ទីក្រុងរីយ៉ាដ ៖ ប្រទេសអារ៉ាប៊ីសាអូឌីត គ្រោងនឹងស្តុកទុកប្រេងឆៅនៅប្រទេសសិង្ហបុរី ចាប់ពីឆមាសទី២ ឆ្នាំ ២០២៧ តទៅ ដើម្បីពង្រឹងសុវត្ថិភាពនៃការផ្គត់ផ្គង់នៅក្នុងតំបន់។ នេះបើតាមរដ្ឋមន្ត្រីថាមពលនៃប្រទេសទាំងពីរបានប្រកាសកាលពីថ្ងៃទី២៦ ខែតុលា។
ប្រភពពី Reuters បានរាយការណ៍ថា ការសម្រេចចិត្តនេះ ធ្វើឡើងបន្ទាប់ពីសង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់ បានបាត់បង់ការផ្គត់ផ្គង់ថាមពលទៅកាន់ទ្វីបអាស៊ីយ៉ាងធ្ងន់ធ្ងរ ដែលដឹកជញ្ជូនកាត់តាមច្រកសមុទ្រហ័រមូស (Hormuz) ដែលជំរុញឱ្យបណ្តាប្រទេសជាច្រើនប្រើប្រាស់យកប្រេងឆៅពីឃ្លាំងស្តុក និងបង្កើនការព្រួយបារម្ភអំពីកម្រិតស្តុកប្រេងទូទាំងពិភពលោក។ ដ្បិតមុនផ្ទុះសង្គ្រាម ទ្វីបអាស៊ីបាននាំចូលប្រេងចំនួន ២ ភាគ ៣ ពីតំបន់ជ្ឈិមបូព៌ា។
ក្រុមហ៊ុនប្រេងរដ្ឋអារ៉ាប៊ីសាអូឌីត Saudi Aramco ចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយអាជ្ញាធរទីផ្សារថាមពល និងក្រុមហ៊ុន JTC Corp របស់សិង្ហបុរី កាលពីថ្ងៃចន្ទ ហើយមានគោលបំណងបញ្ចប់ការចរចាក្នុងរយៈពេលប៉ុន្មានខែខាងមុខ។ ការរៀបចំនេះ នឹងពង្រឹងភាពធន់នៃខ្សែច្រវាក់ផ្គត់ផ្គង់ប្រេងឆៅអារ៉ាប៊ីសាអូឌីតនៅអាស៊ីអាគ្នេយ៍ ក៏ដូចជារួមចំណែកដល់សន្តិសុខថាមពល និងភាពធន់របស់សិង្ហបុរី នៅក្នុងករណីមានការអាក់ខាននៃការផ្គត់ផ្គង់។
ភាគីទាំងពីរបានប្រកាសអំពីបំណងរួមក្នុងការបង្កើតកិច្ចព្រមព្រៀងមួយ ដើម្បីស្តុកប្រេងឆៅរបស់អារ៉ាប៊ីសាអូឌីតទុកនៅក្នុងរូងថ្មជូរ៉ុង (Jurong) នៃកោះជូរ៉ុង ប្រទេសសិង្ហបុរី ចាប់ពីឆមាសទី ២ ឆ្នាំ ២០២៧ ដែលរូងថ្មនោះមានជម្រៅ ១៥០ ម៉ែត្រក្រោមដី និងសមត្ថភាពស្តុកសារធាតុរាវដូចជាប្រេងឆៅ និងប្រេងកាតខាប់រហូតដល់ ១,៤៧ លានម៉ែត្រគូប ឬប្រហែល ៩ លានបារ៉ែល។
គួរបញ្ជាក់ថា បច្ចុប្បន្ននេះ ក្រុមហ៊ុន Saudi Aramco បានស្តុកប្រេងឆៅរបស់ខ្លួននៅក្នុងប្រទេសជប៉ុន និងកូរ៉េខាងត្បូង។ ក្រុមហ៊ុន Aramco Japan បានបញ្ជាក់ថា សមត្ថភាពស្តុកប្រេងឆៅនៅកោះអូគីណាវ៉ា (Okinawa) ត្រូវបានពង្រីកដល់ ៨,២ លានបារ៉ែល កាលពីខែកញ្ញា ឆ្នាំ២០១៧ ក្រោមកិច្ចព្រមព្រៀងមួយជាមួយសាជីវកម្មប្រេង ឧស្ម័ន និងលោហៈជាតិរបស់ជប៉ុន (JOGMEC)។ នៅក្នុងឆ្នាំ ២០២៣ ក្រុមហ៊ុន Aramco បានចុះហត្ថលេខាលើកិច្ចព្រមព្រៀងមួយជាមួយសាជីវកម្មប្រេងជាតិកូរ៉េខាងត្បូង ដើម្បីរក្សាទុកប្រេងចំនួន ៥,៣ លានបារ៉ែល នៅក្នុងកន្លែងបម្រុងប្រេងកូរ៉េខាងត្បូង នៅឯកំពង់ផែអ៊ុលសាន (Ulsan) រយៈពេល៥ឆ្នាំ៕
ចែករំលែកព័តមាននេះ