រដ្ឋសភាចេញញត្តិថ្កោលទោសទង្វើខុសច្បាប់ក្បត់ឧត្តមគតិរាស្ត្រពួកក្រុមឧទ្ទាមក្រៅច្បាប់
- ភ្នំពេញ
រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជា ថ្កោលទោសដាច់អហង្ការបំផុតចំពោះសកម្មភាពរបស់ពួកឧទ្ទាមក្រៅច្បាប់ ដែលបានបង្កើតរដ្ឋសភាដោយខុសច្បាប់ កាលពីថ្ងៃទី២៥ ខែតុលា ឆ្នាំ២០២៦ នៅទីក្រុងប៉ារីស ។ អង្គការចាត់តាំងនេះ ជាស្ថាប័នខុសច្បាប់រំលោភរដ្ឋធម្មនុញ្ញ មិនស្របតាមរបបលទ្ធិប្រជាធិបតេយ្យ មិនគោរពឆន្ទៈរបស់ប្រជាពលរដ្ឋដែលបានបោះឆ្នោតជ្រើសតាំងតំណាងរាស្ត្រនីតិកាលទី៧ កាលពីថ្ងៃទី២៣ ខែកក្កដា ឆ្នាំ២០២៣ ដើម្បីបង្កើតរដ្ឋសភានៃព្រះរាជាណាចក្រកម្ពុជា ដែលជាស្ថាប័ននីតិបញ្ញត្តិ ស្របច្បាប់តែមួយគត់ តាមឆន្ទៈពិតប្រាកដរបស់ប្រជាពលរដ្ឋ និងគោលការណ៍លទ្ធិប្រជា ធិបតេយ្យ ។
អនុលោមតាមមាត្រា៥១ថ្មីនៃរដ្ឋធម្មនុញ្ញដែលចែងថា «ព្រះរាជាណាចក្រកម្ពុជាអនុវត្តនយោបាយ ប្រជាធិបតេយ្យសេរីពហុ បក្ស។ ប្រជាពលរដ្ឋខ្មែរជាម្ចាស់វាសនានៃប្រទេសជាតិរបស់ខ្លួន ។ អំណាចទាំងអស់ជារបស់ប្រជាពលរដ្ឋ។ ប្រជាពលរដ្ឋប្រើអំណាចរបស់ខ្លួនតាមរយៈរដ្ឋសភា ព្រឹទ្ធសភា រាជរដ្ឋាភិបាល និងសាលាជម្រះក្តី។»
រដ្ឋសភានៃព្រះរាជាណាចក្រកម្ពុជាថ្កោលទោសចំពោះចេតនាខ្មៅកង្វក់របស់ឧទ្ទាមក្រៅច្បាប់នៅក្រៅប្រទេស ដែលអំពើនេះគ្មានអ្វីក្រៅពីការបន្តមហិច្ឆតានយោបាយទុច្ចរិត ក្នុងការផ្តួលរំលំរាជរដ្ឋាភិបាល ដោយមិនអនុវត្តតាមលទ្ធិប្រជាធិបតេយ្យ តាមរយៈការញុះញង់ បំបែកបំបាក់ ការបោកបញ្ឆោត និងប្រជាភិថុត ដែលរំលោភគោលការណ៍រដ្ឋធម្មនុញ្ញនិងច្បាប់ជាធរមាន និងការពិតជាក់ស្តែងនៅកម្ពុជា ។
រដ្ឋសភានិងរាជរដ្ឋាភិបាលនៃព្រះរាជាណាចក្រកម្ពុជា ដែលបានបង្កើតឡើងតាមរយៈការបោះឆ្នោតដោយសេរី ត្រឹមត្រូវ និងយុត្តិធម៌ បាននិងកំពុងបំពេញតួនាទីរួមសុខរួមទុក្ខជាមួយប្រជាពលរដ្ឋ ដោយមានស្មារតី ទទួលខុសត្រូវខ្ពស់ ក្នុងការធានានិងការពារឱ្យបានជាដាច់ខាតនូវសុខសន្តិភាព ស្ថិរភាពសង្គម និង ការអភិវឌ្ឍប្រកបដោយចីរភាពនិងបរិយាបន្ន ជាពិសេស ធានាការពារឯករាជ្យ អធិបតេយ្យ បូរណភាព ទឹកដី យ៉ាងម៉ឺងម៉ាត់ ប្រឆាំងនឹងការឈ្លានពានយ៉ាងគឃ្លីនរបស់បរទេសមកលើកម្ពុជា ដោយប្រកាន់ខ្ជាប់ នូវគោលការណ៍សន្តិភាព ការដោះស្រាយជម្លោះដោយសន្តិវិធី ការគោរពច្បាប់អន្តរជាតិ និងយន្តការ ទ្វេភាគី ដែលមានស្រាប់ ដោយភាពអត់ធ្មត់និងបត់បែនតាមគោលការណ៍ «ស្ងាត់តែមិនស្ងៀម» ដោយ តម្កល់ផលប្រយោជន៍ប្រទេសជាតិនិងអាយុជីវិតប្រជាពលរដ្ឋជាអាទិភាព។
