ផ្លូវលេខ៧៨C ក្នុងស្រុកសៀមប៉ាង សម្រេចការជួសជុលបាន៩០% ក្រោយរងការខូចខាតធ្ងន់ធ្ងរក្នុងរដូវវស្សា ខណៈគម្រោងចាក់កៅស៊ូកំពុងស្ថិតក្នុងដំណាក់កាលស្នើសុំថវិកា
- ស្ទឹងត្រែង
ខេត្តស្ទឹងត្រែង ៖ ក្រោយរងការខូចខាតយ៉ាងដំណំ ដោយសារភ្លៀងធ្លាក់ខ្លាំងក្នុងរដូវវស្សា បណ្តាលឱ្យកំណាត់ផ្លូវដីក្រហមលេខ៧៨សេ (78C) មានសភាពជង្ហុកជ្រៅ និងភក់ជ្រាំ បង្កការលំបាកដល់ការធ្វើដំណើររបស់ប្រជាពលរដ្ឋ និងការដឹកជញ្ជូនទំនិញនោះ គិតមកដល់ពេលនេះ ការងារជួសជុល និងថែទាំផ្លូវប្រវែង៤៥គីឡូម៉ែត្រ ចាប់ពីផ្លូវបំបែកដុងក្រឡ ឆ្ពោះទៅស្រុកសៀមប៉ាង សម្រេចបានប្រមាណ៩០% ហើយ ។

ប្រជាពលរដ្ឋដែលធ្វើដំណើរតាមកំណាត់ផ្លូវនេះបានឱ្យដឹងថា ក្នុងរដូវវស្សាកន្លងមក ជាពិសេស អំឡុងខែកញ្ញា ឆ្នាំ២០២៦ ផ្លូវបានរងការខូចខាតយ៉ាងខ្លាំង ដោយមានជង្ហុក និងភក់ជ្រាំនៅតាមចំណុចមួយចំនួន បណ្តាលឱ្យយានយន្តតូចធំជាប់ផុង និងពិបាកធ្វើដំណើរឆ្លងកាត់ ។ ស្ថានភាពនេះ បានប៉ះពាល់ដល់ការធ្វើដំណើរប្រចាំថ្ងៃ ការដឹកជញ្ជូនកសិផល និងសកម្មភាពសេដ្ឋកិច្ចរបស់ប្រជាពលរដ្ឋក្នុងតំបន់ ។

លោក ស គឹមណាត ប្រធានមន្ទីរសាធារណការ និងដឹកជញ្ជូនខេត្តស្ទឹងត្រែងបានឱ្យដឹងថា ផ្លូវលេខ៧៨សេ មានប្រវែងសរុប៤៥គីឡូម៉ែត្រ ហើយត្រូវបានដាក់ក្នុងផែនការថែទាំប្រចាំឆ្នាំចំនួនពីរដង ។ ទោះជាយ៉ាងណា ដោយសារឆ្នាំ២០២៦ មានភ្លៀងធ្លាក់ខ្លាំង និងទឹកជំនន់ រួមផ្សំនឹងការធ្វើចរាចរណ៍របស់រថយន្តធុនធ្ងន់ដឹកសម្ភារសំណង់មួយចំនួន បានធ្វើឱ្យផ្លូវដីក្រហមនេះទទួលរងការខូចខាតខ្លាំងជាងឆ្នាំកន្លងទៅ ។ លោកបានបញ្ជាក់ថា ក្រោយទទួលបានការលំបាក និងសំណូមពរពីប្រជាពលរដ្ឋ អាជ្ញាធរ និងមន្ទីរជំនាញបានចាត់បញ្ជូនគ្រឿងចក្រចុះធ្វើការជួសជុល និងកែលម្អស្ថានភាពផ្លូវឡើងវិញ ដើម្បីសម្រួលដល់ការធ្វើដំណើររបស់ប្រជាពលរដ្ឋ ។

