រាជធានីភ្នំពេញ ៖ ជនសង្ស័យ២នាក់ ត្រូវបានកម្លាំងនគរបាលព្រហ្មទណ្ឌ ខណ្ឌសែនសុខ សហការជាមួយកម្លាំងការិយាល័យព្រហ្មទណ្ឌកំរិតស្រាល ស្រាវជាវឃាត់ខ្លួនបានជាបន្តបន្ទាប់ បន្ទាប់ពីធ្វើសកម្មភាពឆក់យកទូរសព្ទដៃ ០១គ្រឿង ម៉ាកអាយហ្វូន១៧ ប្រូមេក រួចគេចខ្លួនបានតែ២ថ្ងៃ ។
ជនសង្ស័យរូបនោះ ៖ ១.ឈ្មោះ ឈូក សុខឆេង ភេទប្រុស អាយុ២៩ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅបន្ទប់ជួល ផ្លូវបេតុង ភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ មានសារធាតុញៀន និង២.ឈ្មោះ រៀម បញ្ញា ភេទប្រុស អាយុ២៦ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅផ្ទះគ្មានលេខ ផ្លូវបេតុង ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញមានសារធាតុញៀន ។
តាមនគរបាលខណ្ឌសែនសុខ បានអោយដឹងថា ជនសង្ស័យទាំង២នាក់ ត្រូវបានកម្លាំងនគរបាលព្រហ្មទណ្ឌខណ្ឌសែនសុខ ដឹកនាំបញ្ជាកម្លាំងផ្ទាល់ពីលោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានសហការណ៍ជាមួយកម្លាំងការិយាល័យព្រហ្មទណ្ឌកំរិតស្រាល ស្រាវជ្រាវឃាត់ខ្លួនជាបន្តបន្ទាប់ នៅថ្ងៃទី២៦ ខែតុលា ឆ្នាំ២០២៦ ដោយម្នាក់ឃាត់ខ្លួននៅផ្សាររន្ទះបាញ់ សង្កាត់ទន្លេបាសាក់ និងម្នាក់ទៀត ឃាត់ខ្លួននៅម្តុំវត្តទួលអស់លោក ក្នុងសង្កាត់គីឡូម៉ែត្រ៦ ខណ្ឌឬស្សីកែវ ពាក់ព័ន្ធលួចមានស្ថានទម្ងន់ទោស ឆក់យកទូរសព្ទដៃ០១គ្រឿង ម៉ាកអាយហ្វូន១៧ ប្រូមេក នៅចំណុចមុខក្លឹបវៃសី ផ្លូវ១៩៧០ កែងផ្លូវ១០១៥ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ កាលពីថ្ងៃទី២៤ ខែតុលា ឆ្នាំ២០២៦ វេលាម៉ោងប្រហែល០៧ និង១០នាទី និងអំពើប្រើប្រាស់ដោយខុសច្បាប់ នូវសារធាតុញៀន ។
តាមនគរបាលបានអោយដឹងទៀតថា នៅក្នុងសកម្មភាពជនសង្ស័យបានជិះម៉ូតូមួយគ្រឿង ធ្វើសកម្មភាពឆក់ទូរសព្ទរបស់ជនរងគ្រោះ ឈ្មោះ លីវ ធុច ភេទប្រុស អាយុ២៤ឆ្នាំ ជនជាតិខ្មែរ មុខរបរ លក់ដូរ ស្នាក់នៅបន្ទប់ជួល ផ្លូវ១៩៧០ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានសម្រេច រួចជិះម៉ូតូគេចខ្លួនបានតែ២ថ្ងៃ ត្រូវបានសមត្ថកិច្ចស្រាវជ្រាវឃាត់ខ្លួនជាបន្តបន្ទាប់តែម្តង ។
បច្ចុប្បន្ន ជនសង្ស័យ កំពុងឃាត់ខ្លួននៅអធិការដ្ឋានខណ្ឌសែនសុខ ដើម្បីកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