ប្រទេសឥណ្ឌា ៖ តាមទីភ្នាក់ងារឧតុនិយមជាតិឥណ្ឌាថា អាជ្ញាធរឥណ្ឌាបានចេញបញ្ជា កាលពីថ្ងៃទី២៧ តុលា ឲ្យជម្លៀសមនុស្សចេញជិត១០០.០០០នាក់ ក្នុងរដ្ឋជាប់ឆ្នេរសមុទ្រអានដ្រាប្រាដេស និងរដ្ឋអូឌីសាភាគខាងកើតប្រទេសពេលដែលព្យុះ
ស៊ីក្លូនខ្លាំងមួយបោកបក់មកដល់ នាព្រឹកថ្ងៃទី២៨ តុលា ។
អាជ្ញាធរស្រីលង្ការ និងនេប៉ាល់ ជាប្រទេស២នៅជាប់ជិតខាងឥណ្ឌា ក៏ចេញការប្រកាសអាសន្នពីព្យុះនេះដែរ ។ ព្យុះសីក្លូនឈ្មោះ ARNAB នោះ បោកបក់លើតំបន់ឆ្នេរសមុទ្រនៃរដ្ឋអានដ្រាប្រាដេស នាព្រឹកថ្ងៃទី២៨ តុលា ជាមួយខ្យល់បោកបក់ដ៏ខ្លាំងក្នុងល្បឿន១៥០គីឡូម៉ែត្រក្នុង១ម៉ោង អមជាមួយភ្លៀងធ្លាក់ខ្លាំងលើទីក្រុងកំពង់ផែកាគីណាដា រដ្ឋអានដ្រាប្រាដេស ខណៈរលកធំៗបោកលើមាត់ច្រាំង ។
តាមបណ្ដាសារព័ត៌មានឥណ្ឌាថា មនុស្សប្រមាណជា៥០.០០០នាក់ ត្រូវបានជម្លៀសចេញនៅរដ្ឋអានដ្រាប្រាដេស និង៤៨.០០០នាក់ នៅរដ្ឋអូឌីសា ។ បណ្ដាទីភ្នាក់ងារសង្គ្រោះមកទល់ពេលនេះ នៅមិនទាន់ផ្សាយពីការវាយតម្លៃណាមួយពីការខូចខាតនៅឡើយ ក្នុងពេលភ្លាមៗ ។ ដើមឈើជាច្រើនត្រូវរលំបាក់ហើយផ្ទះតូចៗក៏ត្រូវខ្យល់បោកបក់ប៉ើងអស់ដែរ ។ ចំណែកផ្លូវជាច្រើន ត្រូវទឹកជន់លិច បណ្ដាបង្គោលភ្លើងដួលរលំហើយដំណាំដាំដុះជាច្រើនរងការបំផ្លាញ។ នៅភាគខាងត្បូងឥណ្ឌាកងទាហានត្រូវបានកេណ្ឌប្រមូល ហើយបណ្ដាសាលារៀនត្រូវបិទ នាថ្ងៃទី២៧ តុលា នៅស្រីលង្កាជិតខាង ។ អាជ្ញាធរស្រីលង្កាបានព្រមានពីគ្រោះថ្នាក់នៃទឹកជំនន់និងការបាក់ដី ។
ចំណែកអាជ្ញាធរនេប៉ាល់វិញ ក៏ចេញការប្រកាសអាសន្នដែរនាថ្ងៃទី២៧ តុលា ដោយព្រមានថា ព្យុះ ARNAB ត្រូវបោកបក់មកក្នុងប្រទេសសំដៅទៅជួរភ្នំហ៊ឺម៉ាឡៃយ៉ា ប្រហែលនាពេលយប់ថ្ងៃទី២៩ ទៅ ៣០តុលា ។ ព្យុះនោះ អមដោយភ្លៀងធ្លាក់យ៉ាងខ្លាំងដែលនឹងនាំឲ្យមានគ្រោះថ្នាក់ខ្ពស់នៃការបាកផ្ទាំងទឹកកក និងព្យុះព្រិល ។
បណ្ដាអ្នកទេសចរត្រូវបានស្នើឲ្យចៀសវាងកុំទៅកាន់ភ្នំខ្ពស់ៗ ហើយបណ្ដាអ្នកទៅដល់ទីនោះស្រាប់ ត្រូវមកកាន់កន្លែងដែលអាចមានសុវត្តិភាព។ ប្រទេសនេប៉ាល់ ទើបជួបប្រទះកាលពីថ្ងៃទី២៦ សីហា នូវទឹកជំនន់ដ៏អាក្រក់បំផុតមួយ ដោយសារការបាក់ផ្ទាំងទឹកកក និងបាក់ចង្កេះភ្នំ បណ្ដាលឲ្យមនុស្សស្លាប់ដល់ទៅជាង១៤០០នាក់ និងជាង៥០០០នាក់បាត់ខ្លួន ៕
ចែករំលែកព័តមាននេះ