សហរដ្ឋអាមេរិក ៖ យោធាសហរដ្ឋអាមេរិកបានចំណាយប្រាក់អស់ជាង ៤៧ ពាន់លានដុល្លារអាមេរិករហូតមកទល់ពេលនេះ ដើម្បីបន្តធ្វើសង្គ្រាមនៅអ៊ីរ៉ង់ ដែលខ្ពស់ជាងការវាយតម្លៃក្នុងខែកក្កដារបស់ក្រសួងការពារជាតិអាមេរិកជាង ២៥%។ នេះបើការចេញផ្សាយពីទីភ្នាក់ងារសារព័ត៌មាន Reuters ផ្អែកតាមទិន្នន័យដែលទទួលបានពីមន្ទីរបញ្ចកោណ។
ទោះយ៉ាងណាក៏ដោយ ក្រសួងការពារជាតិអាមេរិកមិនទាន់បានឆ្លើយតបជាបន្ទាន់ចំពោះសំណើសុំការអត្ថាធិប្បាយលើការវាយតម្លៃរបស់ខ្លួន ដែលមិនទាន់ត្រូវបានចេញផ្សាយជាសាធារណៈនោះទេ។ ការបញ្ចេញព័ត៌មានពីការកើនឡើងការចំណាយនៃសង្គ្រាមអ៊ីរ៉ង់នេះកើតឡើង ខណៈគណបក្សសាធារណរដ្ឋកំពុងប្រឈមមុខនឹងផលវិបាកនយោបាយ នៃសង្គ្រាមដែលមិនសូវទទួលបានការគាំទ្រមួយនេះ មុនពេលការបោះឆ្នោតថ្ងៃទី៣ ខែវិច្ឆិកា ដែលនឹងកំណត់លើការគ្រប់គ្រងស្ថាប័នសភារបស់បក្សសាធារណរដ្ឋ និងបក្សប្រជាធិបតេយ្យ សម្រាប់រយៈពេលពីរឆ្នាំខាងមុខ។
ការវាយតម្លៃចុងក្រោយបង្អស់របស់មន្ទីរបញ្ចកោណនេះ ត្រូវបានគេប្រៀបធៀបនឹងការវាយតម្លៃកាលពីខែកក្កដារបស់រដ្ឋមន្ត្រីការពារជាតិ លោក Pete Hegseth ដែលថា ថ្លៃចំណាយលើសង្គ្រាមនៅអ៊ីរ៉ង់មានចំនួន ៣៧,៥ ពាន់លានដុល្លារអាមេរិក។
ខណៈពេលដែលតួលេខទាំងនោះរួមបញ្ចូលទាំងថ្លៃចំណាយលើប្រតិបត្តិការជាច្រើន រាប់ ចាប់តាំងពីប្រតិបត្តិការហោះហើររហូតដល់ការគាំទ្រផ្នែកប្រព័ន្ធឌីជីថលផ្សេងៗ ក៏ដោយ ក៏ការវាយតម្លៃសង្គ្រាមនៅអ៊ីរ៉ង់របស់យោធាសហរដ្ឋអាមេរិក មិនបានគិតឱ្យច្បាស់លាស់អំពីការចំណាយដ៏មហាសាលដែលរំពឹងទុក ដើម្បីជួសជុលការខូចខាតដល់មូលដ្ឋានទ័ពអាមេរិក ដែលរងការវាយប្រហារដោយមីស៊ីល និងដ្រូនអ៊ីរ៉ង់នោះទេ៕
ចែករំលែកព័តមាននេះ