កម្លាំងចម្រុះចុះត្រួតពិនិត្យ និងណែនាំក្លិបកម្សាន្តនឹកEX និងក្លិបកម្សាន្តស្តូឌីយូ ដើម្បីការពារថែរក្សាសន្តិសុខសណ្តាប់សុវត្ថិភាពសង្គម
- ភ្នំពេញ
រាជធានីភ្នំពេញ ៖ ក្លឹបកម្សាន្តចំនួន២ គឺក្លុបកម្សាន្តនឹកEX និងក្លឹបកម្សាន្ត ស្តូឌីយូដែលមានទីតាំងផ្លូវលេខ២៤២ កែងផ្លូវលេខ៥៥ និងផ្លូវលេខ៥៥ (ក្រោយក្រុមហ៊ុនសែលកាត) សង្កាត់ចតុមុខ ខណ្ឌដូនពេញ ត្រូវបានកម្លាំងគណៈបញ្ជាការឯកភាពខណ្ឌដូនពេញចុះរដ្ឋបាលពិនិត្យ កាលយប់ថ្ងៃទី៣០ ខែតុលា ឆ្នាំ២០២៦ ។ ក្នុងគោលបំណងឲ្យម្ចាស់ក្លិប និងអ្នកគ្រប់ទាំង២ក្លិប ត្រូវចូលរួមសហការជាមួយសមត្ថកិច្ច ដើម្បីការពារថែរក្សាសន្តិសុខសណ្តាប់សុវត្ថិភាពសង្គម ។

នៅក្នុងការចុះត្រួតពិនិត្យរដ្ឋបាលនោះគណៈកម្មការបានធ្វើការណែនាំដល់ម្ចាស់ និងអ្នកគ្រប់គ្រងក្លិប ដូចខាងក្រោម៖
១-ធានាគ្មានការបើកអាជីវកម្មជួញដូរផ្លូវភេទ អំពើសញ្ចារកម្ម ប្ញបម្រើផ្លូវភេទក្នុងទីតាំង ។
២-ធានាមិនយកទីតាំងខាងលើធ្វើជាកន្លែង រក្សាទុក, ជួញដូរ ចែកចាយ និងប្រើប្រាស់គ្រឿងញៀនខុសច្បាប់ ។
៣-រាយការណ៍គ្រប់ពេលវេលា នូវសមាសភាពជនសង្ស័យដែលមានពាក់ព័ន្ធមុខសញ្ញាបទល្មើសព្រហ្មទណ្ឌ។
៤-សហការនៅពេលសមត្ថកិច្ចចុះអនុវត្ត និងត្រួតពិនិត្យរដ្ឋបាល ឬធ្វើការស្រាវជ្រាវ ។

៥-ទទួលខុសត្រូវមិនអនុញ្ញាតឲ្យភ្ញៀវមានការចែកចាយ ជួញដូរ និងប្រើប្រាស់គ្រឿងញៀនខុសច្បាប់ ។
៦-មិនអនុញ្ញាតឲ្យចូលចំពោះអនីតិជន។
៧-សហការគ្រប់ពេលវេលានូវសមាសភាព ដែលជាមុខសញ្ញាប្រព្រឹត្តបទល្មើសឆ្លង
ដែន ។
៨-គ្រប់គ្រងមិនឲ្យមានបទល្មើស ភ្នាល់ល្បែងស៊ីសងខុសច្បាប់គ្រប់ប្រភេទ ។

៩-មិនអនុញ្ញាតឲ្យមានការបង្កទំនាស់ និងប្រើប្រាស់អាវុធខុសច្បាប់នៅក្នុងទីតាំងអាជីវកម្មជាដាច់ខាត ។
១០-មុនពេលមានសភាពការណ៍ ក្នុងពេលមានសភាពការណ៍ និងក្រោយពេលមានសភាពការណ៍ ម្ចាស់ទីតាំងត្រូវរាយការណ៍ជាបន្ទាន់ ភ្លាមៗមកកាន់សមត្ថកិច្ច ដើម្បីដោះស្រាយបញ្ហាឲ្យបានទាន់ពេលវេលា ។
១១-តម្រូវឲ្យតម្លើងកាំមេរ៉ាសុវត្ថិភាព គ្រប់ជ្រុងទាំងក្នុង និងក្រៅ នៃទីតាំង ។
ក្រោយធ្វើការណែនាំ អ្នកគ្រប់គ្រងក្លឹបកម្សាន្តទាំង២ យល់ព្រមអនុវត្តតាម និងសហការណ៍រាយការណ៍ជូនសមត្ថកិច្ចភ្លាមៗពេលមានសភាពការណ៍កើតឡើង ៕

ចែករំលែកព័តមាននេះ