ទីក្រុងតូក្យូ៖ ក្រុមចោរអុីនធឺណិត ឬហេកខឺ (hacker) បានលួចលុយគ្រីបតូ (crypto) ចំនួន៦,៣ពាន់លានដុល្លារពីក្រុមហ៊ុនបាយណាន់ (Binance) ដែលជាក្រុមហ៊ុនដូរលុយគ្រីបតូ (crypto) ដ៏ធំជាងគេនៅលើសាកលលោក។ នេះជាការលួចដ៏ច្រើនបំផុតដែលក្រុមអ្នកវិភាគស្មានទុកជាមុនថាគ្មាននរណាក្រៅពីកូរ៉េខាងជើងនោះទេ។ ករណីនេះអាចនឹងធ្វើឱ្យប៉ះពាល់ជំនឿទុកចិត្តរបស់មនុស្សទូទៅទៅលើលុយគ្រីបតូ។ គ្រាន់តែលេចឮដំណឹងនេះភ្លាម តម្លៃប្រាក់គ្រីបតូចាប់ផ្ដើមដាំក្បាលចុះ។ ក្រុមហ៊ុនបាយណាន់ផ្អាកការដកលុយ និងប្រកាសថាខ្លួនសុខចិត្តទទួលរ៉ាប់រងសងអ្វីដែលអតិថិជនខាតបង់ដោយសារអំពើលួចនេះ។
ចំនួនទ្រព្យសម្បត្តិប្រហែលពាក់កណ្ដាលដែលត្រូវចោរលួចត្រូវបានបង្កកទុកភ្លាមៗដោយក្រុមហ៊ុន លក់រូបិយប័ណ្ណគ្រីបតូ ដូចជា Tether, Circle និង World Liberty Financial ជាដើម។ ប្រតិបត្តិការលួចលុយគ្រីបតូនោះប្រើពេលប្រហែលម្ភៃនាទីចាប់ផ្ដើមកាលពីល្ងាចថ្ងៃព្រហស្បតិ៍ ហើយមានភិនភាគប្រហាក់ប្រហែលនឹងករណីលួចទ្រង់ទ្រាយធំៗដែលសង្ស័យថាប្រព្រឹត្តឡើងដោយក្រុមហេកខឺកូរ៉េខាងជើងកាលពីពេលកន្លងមក។ ក្រុមហ៊ុន TRM ខាងវិភាគខ្សែបណ្ដាញគ្រីបតូអះអាងថាក្រុមហេកខឺអាចចូលទៅគ្រប់គ្រង-បញ្ជាកាបូបលុយគ្រីបតូរបស់ក្រុមហ៊ុនបាយណាន់។ បន្ទាប់មក ពួកគេ (ហេកខឺ) វេរលុយទាំងអស់ចូលទៅក្នុងកាបូបលុយរបស់ខ្លួន។
ករណីនេះដូចទៅនឹងករណីលួចលុយគ្រីបតូរបស់ក្រុមហ៊ុន Bybit កាលពីឆ្នាំ២០២៥ ដែលទីភ្នាក់ងារអែហ្វប៊ីអាយ (FBI) របស់អាមេរិកសន្និដ្ឋានថាជាស្នាដៃរបស់កូរ៉េខាងជើង។ ក្រុមហ៊ុន TRM បង្ហោះសារនៅលើគេហទំព័ររបស់ខ្លួនថានេះជាទង្វើរបស់ក្រុមហេកខឺកូរ៉េខាងជើងពិតប្រាកដណាស់។ ទាំង TRM និងក្រុមហ៊ុនដូររូបិយប័ណ្ណគ្រីបតូមួយទៀតឈ្មោះ Chinalysis អះអាងថាពួកគេច្បាស់ក្នុងចិត្តថានេះជាស្នាដៃរបស់កូរ៉េខាងជើងពិតមែនហើយ។
អស់ជាច្រើនឆ្នាំមកហើយ កូរ៉េខាងជើងប្រើប្រាស់ក្រុមចោរបច្ចេកវិទ្យាព័ត៌មានរបស់រដ្ឋាភិបាលដើម្បីឈ្លបយកការណ៍សម្ងាត់ ដើម្បីលួចលុយគ្រីបតូ និងដើម្បីរកប្រាក់ចំណូល។ នេះបើយោងតាមការស្រាវជ្រាវរបស់អាជ្ញាធរអាមេរិក, កូរ៉េខាងត្បូង និងក្រុមអ្នកជំនាញខាងសន្តិសុខព័ត៌មានវិទ្យា។ ក្រុមហ៊ុនបាយណាន់អះអាងថាប្រាក់របស់អតិថិជនខ្លួនមានសុវត្ថិភាពជាធម្មតា និងថាខ្លួនកំពុងសហការជាមួយបណ្ដាដៃគូនានាដើម្បីបង្កកលុយដែលរងផលប៉ះពាល់ពីអំពើលួចនោះ។ ឥឡូវនេះ ក្រុមហ៊ុនកំណត់មុខសញ្ញាលុយគ្រីបតូចំនួនបីពាន់លានដុល្លារ។ ក្រុមហ៊ុនរំពឹងថានឹងបើកដំណើរការប្រតិបត្តិការដូរលុយគ្រីបតូរបស់ខ្លួនឡើងវិញនៅអំឡុង៤៨ម៉ោងខាងមុខ។ ក្រុមហ៊ុនមិនបាននិយាយអំពីជោគវាសនាលុយគ្រីតូ៣,៣ពាន់លានដុល្លារទៀតថាតើនឹងទៅជាយ៉ាងណានោះទេ។
លោករីឆាត តឹង (Richard Teng) ជានាយកប្រតិបត្តិក្រុមហ៊ុនបាយណាន់បង្ហោះសារនៅលើបណ្ដាញអ៊ិចដោយនិយាយសំដៅទៅអតិថិជនថា «ប្រាក់របស់លោកអ្នកមានសុវត្ថិភាព ហើយប្រសិនបើមានការបាត់បង់ យើងខ្ញុំធានារ៉ាប់រងទូទាត់សងវិញគ្រប់ចំនួនមិនឱ្យបាត់បង់សូម្បីតែមួយកាក់មួយសេន។ រហូតមកដល់ពេលនេះ ការស៊ើបអង្កេតរបស់យើងមិនទាន់ចោទថានេះជាស្នាដៃរបស់បុគ្គលណាឡើយ»។ លោកអារ៉ាវីន ស្រីនីវ៉ាសាន (Aravind Srinivasan) ធ្វើការនៅក្រុមហ៊ុន GSR ថ្លែងថានេះជាការលួចតាមប្រព័ន្ធបច្ចេកវិទ្យាដ៏ធំបំផុតនៅក្នុងប្រវត្តិសាស្ត្រ ខណៈដែលតម្លៃប្រាក់គ្រីបតូកំពុងតែដាំក្បាលចុះជាទូទៅ។ រូបិយប័ណ្ណប៊ីតខញ (Bitcoin) ធ្លាក់ថ្លៃទាបបំផុតនៅក្នុងរយៈពេលមួយសប្ដាហ៍ចុងក្រោយ ពោលគឺធ្លាក់ចុះជាង៣%។ ចំណែករូបិយប័ណ្ណ BNB ធ្លាក់ថ្លៃ៥%នៅក្នុងរយៈពេល២៤ម៉ោងចុងក្រោយ៕ ប្រភព៖ Reuters
ចែករំលែកព័តមាននេះ