ប្រទេសអ៉ីស្រាអែល ៖ តាមលទ្ធផលចុងក្រោយផ្លូវការនៃការបោះឆ្នោតសភាអ៉ីស្រាអែលចេញផ្សាយ កាលពីយប់ថ្ងៃទី២៩ មក៣០ តុលា បង្ហាញថា ក្រុមចម្រុះស្ដាំនិយម និងស្ដាំនិយមជ្រុលរបស់នាយករដ្ឋមន្ត្រីចប់អាណត្តិ លោកបេនចាមីននេតាន់យ៉ាហ៊ូ ទទួលបានសំឡេងនាំមុខក្រុមប្រឆាំងសំខាន់ តែមិនបានសំឡេងភាគច្រើន ដើម្បីរក្សាការត្រួតត្រាសភាឡើយ។
ក្រុមរបស់លោកនេតាន់យ៉ាហ៊ូដណ្ដើមបានកៅអី៥៣ ក្នុងចំណោមកៅអីទាំង១២០របស់សភា ហើយគណបក្សលីគូដរបស់នាយករដ្ឋមន្ត្រីនៅតែជាគណបក្សឈានមុខគេ ដោយទទួលបានកៅអី២៧ ។ ប្លុកពួកប្រឆាំងដឹកនាំដោយអ្នកកណ្ដាលនិយមលោកហ្គាឌីអៃសេនកូតទទួលបានកៅអី៤៨ ។ នេះបើតាមការគូសបញ្ជាក់របស់គណៈកម្មាធិការបោះឆ្នោតក្នុងសេចក្ដីប្រកាសមួយ ។
លទ្ធផលផ្លូវការនៃការបោះឆ្នោតចេញដោយគណៈកម្មាធិការបោះឆ្នោតអ៉ីស្រាអែលគូសបញ្ជាក់ម្យ៉ាងទៀតថា គណបក្សអារ៉ាប់២ គឺគណបក្ស RAAM និងគណបក្សអារ៉ាប់រួបរួមបូកបញ្ចូលគ្នា ក្នុងការបោះឆ្នោតសភាលើកនេះ ទទួលបានកៅអីច្រើនគួរឲ្យភ្ញាក់ផ្អើលដល់ទៅ១៩កៅអី ហើយកំពុងក្លាយជាអ្នកត្រូវគេចែចង់សម្រាប់ចូលរួមក្នុងការបង្កើតរដ្ឋាភិបាលចម្រុះមួយ។
ប៉ុន្តែគណបក្សទាំង២នេះ កាលពីថ្ងៃទី២៩ តុលា ទទួលការចោទប្រកាន់ពីក្រុមលោកនេតាន់យ៉ាហ៊ូថា ទិញសន្លឹកឆ្នោត ។ គេសង្ស័យគណបក្សទាំង២ថា ទទួលមូលនិធិពីកាតា សម្រាប់ការទិញសន្លឹកឆ្នោត ។ គណបក្សអារ៉ាប់ទាំង២ ក៏ដូចជាកាតាដែរបានបដិសេធការចោទប្រកាន់នោះ ៕
ចែករំលែកព័តមាននេះ