ស្ទា.វ១ក្រុមជិះម៉ូតូអូសដា.វ និងកាំបិ.តបែកផ្កាភ្លើងពេញផ្លូវស្វែងរកកា.ប់អ្នកដំណើរកា.ត់សាញ ត្រូវជាប់ខ្នោះ២នាក់
- ភ្នំពេញ
រាជធានីភ្នំពេញ ៖ ក្មេងស្ទាវ១ក្រុមមានគ្នាជាង១០បានជិះម៉ូតូច្រើនគ្រឿងអូសដាវ និងកាំបិតបែកផ្កាភ្លើងពេញផ្លូវ ស្វែងករកាប់កាប់អ្នកដំណើរ ដើម្បីជាការកាត់សាញ ។ ប៉ុន្តែសំណាងអាក្រក់បានជួបកម្លាំងនគរបាលកំពុងល្បាតនៅតាមផ្លូវនោះដែរ ក៏ត្រូវបាននគរបាលដេញតាមឃាត់ខ្លួនបាន២នាក់រួចវាយខ្នោះដៃ ចំណែកបក្ខពួក១០នាក់ទៀតគេចខ្លួនបាត់អស់ ។
ការបង្ក្រាបនិងឃាត់ខ្លួនក្រុមស្ទាវអ្នកលេងកាំបិតនិងដាវខាងលើបានធ្វើឡើង កាលពីវេលាម៉ោង០២និង៣០នាទីយប់រំលងអធ្រាត្រឈានចូលថ្ងៃទី២៦ ខែតុលា ឆ្នាំ២០២៦ នៅលើផ្លូវលេខ២១៧ ត្រង់ចំណុចផ្លូវកោង ស្ថិតនៅក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
ក្មេងស្ទាវដែលត្រូវនគរបាលឃាត់ខ្លួននោះ១.ឈ្មោះ រ៉ា ដារ៉ូ ភេទប្រុស អាយុ ១៨ឆ្នាំ ជនជាតិខ្មែរ មានទីលំនៅភូមិខ្ពបវែង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។ ២. ឈ្មោះ ឡូត ផាន់ណា ភេទប្រុស អាយុ១៨ឆ្នាំ ជនជាតិខ្មែរ មានទីលំនៅភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្តាល ។ នគរបាលដកហូតបានកាំបិតកែច្នៃដងដែកប្រវែង១១៥សង់ទីម៉ែត្រ១ដើម ម៉ូតូម៉ាកហុងដាឌ្រីមសេ១២៥ ពណ៌ខ្មៅ ផលិតឆ្នាំ២០២៦ ពាក់ស្លាកលេខ កណ្តាល 1AW-8074 ០១គ្រឿង ទូរស័ព្ទដៃម៉ាកIphone 11 ចំនួន០២គ្រឿង ។
នគរបាលខណ្ឌដង្កោបានប្រាប់ឲ្យដឹងថា នៅវេលាយប់ថ្ងៃកើតហេតុ កម្លាំងប៉ុស្តិ៍នគរបាលរដ្ឋបាលស្ពានថ្ម សហការជាមួយកម្លាំងផ្នែកព្រហ្មទណ្ឌនៃអធិការដ្ឋាននគរបាលខណ្ឌដង្កោ ធ្វើការល្បាតតាមបណ្តោយផ្លូវលេខ២១៧ ។ លុះពេលទៅដល់ត្រង់ចំណុចរង្វង់មូលកួរស្រូវ ក៏បានឃើញក្មេងស្ទាវ១ក្រុមមានគ្នា១២នាក់ ជិះម៉ូតូចំនួន០៦គ្រឿង អូសកាំបិតកែច្នៃ និងដាវ លើផ្លូវនោះបែកផ្កាភ្លើងពេញផ្លូវនិងលាន់ឮសម្លេងក្រោកៗថែមទៀតផង ។
នគរបានបានប្រាប់ឲ្យដឹងបន្តទៀតថា បន្ទាប់ពីបានឃើញបែបនេះ កម្លាំងនគរបាលខាងលើក៏បានដេញតាម រហូតដល់ត្រង់ចំណុចផ្លូវកោង ស្ថិតនៅលើផ្លូវលេខ២១៧ដដែលនោះ នៅក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ ។ ទើបដេញតាមទាន់ជនស្ទាវទាំងនោះ និងឃាត់ខ្លួនបាន២នាក់ គឺឈ្មោះរ៉ា ដារ៉ូ និងឈ្មោះ ឡូត ផាន់ណា ព្រមទាំងដកហូតបានទាំងវត្ថុតាងខាងលើ រួចនាំយកទៅធ្វើការសាកសួរនៅអធិការដ្ឋាននគរបាលខណ្ឌដង្កោចាត់ការតាមច្បាប់ ។
នគរបាលបានប្រាប់ឲ្យដឹងបន្ថែមថា ក្រោយពីបានធ្វើការសាកសួរ ជនសង្ស័យទាំងពីរនាក់បានឆ្លើយសារភាពថា នៅវេលាម៉ោងខាងលើពួកខ្លួន និងបក្ខពួកចំនួន១០នាក់ទៀត ក្នុងនោះមាន១-ឈ្មោះ ហុប ភេទប្រុស អាយុប្រហែល១៨ឆ្នាំ ២-ឈ្មោះ ភិន ភេទប្រុស អាយុ២០ឆ្នាំ និង០៨នាក់ទៀតមិនស្គាល់ឈ្មោះ បាននាំគ្នាជិះម៉ូតូចំនួន០៦គ្រឿងរួមមានម៉ូតូម៉ាកហុងដាសេ១២៥ ចំនួន០៥គ្រឿង (ពណ៌ខ្មៅ០៣គ្រឿង ពណ៌ស០១គ្រឿង) និងម៉ូតូម៉ាកស្គូពីពណ៌ខ្មៅ ០១គ្រឿង ប្រដាប់ដោយកាំបិតនិងដាវក្នុងដៃ ។
ជនស្ទាវទាំង២នាក់ខាងលើបានសារភាពទៀតថា ចំណែកពួកខ្លួនទាំង២នាក់ជិះម៉ូតូម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខកណ្តាល1AW-8074 ឌុបគ្នា ហើយការបបួលគ្នាជិះម៉ូតូតាមដងផ្លូវពេលយប់នោះ គឺមានគោលបំណងស្វែងរកកាប់អ្នកណើរតាមផ្លូវពេលយប់ដើម្បីជាការកាត់សាញ ។ ពេលនោះពួកខ្លួនក៏បានអូសកាំបិតលើផ្លូវបេតុងទៀតផង លុះមួយសន្ទុះក្រោយមក ក៏ត្រូវនគរបាលឃាត់ខ្លួនតែម្តង ចំណែកបក្ខពួក១០នាក់ទៀត បានជិះម៉ូតូគេចខ្លួនបាត់អស់ ៕
ចែករំលែកព័តមាននេះ