អាសូរណាស់! ទៅទទួលប្រពន្ធចេញពីធ្វើការ ជួបគ្រោះអកុសលត្រូវរថយន្តបុ.កស្លា.ប់
- ភ្នំពេញ
រាជធានីភ្នំពេញ ៖ បុរសម្នាក់បានត្រូវរថយន្តបុកស្លាប់ នៅពេលទៅទទួលប្រពន្ធចេញពីធ្វើការ ហើយអ្នកបើកបររថយន្តបានព្យាយាមបើករត់ តែត្រូវបានអ្នកឃើញហេតុការណ៍រាយការណ៍ជូនសមត្ថកិច្ច ពេលម្ចាស់រថយន្តឈប់ហើយដោះផ្លាកលេខចេញរួចគេចខ្លួន ។ ហេតុការណ៍នេះ កើតឡើងកាលពីវេលាម៉ោងប្រមាណ១២អធ្រាត្រថ្ងៃទី២៨ ខែតុលា ឆ្នាំ២០២៦ នៅតាមផ្លូវបេតុងថ្មី ក្នុងសង្កាត់បាក់ខែង ខណ្ឌជ្រោយចង្វា ។
ប្រភពព័ត៌មានពីអ្នកស្គាល់ជនរងគ្រោះបានឲ្យដឹងថា មុនពេលកើតហេតុ បុរសរងគ្រោះ បានជិះម៉ូតូទៅយកប្រពន្ធរបស់ខ្លួនដែលធ្វើការនៅរោងចក្រថែមម៉ោងរហូតដល់យប់ជ្រៅ ។
គាត់បើកម៉ូតូម៉ាកស៊ុយហ្ស៊ុយគី ណិច ពណ៌ទឹកក្រូច ពាក់ផ្លាកលេខ កែប ១B-៦៣៧៨ ឯប្រពន្ធក៏ជិះម៉ូតូដែរ តែដោយសារផ្លូវស្ងាត់ គាត់ត្រូវជិះកំដរប្រពន្ធទៅផ្ទះ ដោយគាត់ជិះខាងមុខ ឯប្រពន្ធជិះតាមក្រោយ ។
នៅពេលជិះម៉ូតូបណ្តើរប្រពន្ធមកដល់ចំណុចខាងលើ ស្រាប់តែមានរថយន្ត១គ្រឿង ម៉ាករ៉េង រ៉ូវើរ ពាក់ផ្លាកលេខ កម្ពុជា JJ.CHING ក្នុងដំណើរបញ្ច្រាសទិសគ្នា ហើយរេចង្កូតចូលគន្លងខាងម៉ូតូ ក៏បានបុកម៉ូតូទាំង២គ្រឿង បណ្តាលឲ្យប្តីខ្ទាតចូលគុម្ពស្មៅស្លាប់ភ្លាម ចំណែកម៉ូតូត្រូវបានអូសជាច្រើនម៉ែត្រ ។
ដោយឡែក ខាងរថយន្តមិនបានឈប់ដោះស្រាយទេ បែរជាព្យាយាមបើកគេចចេញពីកន្លែងកើតហេតុ ទាំងបែកកង់និងខូចខាតមួយកំណាត់មុខខាងឆ្វេង ចាប់ពីផ្លូវបេតុងថ្មី ឆ្ពោះទៅកាន់ផ្លូវជាតិលេខ៦ ហួសស្ពានទី៧ ដល់មុខផ្ទះមួយ ។ ដោយឃើញទីនោះស្ងាត់ ក៏ឈប់រថយន្ត បម្រុងដូយដើម្បីដូរកង់ តែត្រូវបានអ្នករស់នៅម្ដុំនោះឃើញទាន់ ក៏រាយការណ៍ជូនសមត្ថកិច្ច ព្រោះខ្លាចភាគីខាងរថយន្តបកផ្លាកលេខចេញហើយរត់គេចខ្លួនបាត់ ។
ចំណែកអ្នករស់នៅចំណុចខាងលើនិយាយថាផ្លាកលេខរថយន្តនេះជារបស់ CEO ស្រី្តម្នាក់ជាអ្នកលក់ផលិតផលតាមអនឡាញល្បីឈ្មោះម្នាក់ក្នុងបណ្តាញសង្គមមួយដែរ ។ អ្នកឃើញហេតុការណ៍ក៏និយាយដែរថា អ្នកបើកបររថយន្តដែលព្យាយាមរត់គេចចេញពីកន្លែងកើតហេតុនោះជាមនុស្សស្រី ។
ក្រោយកើតហេតុ ទាំងរថយន្តនិងម៉ូតូត្រូវបានសមត្ថកិច្ចយកទៅរក្សាទុកជាបណ្ដោះអាសន្ននៅការិយាល័យនគរបាលចរាចរណ៍ផ្លូវគោក រាជធានីភ្នំពេញ ដើម្បីឲ្យម្ចាស់រថយន្តចូលខ្លួនទៅដោះស្រាយតាមច្បាប់នៅពេលក្រោយ ។ ចំណែកសពជនរងគ្រោះ ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