តម្លៃស្រូវសើមដើមរដូវ ដែលអាចលក់ចេញភ្លាមៗ បន្ទាប់ពីច្រូតនៅចុងខែតុលានេះ ត្រូវបានសហព័ន្ធស្រូវអង្ករកម្ពុជា បានប្រកាសថា មានតម្លៃពី៨៣០រៀល ដល់១១១០រៀលនៅក្នុងមួយគីឡូក្រាម ។
ប្រភពដដែលបានអះអាងថា តម្លៃស្រូវដែលថោកជាងគេ គឺជាប្រភេទស្រូវ អូអឹម ហើយតម្លៃស្រូវមានតម្លៃមធ្យម គឺស្រូវកែវ ហើយតម្លៃស្រូវដែលថ្លៃជាងគេ គឺស្រូវផ្ការំដួល និងស្រូវសុម៉ាលី ។
ពាក់ព័ន្ធនឹងវិស័យស្រូវអង្ករនេះ កម្ពុជាកំពុងតែខិតខំពង្រឹងការកែច្នៃស្រូវជាអង្ករនាំចេញ ដោយកាលពីពេលថ្មីៗនេះ ក្រសួងកសិកម្ម រុក្ខាប្រមាញ់ និងនេសាទ បានប្រកាសថា ត្រឹមរង្វង់ពាក់កណ្តាលខែតុលា កម្ពុជាអាចនាំចេញអង្ករសរុប១,០១លានតោន ។
នេះ គឺជាការបំបែកឯកត្តកម្ម ជាលើកដំបូង ក្រោយពេលដែលកម្ពុជាបានកំណត់គោលដៅឲ្យសម្រេចការនាំចេញអង្ករឲ្យបាន ១លានតោន តាំងពីឆ្នាំ២០១៥មកនោះ ៕
ចែករំលែកព័តមាននេះ