ទីក្រុងសេអ៊ូល៖ ក្រុមអ្នកទេសចរដែលចុះទៅដល់ក្បែរតំបន់គ្មានកងទ័ពទល់មុខទឹកដីកូរ៉េខាងជើងថ្លែងថាពួកគេឃើញកាណុងកាំភ្លើងធំរបស់កូរ៉េខាងជើងតម្រង់មករកទឹកដីកូរ៉េខាងត្បូង។ នេះជារឿងដែលគួរឱ្យព្រួយបារម្ភ ខណៈដែលភាពតានតឹងរវាងប្រទេសបងប្អូនគូសត្រូវទាំង២ចាប់ផ្ដើមឡើងកម្ដៅជាថ្មី។ ចាប់តាំងពីខែកញ្ញា ប្រទេសទាំង២ចាប់ផ្ដើមនិយាយវាយប្រហារគ្នាទៅវិញទៅមក និងពង្រឹងប៉ុស្តិ៍យាមនៅតាមបណ្ដោយតំបន់គ្មានកងទ័ព។ ពោលគឺបន្ទាប់ពីមានករណីផ្ទុះគ្រាប់មីនបណ្ដាលឱ្យរបួសទាហានកូរ៉េខាងត្បូងបីនាក់។
កូរ៉េខាងត្បូងទាមទារឱ្យរបបក្រុងព្យុងយ៉ាងសូមទោសចំពោះរឿងនេះ។ ប៉ុន្តែកូរ៉េខាងជើងអះអាងថានោះជាការប្រឌិតរបស់កូរ៉េខាងត្បូងពាក់ព័ន្ធនឹងឧបទ្ទវហេតុផ្ទុះគ្រាប់មីន។ លោកស្រីគីមយូជុងដែលជាប្អូនស្រីលោកគីមជុងអ៊ុន និងជាស្ត្រីមានឥទ្ធិពលជាងគេនៅកូរ៉េខាងជើងថ្លែងកាលពីថ្ងៃព្រហស្បតិ៍សប្ដាហ៍មុនថារដ្ឋាភិបាលរបស់លោកស្រីនឹងដំឡើងឧបករណ៍បំពងសំឡេងឮខ្លាំងៗដើម្បីលប់ពីលើសំឡេងឃោសនារបស់កូរ៉េខាងត្បូងដែលប្រឆាំងនឹងរបបក្រុងព្យុងយ៉ាង។ កាលពីថ្ងៃសុក្រ សារព័ត៌មានកូរ៉េខាងត្បូងថតជាប់រថពាសដែកមួយគ្រឿងបានយ៉ាងច្បាស់នៅក្បែរព្រំដែន។ គិតត្រឹមថ្ងៃចន្ទសប្ដាហ៍នេះ មានរថពាសដែករហូតដល់ទៅបីគ្រឿងដែលមានកាណុងកាំភ្លើងតម្រង់ទៅរកទឹកដីកូរ៉េខាងត្បូង។
កាលពីពេលកន្លងមក គេធ្លាប់មើលឃើញតែនៅលើកញ្ចក់ទូរទស្សន៍ប៉ុណ្ណោះដែលបង្ហាញរូបកូរ៉េខាងជើងដាក់ពង្រាយកាំភ្លើងធំ១២២មិល្លីម៉ែត្រ។ ប៉ុន្តែនៅពេលមើលឃើញហេតុការណ៍នេះផ្ទាល់ភ្នែកធ្វើឱ្យគេស្រមៃគិតថាគ្រោះថ្នាក់កាន់តែមានសភាពធំធេង។ ខាងលើនេះជាការថ្លែងរបស់លោកចាងជីលសឹង (Jang Gil-seong) ជាអតីតយុទ្ធជនវ័យ៨៣ឆ្នាំដែលធ្លាប់ប្រឡូកនៅក្នុងសង្គ្រាមវៀតណាម។ លោកថ្លែងដូចខាងលើនេះនៅឯទីតាំងមានកែវយឹតអាចឆ្លុះមើលទិដ្ឋភាពនៅលើទឹកដីកូរ៉េខាងជើង។ លោកកំពុងព្រួយបារម្ភថាតើកូរ៉េខាងត្បូងត្រូវធ្វើអ្វីជាបន្តទៀតដើម្បីត្រៀមទប់ទល់ និងឆ្លើយតបទៅនឹងការគំរាមកំហែងនេះ។
តំបន់គ្មានកងទ័ពនៅតែជាស្នាមគំនូសហាមឆ្លងកាត់សម្រាប់អ្នកទេសចរជាតិ និងអន្តរជាតិ។ អ្នកទេសចរម្នាក់ឈ្មោះហាន់ណា រ៉ូបប៊ីន (Hannah Robbins) អាយុ២៨ឆ្នាំមកពីប្រទេសកាណាដាថ្លែងថាក្រុមទេសចររបស់អ្នកស្រីមុនដំបូងមិនសូវចាប់អារម្មណ៍ថាមានកាំភ្លើងធំនៅក្បែរនោះទេ។ លុះពេលមគ្គុទ្ទេសក៍ទេសចរបង្ហាញប្រាប់ពួកយើង ទើបយើងភ្ញាក់ខ្លួនព្រើតតែម្ដង។ នៅពេលបានឃើញផ្ទាល់ភ្នែកបែបនេះគួរឱ្យភ័យខ្លាចណាស់។ ក្រុមអ្នកវិភាគកំណត់មុខសញ្ញាថានោះជាកាំភ្លើងធំម៉ាក M-1981 ទំហំអង្កត់ផ្ចិត១២២មិល្លីម៉ែត្រ ដែលជាកាំភ្លើងធំស៊េរីចាស់របស់កូរ៉េខាងជើងដាក់ឱ្យប្រើប្រាស់តាំងពីអំឡុងទសវត្សរ៍ទី៧០។ កាំភ្លើងនេះអាចបាញ់បានចម្ងាយអតិបរមា២៤គីឡូម៉ែត្រ៕ ប្រភព៖ Reuters
ចែករំលែកព័តមាននេះ