាំងថ្ងៃ សហការបង្ក្រាបក្រុមក្មេងទំនើងដែលប្រើអំពើហិង្សា ឈានដល់ការផ្ទុះអាវុធ និងបោកគ្រាប់បែក នៅក្រុងប៉ោយប៉ែត ខេត្តបន្ទាយមានជ័យ កាលពីយប់ថ្ងៃទី១៦ ខែតុលា ឆ្នាំ២០២៦ គិតមកដល់ថ្ងៃទី០២ ខែវិច្ឆិកា ឆ្នាំ២០២៦នេះ មានរយៈពេលជាងកន្លះខែមកហើយ លទ្ធផលចាប់ខ្លួនជនសង្ស័យជាង១០នាក់ ក្នុងនោះ មានមេខ្លោងម្នាក់ឈ្មោះ ខ្នាន់ ជាអ្នកបោកគ្រាប់បែក និងនៅសេសសល់២នាក់ទៀតកំពុងគេចខ្លួន ។
តាមការបង្ហើបឲ្យដឹងពីមន្ត្រីនាយកដ្ឋាននគរបាលព្រហ្មពទណ្ឌនៃអគ្គស្នងការដ្ឋាននគរបាលជាតិបានឲ្យដឹងថា ចំពោះការងារស្រាវជ្រាវសហការបង្ក្រាបក្រុមក្មេងទំនើងដែលនៅសល់២នាក់ទៀត ត្រូវបានថ្នាក់លើអនុញ្ញាតឲ្យកម្លាំងជំនាញនាយកដ្ឋាននគរបាលព្រហ្មទណ្ឌសម្រាកសិន ដើម្បីបន្តស្រាវជ្រាវបទល្មើសឧក្រិដ្ឋផ្សេងទៀត និងទុកឲ្យកម្លាំងសមត្ថកិច្ចនៃស្នងការដ្ឋាននគរបាលខេត្តបន្ទាយមានជ័យ ជាម្ចាស់ករណីបន្តតាមប្រមាញ់ មិនឲ្យគេចផុតពីសំណាញ់ច្បាប់ ។
ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ កម្លាំងនាយកដ្ឋាននគរបាលព្រហ្មទណ្ឌ បង្ក្រាបករណីផ្ទុះអាវុធ និងបោកគ្រាប់បែក នៅក្រុងប៉ោយប៉ែតកាលពីថ្ងៃទី១៦ ខែតុលា ឆ្នាំ២០២៦ វេលាម៉ោង០០និង២២នាទីអធ្រាត្រ នៅចំណុចសង្កាត់ប៉ោយប៉ែត ខេត្តបន្ទាយមានជ័យ មានជនសង្ស័យចំនួន២ក្រុម បានធ្វើសកម្មភាពកាប់គ្នាទៅវិញទៅមក បន្ទាប់មកក៏មានឮសំឡេងផ្ទុះអាវុធចំនួន២គ្រាប់ និងផ្ទុះគ្រាប់បែកដៃ(Model: 82-2 ផលិតនៅប្រទេសចិន) ចំនួន១គ្រាប់ នៅសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ ភ្លាមៗនោះ សមត្ថកិច្ចបានឃាត់ខ្លួនជនសង្ស័យចំនួន៣នាក់ ។
ក្រោយពីទទួលបានព័ត៌មានខាងលើ ដោយអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ កម្លាំងជំនាញនៃនាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន វរសេនីយ៍ឯក ហែម បូណា និងវរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹកនាំសហការជាមួយកម្លាំងជំនាញ នៃស្នងការដ្ឋាននគរបាលខេត្តបន្ទាយមានជ័យ ខេត្តកំពង់ឆ្នាំង ខេត្តបាត់ដំបង ខេត្តព្រះវិហារ ខេត្តកំពង់ស្ពឺ អធិការដ្ឋាននគរបាលខណ្ឌបឹងកេងកង ខណ្ឌមានជ័យ និងខណ្ឌទួលគោក នៃស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវតាមនីតិវិធី និងជំនាញ រហូតកំណត់បានអត្តសញ្ញាណ និងទីតាំងលាក់ខ្លួនរបស់ក្រុមជនសង្ស័យខាងលើបន្ថែមទៀត ។
រហូតដល់ថ្ងៃទី២៣ ខែតុលា ឆ្នាំ២០២៦ កម្លាំងជំនាញបានបន្តដឹកនាំសហការ ដោយឃាត់ខ្លួនបានជនសង្ស័យជាបន្តបន្ទាប់ សរុបចំនួន៧នាក់ទៀត ។ ជាមួយគ្នានេះ ដកហូតវត្ថុតាង កាំភ្លើងខ្លី១ដើមម៉ាក Sig Sauer P365 នៅចំណុចក្នុងស្រះទឹកមួយកន្លែង ស្ថិតក្នុងភូមិព្រៃទទឹង ឃុំភ្នំតូច ស្រុកមង្គលបុរី ខេត្តបន្ទាយមានជ័យ ។
ជនសង្ស័យ និងវត្ថុតាង ត្រូវបាននាយកដ្ឋាននគរបាលព្រហ្មទណ្ឌ ប្រគល់ឱ្យស្នងការដ្ឋាននគរបាលខេត្តបន្ទាយមានជ័យ ដើម្បីកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យតាមនីតិវិធី ៕
ចែករំលែកព័តមាននេះ