ឈ្វេងយល់អំពីគ្រឿងបរិក្ខាររបស់ព្រះសង្ឃ
- សៀមរាប
ខេត្តសៀមរាប៖ នៅសារមន្ទីរព្រះនរោត្តមសីហនុ-អង្គរ ក្រុមការងារស្រាវជ្រាវនៃការិយាល័យស្រាវជ្រាវ និងតម្កល់ឯកសារ នៃនាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ បានរៀបចំដាក់តាំងបង្ហាញអំពីគ្រឿងបរិក្ខាររបស់ព្រះសង្ឃ ដែលប្រើប្រាស់ចាំបាច់ប្រចាំថ្ងៃ តាមពុទ្ធប្បញ្ញត្តិ ក្នុងព្រះវិន័យបិដក អំពីអដ្ឋបរិក្ខារ គឺគ្រឿងប្រើប្រាស់ទាំង៨យ៉ាង ដែលភិក្ខុគ្រប់ព្រះអង្គត្រូវតែមាន និងរក្សាទុកឱ្យបានគ្រប់គ្រាន់ ក្នុងការប្រតិបត្តិធម៌ប្រចាំថ្ងៃ ។
បើតាមអាជ្ញាធរជាតិអប្សរា លោកវង្ស សាវុទ្ធី អ្នកស្រាវជ្រាវនៃនាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ បានបង្ហាញថា គ្រឿងបរិក្ខារ សំខាន់ៗរបស់ព្រះសង្ឃដែលដាក់តាំងបង្ហាញកាលពីពេល ថ្មីៗកន្លងមកនេះ មានអដ្ឋបរិក្ខារទាំង៨យ៉ាងតាមពុទ្ធប្បញ្ញត្តិ និងបរិក្ខារចោឡៈ ឬបរិក្ខាររាយរង ដែលជាបរិក្ខារចាំបាច់ផ្សេងទៀត សម្រួលដល់ការគង់នៅប្រចាំថ្ងៃរបស់ព្រះសង្ឃ ។
អដ្ឋបរិក្ខារទាំង៨យ៉ាងនោះមានដូចជា៖ សង្ឃាដី ចីវរ ឬឧត្តរាសង្គ ស្បង់ ឬអន្តរវាសកៈ បាត្រ កាំបិតកោររួមបញ្ចូលទាំងស្រោម និងថ្មសំលៀង ម្ជុលរួមបញ្ចូលទាំងអំបោះ និងបំពង់ម្ជុល កាយពន្ធន ឬវត្ថពន្ធចង្កេះ និងធម្មក្រក (តម្រងទឹក) ។
នៅមានបរិក្ខារចោឡៈ ឬបរិក្ខាររាយរងរួមមានដូចជា៖ សាដក ឬសំពត់ងូត វត្ថពន្ធទ្រូង ឬឧរពន្ធន ថង់ អង្ស័ក ផ្លិត មុងធុតង្គ ឆត្រ ឧបាហន (ស្បែកជើង) ជាដើម ។ បរិក្ខាររាយរងនេះមានក៏បានអត់ក៏បាន ព្រោះពុំមានក្នុងពុទ្ធប្បញ្ញត្តិនោះទេ ។
លោក លោកវង្ស សាវុទ្ធី បញ្ជាក់ថា គោលបំណងនៃការស្រាវជ្រាវនឹងតាំងបង្ហាញនេះគឺដើម្បីឲ្យសិស្សនិស្សិត និងសាធារណជនបានស្គាល់ និងឈ្វេងយល់អំពីសង្ឃបរិក្ខារ ដែលមានលក្ខណៈត្រឹមត្រូវតាមព្រះវិន័យ ព្រោះថាគ្រឿងបរិក្ខារខ្លះ មានតែក្នុងព្រះវិន័យទេ ពុំមានប្រើប្រាស់ទៀតឡើយ ដោយសារបរិបទគង់នៅរបស់ព្រះសង្ឃសព្វថ្ងៃ សម្បូរបែបផង ។
លោកភួយ សាវឿត អនុប្រធានការិយាល័យសារមន្ទីរ និងបទដ្ឋានបេតិកភណ្ឌ ក៏បានលើកឡើងថា សារមន្ទីរព្រះនរោត្តមសីហនុ-អង្គរ តែងតែយកចិត្តទុកដាក់ថែរក្សាអភិរក្ស បុរាណវត្ថុ និងរៀបចំតាំងពិព័រណ៍បង្ហាញរាល់សមិទ្ធផលប្រវត្តិសាស្ត្រនានា ដែលទទួលបានពីការសិក្សាកំណាយស្រាវជ្រាវ ក្នុងគោលបំណងចង់បង្ហាញដល់សាធារណជនទូទៅ មកសិក្សាឈ្វេងយល់ ។
សារមន្ទីរព្រះនរោត្តមសីហនុ-អង្គរ ស្ថិតនៅក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប ៕
ចែករំលែកព័តមាននេះ