រថយន្តសង្គ្រោះនិងព្រូស កៀរគ្នាផ្អើលផ្លូវល្បឿនលឿន
- ភ្នំពេញ
រាជធានីភ្នំពេញ ៖ រថយន្តគិលានសង្គ្រោះរបស់មន្ទីរសម្រាកព្យាបាល«ធារ៉ា ចាន់ហេង» ដឹកអ្នកជំងឺចេញពីខេត្តកំពង់ស្ពឺ ទៅសង្គ្រោះបន្ទាន់នៅមន្ទីពេទ្យជាតិតេជោសន្តិភាពនៅភ្នំពេញ បានកៀរគ្នាជាមួយរថយន្ត១គ្រឿងទៀតម៉ាកតូយ៉ូតាព្រូស បណ្ដាលឲ្យរងការខូចខាតបន្តិចបន្តួចទាំងសងខាង ហើយម្ចាស់រថយន្តព្រូស បានទារសំណង១ពាន់ដុល្លារ ។ ប៉ុន្តែខាងអ្នកបើករថយន្តសង្គ្រោះមិនព្រមសងនោះទេ និងបានសុំបន្ត ដំណើរ យកអ្នកជំងឺដែលត្រូវសង្គ្រោះបន្ទាន់ទៅមន្ទីរពេទ្យសិន រួចចាំត្រឡប់មកដោះស្រាយគ្នាជាក្រោយ ។
ខណៈនោះ ម្ចាស់រថយន្តព្រូសមិនព្រមឲ្យរថយន្តសង្គ្រោះទៅឡើយ ទោះបីជាក្រុមគ្រួសារអ្នកជំងឺផ្ទាល់សំពះអង្វរយ៉ាងណា ក៏ម្ចាស់រថយន្តព្រូសនោះមិនព្រមឲ្យរថយន្តសង្គ្រោះបន្តដំណើរទៅសិនដែរ ហើយភាគីទាំង២បានជជែកវែកញែកប្រកែកគ្នារកខុសត្រូវប្រើពេលយ៉ាងយូរ ។ រហូតដល់មានមន្ត្រីនគរបាលម្នាក់បានទៅជា មួយរថយន្តសង្គ្រោះនោះ ទើបម្ចាស់រថយន្តព្រូសយល់ព្រមឲ្យរថយន្តសង្គ្រោះដឹកអ្នកជំងឺបន្តដំណើរទៅកាន់នៅមន្ទីពេទ្យជាតិតេជោសន្តិភាព រួចទើបបន្តដោះស្រាយគ្នាជាក្រោយ ។
ឧប្បត្តិហេតុនេះ បានកើតឡើងកាលពីវេលាម៉ោង១១ព្រឹក ថ្ងៃទី២៩ ខែតុលា ឆ្នាំ២០២៦ នៅត្រង់ចំណុចរង្វង់មូលគល់ស្ពានអាកាសផ្លូវល្បឿនលឿនភ្នំពេញ-ព្រះសីហនុ កែងមហាវិថីឈ្នះ=ឈ្នះ ស្ថិតនៅក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
មហាជនបាននិយាយថា នៅមុនពេលកើតហេតុ រថយន្តគិលានសង្គ្រោះ១គ្រឿងរបស់មន្ទីរសម្រាកព្យាបាល«ធារ៉ា ចាន់ហេង» បានដឹកអ្នកជំងឺជាស្ត្រីចំណាស់ម្នាក់ ដែលមានអាការៈធ្ងន់សន្លប់អត់ដឹងខ្លួន និងកំពុងដាក់ខ្យល់អុកស៊ីហ្សែនផង ចេញពីខេត្តកំពង់ស្ពឺទៅសង្គ្រោះបន្ទាន់នៅមន្ទីរពេទ្យជាតិតេជោសន្តិភាពរាជធានីភ្នំពេញ ។
ខណៈនោះ បានបើកធ្វើដំណើរតាមផ្លូវល្បឿនលឿនភ្នំពេញ-ព្រះសីហនុ ក្នុងទិសដៅពីលិចទៅកើត លុះពេលមកដល់ត្រង់ចំណុចកើតហេតុ ក៏បានកៀរគ្នាតិចតួចជាមួយរថយន្ត១គ្រឿងទៀតម៉ាកតូយ៉ូតាព្រូស ពណ៌ប្រផេះ ពាក់ផ្លាកលេខ ភ្នំពេញ ២CG.៧៨១៣ ដែលកំពុងធ្វើដំណើរតាមបណ្តោយមហាវិថីឈ្នះ=ឈ្នះ ក្រឡឹងរង្វង់មូលគល់ស្ពានអាកាសផ្លូវល្បឿនលឿនខាងលើ ។
ប្រភពដដែលបានប្រាប់ឲ្យដឹងបន្តទៀតថា ឧប្បត្តិហេតុនេះ បានបណ្តាលឲ្យរថយន្តម៉ាកតូយ៉ូតាព្រូសរងការខូចខាតក្រពឹតថ្ពាល់ និងឆ្កូតកាងមុខផ្នែកខាងស្តាំ ។ ចំណែកឯរថយន្ត គិលានសង្គ្រោះខាងលើ រងការខូចខាតកាងខាងក្រោយប៉ែកខាងឆ្វេង ហើយពេលនោះ ពុំដឹងថា ខាងណាជាអ្នកខុស និងខាងណាជាអ្នកត្រូវនោះទេ ។