ជាមួយគ្នានេះ អាជ្ញាធរខេត្តក៏បានជំរុញឱ្យមានការចាត់វិធានការគ្រប់គ្រងរថយន្តដឹកទំនិញធុនធ្ងន់ ដើម្បីបង្ការការដឹកលើសទម្ងន់ ដែលអាចបង្កការខូចខាតដល់ផ្លូវបន្ថែមទៀត ។ ប្រធានមន្ទីររូបនេះបានបន្ថែមថា បច្ចុប្បន្ន ក្រសួងសាធារណការ និងដឹកជញ្ជូន ព្រមទាំងរដ្ឋបាលខេត្ត កំពុងខិតខំស្នើសុំគម្រោងថវិកាពីធនាគារចិន ដើម្បីសាងសង់កំណាត់ផ្លូវនេះជាផ្លូវកៅស៊ូប្រភេទ DBST។ ទោះបីមិនទាន់មានការកំណត់ពេលវេលាច្បាស់លាស់សម្រាប់ការអនុវត្តគម្រោងក៏ដោយ ក៏ភាគីពាក់ព័ន្ធកំពុងបន្តជំរុញនីតិវិធីស្នើសុំថវិកា ដើម្បីឱ្យគម្រោងនេះ អាចលេចចេញជារូបរាងនាពេលខាងមុខ ។
ដោយឡែក លោក សន សារឿន អភិបាលស្រុកសៀមប៉ាងបានបញ្ជាក់ថា កំណាត់ផ្លូវលេខ៧៨សេ ចាប់ពីចំណុចផ្លូវបំបែកដុងក្រឡ រហូតដល់តំបន់ទន្លេ មានប្រវែងសរុប៤៥គីឡូម៉ែត្រ ហើយការងារកៀរ សម្អាត និងជួសជុលកែលម្អផ្លូវ សម្រេចបានប្រមាណ ៩០% ហើយ ។

លោកបានចាត់ទុកផ្លូវនេះថា ជាហេដ្ឋារចនាសម្ព័ន្ធដ៏មានសារសំខាន់សម្រាប់ប្រជាពលរដ្ឋក្នុងស្រុកសៀមប៉ាង ជាពិសេស ការធ្វើដំណើរទៅកាន់ទីរួមខេត្ត និងការដឹកជញ្ជូនកសិផលទៅកាន់ទីផ្សារ ។ ជាក់ស្តែង ផ្លូវលេខ៧៨សេ មិនត្រឹមតែជាផ្លូវសម្រាប់ការធ្វើដំណើរប៉ុណ្ណោះទេ ប៉ុន្តែថែមទាំងជាសរសៃឈាមសេដ្ឋកិច្ចដ៏សំខាន់ ដែលតភ្ជាប់ស្រុកសៀមប៉ាងទៅកាន់ទីរួមខេត្តស្ទឹងត្រែង និងតំបន់ក្រុងបានលុង ខេត្តរតនគិរី ដោយរួមចំណែកសម្រួលដល់ការដឹកជញ្ជូនកសិផល ការធ្វើដំណើររបស់សិស្សានុសិស្ស និងការផ្លាស់ប្តូរទំនិញរវាងតំបន់នានា។

ការជួសជុលផ្លូវក្នុងដំណាក់កាលបច្ចុប្បន្ន គឺជាវិធានការដោះស្រាយបញ្ហាចំពោះមុខខណៈការប្រែក្លាយផ្លូវដីក្រហមប្រវែង៤៥គីឡូម៉ែត្រនេះ ទៅជាផ្លូវកៅស៊ូ ត្រូវបានចាត់ទុកថា ជាដំណោះស្រាយរយៈពេលវែង ដើម្បីកាត់បន្ថយការលំបាកក្នុងរដូវវស្សា បង្កើនប្រសិទ្ធភាពនៃការដឹកជញ្ជូន និងជំរុញសកម្មភាពសេដ្ឋកិច្ចមូលដ្ឋានឱ្យកាន់តែប្រសើរឡើង។

យ៉ាងណាក៏ដោយ ប្រជាពលរដ្ឋនៅស្រុកសៀមប៉ាង នៅតែរង់ចាំការអនុវត្តគម្រោងសាងសង់ផ្លូវកៅស៊ូនេះឱ្យបានឆាប់ ដើម្បីទទួលបានផ្លូវធ្វើដំណើរដែលមានភាពងាយស្រួល និងមាននិរន្តរភាព ជាពិសេស ក្នុងរដូវវស្សាដែលតែងតែបង្កជាឧបសគ្គដល់ការធ្វើដំណើរ និងការប្រកបរបរចិញ្ចឹមជីវិតរបស់ពួកគេ ៕





ចែករំលែកព័តមាននេះ