ទីក្រុងយេរូសាឡឹម៖ នាយករដ្ឋមន្ត្រីអុីស្រាអែល លោកណឺតាន់យ៉ាហ៊ូ នឹងកាន់តំណែងជានាយករដ្ឋមន្ត្រីចាំផ្ទះបន្ទាប់ពីលទ្ធផលឆ្នោតបង្ហាញថាលោកទទួលបានសំឡេងគាំទ្រយ៉ាងខ្លាំងក្លានៅក្នុងចំណោមជនជាតិជ្វីប។ មានលទ្ធភាពតិចតួចប៉ុណ្ណោះដែលគូប្រជែងរបស់លោកអាចនឹងដណ្ដើមតំណែងពីលោកទោះបីសម្ព័ន្ធភាពគណបក្សស្ដាំនិយមរបស់លោកមិនអាចទទួលបានសំឡេងភាគច្រើនដាច់ខាតដើម្បីបង្កើតរដ្ឋាភិបាលម្នាក់ឯងក៏ដោយ។
ពលរដ្ឋអុីស្រាអែលជិត៨៦%ចេញទៅបោះឆ្នោតកាលពីម្សិលមិញ។ យោងតាមការបូកសរុបតួលេខរបស់ប្រព័ន្ធផ្សព្វផ្សាយធំៗចំនួនបីនៅអុីស្រាអែល សម្ព័ន្ធភាពគណបក្សរបស់លោកណឺតាន់យ៉ាហ៊ូអាចនឹងទទួលបាន៥៣អាសនៈនៅក្នុងរដ្ឋសភាដែលអាសនៈសរុបចំនួន១២០។ ចំណែកក្រុមសម្ព័ន្ធភាពគណបក្សគូប្រជែងរបស់លោកអាចនឹងទទួលបាន៤៨អាសនៈ។ គណបក្សអុីស្រាអែលនិយមអារ៉ាប់អាចទទួលបាន១៩អាសនៈ។ ដូច្នេះ សម្ព័ន្ធភាពគណបក្សរបស់លោកអៃសិនខូត (Eisenkot) ដែលជាគូប្រជែងរបស់លោកណឺតាន់យ៉ាហ៊ូនោះមានឱកាសតិចតួចណាស់ក្នុងការឈោងចាប់យកអំណាច។
ទោះជាយ៉ាងណាក្ដី លទ្ធផលឆ្នោតអាចនឹងប្រែប្រួលព្រោះសន្លឹកឆ្នោតកំពុងតែរាប់មិនទាន់ចប់សព្វគ្រប់នៅឡើយទេ។ កិច្ចការបន្ទាប់គឺការចរចាគ្នាដើម្បីស្វែងរកសំឡេងភាគច្រើនដាច់ខាតបង្កើតរដ្ឋាភិបាល។ ដូច្នេះ នៅអំឡុងពេលនេះ លោកណឺតាន់យ៉ាហ៊ូនឹងបន្តធ្វើជានាយករដ្ឋមន្ត្រីចាំផ្ទះ ហើយក៏អាចនឹងបន្តធ្វើជានាយករដ្ឋមន្ត្រីពេញសិទ្ធិរហូតដល់មានការបោះឆ្នោតអាណត្តិថ្មីផងដែរ។ ទោះបីរដ្ឋាភិបាលចាំផ្ទះមិនមានសិទ្ធិពេញលេញក្នុងការសម្រេចកិច្ចការសំខាន់ៗយ៉ាងណាក្ដី ប៉ុន្តែពួកគេនៅតែមានអំណាចគ្រប់គ្រាន់ដើម្បីសម្រេចកិច្ចការនៅចំពោះមុខរួមទាំងបញ្ហាពាក់ព័ន្ធនឹងសង្គ្រាមអុីរ៉ង់ផងដែរ។
លោកហ្កាយ លូរី (Guy Lurie) ជាអ្នកស្រាវជ្រាវនៅ «វិទ្យាស្ថានប្រជាធិបតេយ្យអុីស្រាអែល» ថ្លែងថារដ្ឋាភិបាលចាំផ្ទះនៅតែមានអំណាចជាផ្លូវការដូចរដ្ឋាភិបាលពេញសិទ្ធិដែរ។ គ្រាន់តែថារដ្ឋាភិបាលនេះមិនមានសិទ្ធិសម្រេចកិច្ចការខ្លះតែប៉ុណ្ណោះ។ លោកណឺតាន់យ៉ាហ៊ូថ្លែងទៅកាន់ក្រុមអ្នកគាំទ្រនៅទីស្នាក់ការរបស់គណបក្សលីឃុត (Likud) កាលពីម៉ោង៣ទៀបភ្លឺ និងប្រកាសត្រៀមបង្កើតរដ្ឋាភិបាលស្ដាំនិយមបែបជាតិនិយម។ លោកបានរំលេចឱ្យឃើញនូវជោគជ័យផ្នែកយោធារបស់អុីស្រាអែលកាលពីពេលកន្លងមក ហើយក៏ប្រកាសថាអាចនឹងមានចំណាត់ការយោធាប្រឆាំងអុីរ៉ង់ដោយរួមសហការជាមួយអាមេរិក៕ ប្រភព៖ Reuters
ចែករំលែកព័តមាននេះ