ខេត្តព្រះវិហារ ៖ ហ្វូងសត្វដំរីព្រៃចំនួន ៦ក្បាល បាន និងកំពុងធ្វើសកម្មភាពស៊ីព្រមទាំងបំផ្លាញស្រូវរបស់បងប្អូនប្រជាកសិករ ខណៈអាជ្ញាធរស្រុកបានចាត់តាំងក្រុមការងារចុះអន្តរាគមន៍ និងប្រើប្រាស់បច្ចេកវិទ្យាដ្រូនតាមដានយ៉ាងស្រុះស្រួល ។
ចាក់ស្តែងសកម្មភាពរដ្ឋបាលស្រុកត្បែងមានជ័យ បានប្រកាសនាថ្ងៃទី២៩ ខែតុលានេះថា ៖ នៅរសៀលថ្ងៃទី២៩ ខែតុលា ឆ្នាំ២០២៦ វេលាម៉ោង៤:៣០នាទី លោក ឃីន រស្មី អភិបាលនៃគណៈអភិបាលស្រុកត្បែងមានជ័យ បានចាត់តាំងក្រុមការងារពិសេស ចំនួន២រូប ចុះសហការជាមួយក្រុមការងារស្រុកជាំក្សាន្ត ដើម្បីតាមដាន និងឃ្លាំមើលហ្វូងសត្វដំរីព្រៃ ដោយបានប្រើប្រាស់បច្ចេកវិទ្យាដ្រូន ហោះថតរូបភាព និងវីដេអូ ។
ប្រភពបានបន្តថា តាមរយៈការចុះល្បាត និងផ្ដិតយករូបភាពជាក់ស្ដែងនេះ បានបញ្ជាក់ឱ្យឃើញច្បាស់ថា ហ្វូងសត្វដំរីព្រៃចំនួន ៦ក្បាលនេះ គឺជាហ្វូងដំរីដែលធ្លាប់ចេញពីភូមិសាស្ត្រស្រុកត្បែងមានជ័យកន្លងមកពិតប្រាកដមែន ។ ទីតាំងដែលក្រុមការងារថតបាន គឺនៅចំណុច ស្រែត្រពាំងច្រឹក ស្ថិតនៅខាងត្បូងភូមិកោងយ៉ោងប្រមាណ ២គីឡូម៉ែត្រ ឃុំយាង ស្រុកជាំក្សាន្ត ដោយហ្វូងដំរីទាំងនោះ កំពុងធ្វើសកម្មភាពស៊ី និងបំផ្លាញស្រូវរបស់បងប្អូនប្រជាកសិករក្នុងតំបន់ ។
ការកត់សម្គាល់ បើពិនិត្យមើលពីស្ថានភាព និងឥរិយាបថរបស់ហ្វូងដំរីព្រៃទាំងនេះ គឺបង្ហាញឱ្យឃើញនូវភាពខុសប្រក្រតីបន្តិច ដោយពួកវាហាក់មិនសូវមានការភ័យខ្លាចមនុស្សដូចពេលដែលពួកវារស់នៅក្នុងទឹកដីភូមិសាស្ត្រស្រុកត្បែងមានជ័យឡើយ៕
ចែករំលែកព័តមាននេះ