កម្ពុជាលើកកម្ពស់សន្តិសុខតំបន់ និងអន្តរជាតិ! គណៈប្រតិភូក្រសួងការពារជាតិ កំពុងចូលរួមកិច្ចប្រជុំរដ្ឋមន្ត្រីការពារជាតិអាស៊ាន-បូក (ADMM-Plus) លើកទី២ នៅប្រទេសហ្វីលីពីន ។
ជាក់ស្តែងក្រសួងការពារជាតិ បានប្រកាសនាយប់ថ្ងៃទី២៩ ខែតុលា ឆ្នាំ២០២៦ថា ៖ ឯកឧត្តម ឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការក្រសួងការពារជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញដឹកនាំគណៈប្រតិភូក្រសួងការពារជាតិ ចូលរួមកិច្ចប្រជុំថ្ងៃទី២ នៃកិច្ចប្រជុំរដ្ឋមន្ត្រីការពារជាតិអាស៊ាន-បូក (ADMM-Plus) ដែលប្រព្រឹត្តទៅនៅមជ្ឈមណ្ឌលសន្និបាតម៉ាក់តាន នៃសាធារណរដ្ឋហ្វីលីពីន ដោយមានការអញ្ជើញចូលរួមពីសំណាក់រដ្ឋមន្ត្រីការពារជាតិ និងប្រធានប្រតិភូតំណាងនៃបណ្តាប្រទេសសមាជិកអាស៊ានទាំង១១ប្រទេស និងប្រទេសបូកចំនួន៨ គឺ ៖ អូស្ត្រាលី ចិន ឥណ្ឌា ជប៉ុន នូវែលសេឡង់ សាធារណរដ្ឋកូរ៉េ សហព័ន្ធរុស្ស៊ី និងសហរដ្ឋអាម៉េរិក ។
ក្នុងឱកាសនៃកិច្ចប្រជុំនេះ ឯកឧត្តម រដ្ឋលេខាធិការ ក៏បានថ្លែងបទអន្តរាគមន៍ក្នុងរបៀបវារៈស្តីពីការផ្លាស់ប្តូរទស្សនៈលើបញ្ហាសន្តិសុខអន្តរជាតិ និងតំបន់ ក្នុងនាមតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ៕
ចែករំលែកព័តមាននេះ