សង្គ្រាមយេម៉ែន ៖ ទីក្រុងតាអេសជាទីក្រុងធំទី៣ និងជាទីក្រុងវប្បធម៌របស់យេម៉ែន កាន់កាប់ដោយរដ្ឋាភិបាល ទទួលស្កាល់ដោយអន្តរជាតិ និងមានអារ៉ាប៊ីសាអ៊ូឌីត ជាអ្នកជួយទ្រទ្រង់ ពេលនេះ កំពុងតែជាប់ក្នុងការហ៊ុមព័ទ្ធវាយប្រហាររបស់ពួកឧទ្ទាមហ៊ូធី ។
ការហ៊ុមព័ទ្ធនោះ បណ្ដាលឲ្យទីក្រុងនេះ ធ្លាក់ក្នុងស្ថានភាពលំបាកលំបិនបំផុត ដោយប្រជាជនកំពុងរស់ក្នុងភាពអត់ឃ្លានដាច់ស្បៀងដាច់ទឹក ។ ទីក្រុងកំពុងរងការបាញ់ផ្លោងធ្ងន់ធ្ងរបំផុត ដោយភូមិភាគច្រើននៅជុំវិញក្រុង ធ្លាក់ក្នុងការកាន់កាប់របស់ពួកហ៊ូធីដែលលើកមកពីភាគខាងជើងប្រទេស។
ទោះជាបែបនេះក្ដី អភិបាលក្រុងនោះ លោកណាប៊ីលសាមសាន់ថ្លែងថា ទីក្រុងតាអេសមិនព្រមចុះចូលឡើយ ។ លោកថា ពួកហ៊ូធី ចង់សងសឹកការក្រាញតស៊ូរបស់យើង ។ ពួកគេចង់ផ្លាស់ប្ដូរអត្តសញ្ញាណប្រជាជនក្រុងនេះ ហើយជ្រើសរើសទាហានដោយចាប់បង្ខំ ។ ក្មេងមិនទាន់ពេញវ័យច្រើនរយនាក់ ត្រូវបានបញ្ជូនទៅកាន់រណសិរ្សក្រុងសាអាដា ។
អភិបាលក្រុងនោះ ក៏បរិហារដែរ ដល់គ្រោះទូរ្ភិក្សនៅក្រុងតាអេស។ លោកថា ពួកហ៊ូធីត្រួតត្រាលើការបញ្ជូនទឹកនិងស្បៀង។ ស្បៀងស្តុកបានអស់ហើយបណ្ដាមន្ទីរពេទ្យត្រូវបិទទ្វារ ។ ពួកហ៊ូធីអំពាវនាវដល់ប្រជាជនក្រុងនោះ ឲ្យនាំគ្នាចាកចេញ ឬមួយសុខចិត្តស្លាប់ ៕
ចែករំលែកព័តមាននេះ