មន្ត្រីជំនាញ និងអាជ្ញាធរមូលដ្ឋានចុះបង្ក្រាបអ្នកជីករករ៉ែខុសច្បាប់ ប្រើសុទ្ធតែគ្រឿងចក្រតែបានត្រឹមអប់រំ
- បាត់ដំបង
ខេត្តបាត់ដំបង ៖ ទីតាំងរុករ៉ែមាសដ៏ធំដុំមួយកន្លែងនៅចំណុច «ជើងភ្នំត្រង៉ោល» ស្ថិតក្នុងភូមិភ្នំព្រឹក ឃុំភ្នំព្រឹក ស្រុកភ្នំព្រឹក ដែលប្រើគ្រឿងចក្រជីកគាស់កកាយស្ទើររលើងកូនភ្នំទៅហើយ ទើបត្រូវបានកម្លាំងមន្ទីរជំនាញ និងអាជ្ញាធរស្រុកនេះ ចុះបង្ក្រាបរឹបអូសយកវត្ថុតាង និងប្រកាសបិទទីតាំងនៅថ្ងៃទី២៩ តុលា ប៉ុន្តែមិនយកទោសអូសដំណើរទេ បានត្រឹមធ្វើការអប់រំជនប្រព្រឹត្តតែប៉ុណ្ណោះ ។
យោងលើរបាយការណ៍អភិបាលស្រុកភ្នំព្រឹក លោក សុង សុភ័ក្រ ដែលបានបង្ហាញលើបណ្ដាញសង្គមរបស់លោកបានឲ្យដឹងថា អ្នកធ្វើអាជីវកម្មរ៉ែមាសខុសច្បាប់នោះឈ្មោះ ថាន់ វិចិត្រ ។ ជននេះ បានប្រើប្រាស់គ្រឿងចក្រកាយជើងភ្នំត្រង៉ោល រុករករ៉ែមាសដោយគ្មានច្បាប់អនុញ្ញាត ។ ប៉ុន្តែលោកអភិបាលស្រុករូបនេះ មិនបាននិយាយពីប្រវត្តិនៃបទល្មើសនេះថា តើឈ្មោះ ថាន់ វិចិត្រ ម្នាក់នេះ បានធ្វើសកម្មភាពតាំងពីពេលណាមក ទើបត្រូវបានបង្ក្រាបនៅពេលនេះ ? ប៉ុន្តែយ៉ាងណា លោកថា ពេលនេះ ត្រូវបានមន្ត្រីនៃមន្ទីររ៉ែនិងថាមពល សហការជាមួយអាជ្ញាធរ ឃុំ និងស្រុកភ្នំព្រឹក ចុះបង្ក្រាបហើយ ។
ទីតាំងរុករករ៉ែមាសនៅក្នុងស្រុកភ្នំព្រឹក មិនមែនមានត្រឹមតែមួយកន្លែងរបស់ឈ្មោះ ថាន់ វិចិត្រ ម្នាក់នេះទេ មិនមាននៅមានច្រើនទីតាំងណាស់ ហើយទីតាំងនីមួយៗ សុទ្ធតែមានប្រើប្រាស់គ្រឿងចក្រ មានរថយន្តដឹកជញ្ជូនយ៉ាងសកម្មទៀតផង ។ នេះបើតាមអ្នកស្រុកភ្នំព្រឹកបាននិយាយ ។
មន្ត្រីស្រុកបាននិយាយថា ទីតាំងខ្លះ ធ្វើសកម្មភាពលួចលាក់នៅក្នុងរបងដែលហ៊ុមព័ទ្ធជិត ។ ទីតាំងខ្លះលួចធ្វើសកម្មភាពពេលយប់ច្រើនជាងពេលថ្ងៃ ដើម្បីលាក់បាំងភ្នែកមន្ត្រី និងមហាជន ។ ប៉ុន្តែមួយរយៈកន្លងទៅនេះ ទីតាំងទាំងនោះ ហាក់ស្ងប់ស្ងត់ពីសកម្មភាព ដោយសារត្រូវបានបង្ក្រាបដោយមន្ត្រីជំនាញ រីឯទីតាំងតូចៗមួយចំនួននៅតែបន្តលួចលាក់ធ្វើសកម្មភាព តែធ្វើនៅពេលយប់ ។
ប៉ុន្តែយ៉ាងណា បើតាមលោក សុង សុភ័ក្រ ការបង្ក្រាបទីតាំងធ្វើអាជីវកម្មរុករករ៉ែគ្មានច្បាប់របស់ឈ្មោះ ថាន់ វិចិត្រ មន្ត្រីជំនាញ និងអាជ្ញាធរបានសម្រេចបិទទីតាំងនោះទាំងស្រុង ហើយបានរឹបអូសយកវត្ថុតាងធ្វើអាជីវកម្មផង ។ ប៉ុន្តែមិនបានដាក់ទោសអូសដំណើរដល់ជនប្រព្រឹត្តទេ គ្រាន់តែធ្វើកិច្ចឲ្យសន្យាបញ្ឈប់សកម្មភាពល្មើសច្បាប់ ហើយធ្វើការអប់រំតែប៉ុណ្ណោះ ៕
ចែករំលែកព័តមាននេះ