សង្គ្រាមអ៊ុយក្រែន ៖ អភិបាលក្រុងគៀវ លោកវីតាលីគ្លីតស្កូគូសបញ្ជាក់កាលពីថ្ងៃទី២៧ តុលា ថា ស្ពានមួយទៀតនាភាគខាងត្បូងរដ្ឋធានីអ៊ុយក្រែន រងការវាយប្រហាររបស់រុស្ស៊ី ។ នោះជាស្ពានដ៏សំខាន់មួយ សម្រាប់ការដឹកជញ្ជូននិងធ្វើដំណើរ។
ស្ពាន PIVDENNYI ដែលរងការវាយប្រហារនោះ នៅខាងលើមានហេដ្ឋារចនាសម្ព័ន្ធមេត្រូ ដែលរងការខូចខាត ។ តាមតេឡេក្រាម អភិបាលក្រុងគៀវថ្លែងថា ទីក្រុងនោះជាគោលដៅនៃការវាយប្រហារនាពេលយប់ដោយមីស៊ីលប្រមាណជា១០គ្រាប់។ មុននេះ រុស្ស៊ីបានវាយប្រហារស្ពាន២នៃក្រុងគៀវរួចហើយ គឺស្ពានខាងជើងនិងស្ពានខាងត្បូងបណ្ដាលឲ្យក្រុងគៀវស្ទះចរាចរណ៍យ៉ាងខ្លាំង ។
ម្យ៉ាងវិញទៀត រុស្ស៊ី និងអ៊ុយក្រែន បានព្រមព្រៀងលើបទឈប់បាញ់គ្នាមនុស្សធម៌នៅជុំវិញក្រុងOLECHKY ជាទីក្រុងមួយនាភាគខាងត្បូងអ៊ុយក្រែនកាន់កាប់ដោយរុស្ស៊ី ។ ភរិយាប្រធានាធិបតីអាមេរិក លោកស្រីមីឡានីញ៉ាត្រាំ ដែលជាអ្នកស្នើឲ្យមានបទឈប់បាញ់គ្នានោះដែលភាគីទាំង២ព្រមទទួលយកអះអាងថា បទឈប់បាញ់គ្នានោះចាប់ផ្ដើមពីព្រឹកថ្ងៃទី២៧ តុលា ទៅ។ ការផ្អាកប្រយុទ្ធគ្នានៅទីនោះ អាចឲ្យមានប្រតិបត្តិការមនុស្សធម៌ក្នុងមូលដ្ឋានដែលកំពុងស្ថិតនៅដាច់ពីគេនោះ ។ ប្រជាជនក្រុងនេះដែលជាប់ក្នុងរង្វង់នៃការប្រយុទ្ធគ្នា ចាប់តាំងពីច្រើនសប្ដាហ៍មកហើយ ខ្វះស្បៀង និងថ្នាំពេទ្យ។
តាមតេឡេក្រាមក្រសួងការពារប្រទេសរុស្ស៊ីប្រកាសថា ក្នុងក្របខណ្ឌនៃការរៀបចំប្រតិបត្តិការការមនុស្សធមក្នុងតំបន់OLECHKYជាទីក្រុងមួយនៃតំបន់ឃ័រសុន កងទ័ពរុស្ស៊ីឈប់បាញ់ក្នុងតំបន់ឃ័រសុនចាប់ពីម៉ោង៤ព្រឹកថ្ងៃទី២៧តុលាម៉ោងនៅក្រុងមូស្គូទៅ។ ចំណែកខាងភាគីអ៊ុយក្រែនវិញអះអាងពីការគោរពការសន្យារបស់ខ្លួន ។
លោកស្រីមីឡានីញ៉ាត្រាំប្រកាសកាលពីថ្ងៃទី២៣ តុលា ពីសំណើបទឈប់បាញ់គ្នាមនុស្សធម៌នោះ ដើម្បីសម្រួលដល់ការបញ្ជូនជំនួយមនុស្សធម៌។ ប្រតិបត្តិការនេះ កើតមានពេលមានការខិតចូលជិតគ្នារវាងប្រធានាធិបតីអាមេរិកលោកដូណាល់ត្រាំំនិងរុស្ស៊ី ដែលអ៊ុយក្រែន និងសម្ព័ន្ថមិត្តអឺរ៉ុបស្រងាកចិត្ត ។ កាលពីថ្ងៃទី២៦ តុលា រុស្ស៊ីថ្លែងរួចហើយថានឹងបើកចំហ សម្រាប់បទឈប់បាញ់គ្នាមនុស្សធម៌បែននេះដទៃៗទៀត ដោយអះអាងជាថ្មីថា រុស្ស៊ីវាយតម្លៃខ្ពស់ចំពោះការខិតខំប្រឹងប្រែងរបស់បណ្ដាអ្នកចរចាអាមេរិកពិសេសរបស់លោកស្រីមីលីនីញ៉ាត្រាំ ៕
ចែករំលែកព័តមាននេះ