រាជធានីភ្នំពេញ ៖ អ្នកលក់អនឡាញល្បីឈ្មោះម្នាក់ លើបណ្តាញសង្គមហ្វេសប៊ុក ដែលជាម្ចាស់រថយន្ត Range Rover ពាក់ស្លាកលេខ «កម្ពុជា JJ.CHING» ត្រូវបានកម្លាំងនគរបាលរាជធានីភ្នំពេញ ស្រាវជ្រាវតាមឃាត់ខ្លួនបានហើយ ក្រោយពីបានបើករថយន្តបុកអ្នកជិះម៉ូតូម្នាក់ បណ្តាលឱ្យស្លាប់បាត់បង់ជីវិតភ្លាមៗនៅកន្លែងកើតហេតុ រួចបើករត់គេច និងយករថយន្តទៅផ្លុងចោល។ ក្រោយពីសមត្ថកិច្ចឃាត់ខ្លួនស្ត្រីសង្ស័យឈ្មោះ សៅ លីជីង នាងបានសារភាពហើយថា ខ្លួនជាអ្នកបើកបុកជនរងគ្រោះពិតមែន មិនមែនប្ដីនាងបើកដូចការផ្ដល់ព័ត៌មានរបស់ឪពុកនាងទេ ។
លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានសរសេរនៅលើបណ្ដាញសង្គមថា៖ «ខ្ញុំបាទបានប្រាប់ហើយថា (ឱ្យចូលមកទទួលកំហុសមិនព្រម) រាល់បទល្មើសកើតឡើងគឺខ្ញុំមិនដែលនៅស្ងៀមទេ (ស្ងៀមតែមិនស្ងាត់)! ការងារជំនាញស្រាវជ្រាវមិនដកដៃ (ស្មានតែរៀបចំឱ្យអ្នកមកទទួលកំហុសជំនួសបានមែន) វិធានការជំនាញ និងច្បាប់» ។
ជាមួយគ្នានេះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានឲ្យដឹងថា នារសៀលថ្ងៃទី៣០ ខែតុលា ឆ្នាំ២០២៦ កម្លាំងជំនាញការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដឹកនាំកម្លាំងស្រាវជ្រាវដោយលោកឧត្តមសេនីយ៍ទោ ហេង រតនា ស្នងការរងផែននគរបាលចរាចរណ៍ នៃស្នងការដ្ឋាននគរបាលរាជធានីភ្នំពេញ អនុវត្តតាមបទបញ្ជាផ្ទាល់ពីឧត្តមសេនីយ៍ឯក ជួន ណារិន្ទ អគ្គស្នងរង និងជាស្នងការនគរបាលរាជធានីភ្នំពេញ បានធ្វើការឃាត់ខ្លួនជនសង្ស័យម្នាក់ ឈ្មោះ សៅ លីឈីង ភេទស្រី អាយុ៣៣ឆ្នាំ មានទីលំនៅបច្ចុប្បន្ននៅ បុរីវិមានភ្នំពេញ ផ្ទះលេខ៩B ផ្លូវលេខ១ ភូមិបាក់ខែង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ពាក់ព័ន្ធករណី បើករថយន្ត មិនប្រកាន់ចំណែកផ្លូវរបស់ខ្លួន និងបើករត់គេចចេញពីកន្លែងកើតហេតុគេចវេសពីការទទួលខុសត្រូវ ។
សមត្ថកិច្ច បានអោយដឹងថា ឈ្មោះ សៅ លីជីង ហៅ JJ.CHING បានសារភាពហើយថា ខ្លួនជាអ្នកបើកបុកជនរងគ្រោះពិតមែន មិនមែនប្ដីនាងបើកដូចការផ្ដល់ព័ត៌មានរបស់ឪពុកនាងទេ ។
សូមបញ្ជាក់ថា កាលពីថ្ងៃទី២៨ ខែតុលា ឆ្នាំ២០២៦ នាវេលាម៉ោង២០និង៥៥នាទី នៅត្រង់ចំណុចបង្គោលភ្លើងលេខPP1.20 ផ្លូវបេតុង ភូមិក្ដីចាស់ សង្កាត់បាក់ខែងមានករណីគ្រោះថ្នាក់ចរាចរណ៍មួយកើតឡើងរវាងរថយន្តម៉ាក RANGE ROVER ពណ៌ស ពាក់ផ្លាកលេខ កម្ពុជា JJ.CHING ធ្វើដំណើរលើផ្លូវបេតុង ក្នុងទិសដៅពីលិចទៅកើត បុកជាមួយម៉ូតូម៉ាក SUZUKI NEX ពណ៌សទឹកក្រូច ផ្លាកលេខ កែប1B-6378 ធ្វើដំណើរលើផ្លូវបេតុង ក្នុងទិសដៅពីកើតទៅលិច (បញ្ច្រាសទិសគ្នា) បណ្តាលឲ្យអ្នកបើកម៉ូតូស្លាប់១នាក់ នៅកន្លែងកើតហេតុ ។ ជនរងគ្រោះឈ្មោះ ដៀប វាសនា ភេទប្រុស អាយុ២៨ឆ្នាំ មានទីលំនៅស្រុកឈូក ខេត្តកំពត ។
មូលហេតុ៖ អ្នកបើកបររថយន្ត បើកមិនប្រកាន់ចំណែកផ្លូវរបស់ខ្លួន និងបើករត់គេចចេញពីកន្លែងកើតហេតុ គេចវេសពីការទទួលខុសត្រូវ ។
បច្ចុប្បន្ន កម្លាំងជំនាញបានឃាត់ខ្លួនអ្នកបើករថយន្តខាងលើដើម្បី កសាងសំណុំរឿងអនុវត្តតាមនីតិវិធី៕
ចែករំលែកព័តមាននេះ