តាមរយៈកិច្ចសហប្រតិបត្តិការ ជាមួយបណ្តាប្រទេសជាមិត្តនិងដៃគូអន្តរជាតិនានា រាជរដ្ឋាភិបាលបានបើកប្រតិបត្តិការបង្ក្រាបការឆបោក តាមប្រព័ន្ធអនឡាញដោយជោគជ័យយ៉ាងត្រចះត្រចង់ ទទួលបានការទទួលស្គាល់និងការកោតសរសើរពី ស្ថាប័នអន្តរជាតិនានា។
រដ្ឋសភានៃព្រះរាជាណាចក្រកម្ពុជា សង្កេតឃើញថាខណៈដែលប្រជាពលរដ្ឋនៅទូទាំងប្រទេស កំពុងរួមសាមគ្គីគ្នាជាធ្លុងមួយជាមួយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិត ភាពស្វាហាប់ និងចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត និងទទួលបានលទ្ធផលដ៏ត្រចះត្រចង់ ប្រកបដោយមោទនភាពជាតិជាទីបំផុតនោះ ក្រុមឧទ្ទាមមានការភ័យខ្លាចនិងភាពភ័យស្លន់ស្លោកាន់តែខ្លាំង អំពីជោគវាសនានយោបាយរបស់ខ្លួន។
ញត្តិបានលើកឡើងថា ក្រុមឧទ្ទាមបាននិងកំពុងព្យាយាមបង្កើតចលនាបង្កអស្ថិរភាព បំបែកបំបាក់សាមគ្គីនិងឯកភាពជាតិ ដើម្បីតែផលប្រយោជន៍មហិច្ចតានយោបាយរបស់ខ្លួនដោយមិនខ្វល់ ពីសោដនាដកម្មទាំងអស់ដែលកើតមានឡើងដោយសារអំពើក្រៅច្បាប់របស់ខ្លួន។
អំពើឧទ្ទាមក្រៅច្បាប់នេះត្រូវបានថ្កោលទោសជាសាធារណៈ ហើយតួអង្គពាក់ព័ន្ធទាំងអស់នឹង ត្រូវផ្តន្ទាទោសតាមច្បាប់ជាធរមាននៃព្រះរាជាណាចក្រកម្ពុជា។ នាពេលខាងមុខ ចលនាឧទ្ទាមក្រៅច្បាប់ នេះនឹងត្រូវបរាជ័យយ៉ាងអាម៉ាសនិងរងនូវផលវិបាកយ៉ាងធ្ងន់ធ្ងរ សមដូចពាក្យបុរាណាចារ្យខ្មែរមួយឃ្លា ដែលចែងថា «អ្នកសាបព្រួសខ្យល់ តែងរងមកវិញនូវព្យុះសង្ឃរា»។
រដ្ឋសភានៃព្រះរាជាណាចក្រកម្ពុជា សូមអំពាវនាវដល់ប្រជាពលរដ្ឋនិងជនរួមជាតិទាំងអស់ ទាំងក្នុងនិងក្រៅប្រទេស ត្រូវលើកកម្ពស់ស្មារតីប្រុងប្រយ័ត្នខ្ពស់ ជៀសវាងការចាញ់ឧបាយកលដ៏ពិសពុល ខ្មៅកខ្វក់របស់ក្រុមឧទ្ទាមដែលតែងតែព្យាយាមផ្តួលរំលំរដ្ឋសភានិងរាជរដ្ឋាភិបាលស្របច្បាប់នៅកម្ពុជា។
រដ្ឋសភានៃព្រះរាជាណាចក្រកម្ពុជា សូមអំពាវនាវដល់ប្រជាពលរដ្ឋទាំងអស់ សូមបន្តរក្សា សាមគ្គីភាពនិងការជឿជាក់លើរាជរដ្ឋាភិបាល សភា និងថ្នាក់ដឹកនាំកំពូល ក្រោមការដឹកនាំរបស់សម្តេច អគ្គមហាសេនាបតីតេជោ ហ៊ុន សែន ប្រធានព្រឹទ្ធ សភានៃព្រះរាជាណាចក្រកម្ពុជា និងសម្តេចមហាបវរ ធិបតី ហ៊ុន ម៉ាណែត ដើម្បីបន្តដឹកនាំប្រទេសជាតិប្រកបដោយសុខសន្តិភាព វិបុលភាព និងកិត្យានុភាព លើឆាកអន្តរជាតិជានិច្ចនិរន្តរ៍៕
ចែករំលែកព័តមាននេះ