ប៉ុន្តែភាគីទាំង២ បានប្រកែកគ្នាយកត្រូវរៀងៗខ្លួន ដោយខាងអ្នកបើករថយន្តព្រូស បានចោទរថយន្តគិលានសង្គ្រោះខាងលើថា បានបើកបុករថយន្តខ្លួនបង្កការខូចខាត ហើយបានទារសំណងពីខាងរថយន្តសង្គ្រោះចំនួន១ពាន់ដុល្លារ និងទាមទារឲ្យដោះស្រាយគ្នានៅនឹងកន្លែងកើតហេតុតែម្ដង ទើបឲ្យចាកចេញទៅបាន ។
ប្រភពខាងលើ បានប្រាប់ឲ្យដឹងបន្តទៀតថា ដោយឡែកខាងអ្នកបើករថយន្តសង្គ្រោះមិនព្រមសងទេ ដោយចោទត្រឡប់ទៅកាន់ម្ចាស់រថយន្តព្រូសនោះវិញថា បានបើកកៀររថយន្តពេទ្យពីក្រោយ បណ្ដាលឲ្យរងការខូចខាតខ្លួនឯងសោះ បែរជាមកទាមទារសំណងទាំងមិនចេះអៀនខ្មាស ។ មិនតែប៉ុណ្ណោះ ខាងរថយន្តពេទ្យបានសុំយកអ្នកជំងឺទៅសង្គ្រោះបន្ទាន់សិន រួចចាំត្រឡប់មកដោះស្រាយគ្នាជាក្រោយ ព្រោះអ្នកជំងឺត្រូវការសង្គ្រោះបន្ទាន់ មិនអាចពន្យារពេលបានឡើយ ។
រីឯក្រុមគ្រួសារអ្នកជំងឺដែលកំពុងស្ថិតនៅលើរថយន្តសង្គ្រោះនោះ ក៏បានសំពះអង្វរសុំឲ្យម្ចាស់រថយន្តព្រូស អនុញ្ញាតឲ្យរថយន្តគិលានសង្គ្រោះដឹកអ្នកជំងឺទៅសង្គ្រោះបន្ទាន់សិនដែរ ប៉ុន្តែម្ចាស់រថយន្តព្រូសនេះមិនព្រមឡើយ នៅតែទាមទារដោះស្រាយឲ្យចប់សិនចាំបន្តដំណើរទៅ ។
ប្រភពមួយនេះ បានប្រាប់ឲ្យដឹងបន្ថែមថា ដោយសារតែការទាមទារយកត្រូវរៀងៗខ្លួននោះ បានធ្វើឲ្យខាតពេលសង្គ្រោះអ្នកជំងឺ ហើយអ្នកដែលព្រួយបារម្ភបំផុតនោះ គឺក្រុមគ្រួសារអ្នកជំងឺតែម្ដង ។ ក្រោយពេលទទួលដំណឹងនេះហើយ កម្លាំងប៉ុស្តិ៍នគរបាលរដ្ឋបាលសំរោងក្រោម បានចុះទៅអន្តរាគមន៍ ហើយមន្ត្រីនគរបាលម្នាក់ បានទៅជាមួយរថយន្តសង្គ្រោះខាងលើ ទើបពេលនោះម្ចាស់រថយន្តព្រូស យល់ព្រមឲ្យរថយន្តសង្គ្រោះបន្តដឹកអ្នកជំងឺទៅកាន់មន្ទីរពេទ្យ ។ ក្រោយពេលយកអ្នកជំងឺទៅសង្គ្រោះ ហើយ ពេលនោះ ភាគីទាំង២បានធ្វើការសម្របសម្រួល តែមិនត្រូវគ្នាដដែល ។
នគរបាលបានប្រាប់ថា ខណៈនោះ នគរ បាលប៉ុស្តិ៍សំរោងក្រោម ក៏បានបញ្ជូនភាគីទាំង២ទៅកាន់ផ្នែកចរាចរណ៍ នៃអធិការដ្ឋាននគរ បាលខណ្ឌពោធិ៍សែនជ័យ ឲ្យនាំយករថន្តទាំងពីរគ្រឿងទៅធ្វើការដោះស្រាយគ្នាបន្តទៀត ។ លុះពេលទៅដល់ក្នុងកណ្ដាប់ដៃផ្នែកចរាចរណ៍ នៃអធិការដ្ឋាននគរបាលខណ្ឌពោធិ៍សែនជ័យ ស្រាប់តែភាគីទាំង២ មានភាពទន់ភ្លន់ដាក់គ្នាវិញ និងបានសុខចិត្តបញ្ចប់រឿងនៅថ្ងៃដដែលនោះ ដោយព្រមស្មើគ្នា យករថយន្តទៅជួស ជុលរៀងៗខ្លួន គឺគ្មានភាគីណាសងទៅភាគីណាឡើយ ៕
ចែករំលែកព័តមាននេះ