ទីក្រុងសេអ៊ូល៖ ថ្ងៃនេះរដ្ឋអាជ្ញាកូរ៉េខាងត្បូងស្នើសុំឱ្យតុលាការផ្ដន្ទាទោសប្រហារជីវិតអតីតប្រធានាធិបតីកូរ៉េខាងត្បូង លោកយូនស៊ុកយូល ដែលជាមេគំនិតធំជាងគេនៅក្នុងការដាក់ប្រទេសនៅក្នុងគ្រាអាសន្ន និងប្រកាសច្បាប់អាជ្ញាសឹកកាលពីចុងឆ្នាំ២០២៤។ បន្ទាប់ពីតុលាការសាលាដំបូងសម្រេចផ្ដន្ទាទោសលោកយូនស៊ុកយូលដាក់ពន្ធនាគារអស់មួយជីវិតកាលពីខែកុម្ភៈ លោកក៏បានដាក់ពាក្យប្ដឹងជំទាស់ទៅសាលាឧទ្ធរណ៍។
សម្រាប់ពេលនេះ សាលាឧទ្ធរណ៍មិនទាន់កំណត់កាលបរិច្ឆេទជាក់លាក់នៅឡើយទេដើម្បីប្រកាសសេចក្ដីសម្រេចពាក់ព័ន្ធនឹងការប្ដឹងជំទាស់នោះ។ តុលាការរកឃើញថាលោកយូនបានចល័តកងទ័ព និងនគរបាលទាំងខុសច្បាប់ដើម្បីចូលគ្រប់គ្រងរដ្ឋសភា ព្រមទាំងបានចាប់ខ្លួនក្រុមអ្នកនយោបាយប្រឆាំង និងដាក់ចេញនូវការគ្រប់គ្រងផ្ដាច់មុខដោយគ្មានការត្រួតពិនិត្យអស់រយៈពេលវែងគួរសម។
ក្រុមអ្នកស៊ើបអង្កេតដែលដឹកនាំដោយបេសកជនពិសេស លោកឆូអ៊ឺនស៊ុក (Cho Eun-suk) ក៏ដាក់ពាក្យប្ដឹងជំទាស់នឹងសេចក្ដីសម្រេចរបស់តុលាការសាលាដំបូងផងដែរដោយចាត់ទុកថាទោសជាប់គុកមួយជីវិតគឺនៅស្ទើរណាស់ គួរតែកាត់ទោសប្រហារជីវិតទើបស័ក្ដិសមនឹងទង្វើរបស់អតីតប្រធានាធិបតីរូបនេះ។ ក្រុមអ្នកស៊ើបអង្កេតលើកទឡ្ហីករណ៍ថាទង្វើរបស់គាត់បង្កការគំរាមកំហែងធ្ងន់ធ្ងរចំពោះលទ្ធិប្រជាធិបតេយ្យរបស់ប្រទេសជាតិ។ តាមមើលទៅ ការផ្ដន្ទាទោសប្រហារជីវិតប្រហែលជាមិនអាចទៅរួចទេ។
ចាប់តាំងពីឆ្នាំ១៩៩៧មក កូរ៉េខាងត្បូងពុំដែលប្រហារជីវិតទណ្ឌិតណាម្នាក់ឡើយ។ ហេតុនេះ វាប្រៀបដូចជាការចង់បានរបស់មតិមហាជនដែលស្នើសុំឱ្យលុបចោលទោសនេះ។ នៅក្នុងអង្គសវនាការ ក្រុមរបស់លោកឆូថ្លែងថាទោសប្រហារជីវិតគឺស័ក្ដិសមបំផុតដើម្បីឱ្យលោកយូនស៊ុកយូលទទួលខុសត្រូវទាំងស្រុងចំពោះទង្វើរបស់គាត់ដែលដឹកនាំចលនាបះបោរ។ ក្រុមនេះលើកទឡ្ហីករណ៍ថាការដែលប្រទេសជាតិពុំដែលកាត់ទោសប្រហារជីវិតអស់ជាច្រើនឆ្នាំកន្លងទៅនេះមិនមែនមានន័យថាកាត់ទោសប្រហារជីវិតលោកយូនស៊ុកយូលមិនបាននោះទេ៕ ប្រភព៖ AP
ចែករំលែកព័តមាននេះ