ខេត្តព្រះវិហារ ៖ គ្រួសាររងគ្រោះដោយសារជម្លោះព្រំដែនកម្ពុជា-ថៃ ចំនួន៩៩៧គ្រួសារ រស់នៅក្នុងឃុំចំនួន០៣ នៃខេត្តព្រះវិហារ ទទួលបានជំនួយស្បៀងអាហារជាអង្ករ ដើម្បីសម្រាលជីវភាព និងលើកកម្ពស់អាហារូបត្ថម្ភនៅក្នុងសហគមន៍ ។
ពិធីប្រគល់ និងទទួលអំណោយនេះ បានធ្វើឡើងក្រោមអធិបតីភាព ឯកឧត្តម ប្រាក់ គឹមហុង អគ្គលេខាធិការរង នៃគណៈកម្មាធិការជាតិគ្រប់គ្រងគ្រោះមហន្តរាយ តំណាងឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ដោយមានការចូលរួមពីលោក សុខ សាន្តដារ៉ា អភិបាលរងខេត្តព្រះវិហារ លោកស្រីប្រធានមន្ទីរព័ត៌មានខេត្ត តំណាងអង្គការ WFP អាជ្ញាធរពាក់ព័ន្ធ និងប្រជាពលរដ្ឋជាច្រើនរូប ។
សកម្មភាពមនុស្សធម៌នេះ រៀបចំឡើងដោយអគ្គលេខាធិការដ្ឋាន នៃគណៈកម្មាធិការជាតិគ្រប់គ្រងគ្រោះមហន្តរាយ សហការជាមួយកម្មវិធីស្បៀងអាហារពិភពលោក (WFP) ក្រោមការឧបត្ថម្ភថវិកាពីរាជរដ្ឋាភិបាលជប៉ុន តាមរយៈគម្រោង “ស្តារជីវភាព និងពង្រឹងអាហារូបត្ថម្ភដល់ប្រជាពលរដ្ឋខ្មែរ ដែលរងផលប៉ះពាល់ដោយសារសង្គ្រាមឈ្លានពានរបស់ថៃ” ។
តាមប្រភពពីមន្ត្រីរៀបចំកម្មវិធី បានឱ្យដឹងថា គ្រួសារទទួលផល ដែលត្រូវបានជ្រើសរើសនាពេលនេះ រួមមាន ៖ ឃុំរំដោះស្រែ ចំនួន៣៥០គ្រួសារ. ឃុំស្រអែម ចំនួន៣៥០គ្រួសារ. ឃុំកន្ទួត ចំនួន២៩៧គ្រួសារ ។
ក្នុងនោះ គ្រួសារនីមួយៗទទួលបានអង្ករចំនួន ៥០គីឡូក្រាម ដើម្បីជួយសម្រួលដល់ការហូបចុក និងកាត់បន្ថយបន្ទុកជីវភាពប្រចាំថ្ងៃរបស់ពួកគាត់ ៕
ចែករំលែកព័តមាននេះ