សិង្ហបុរី៖ មេដឹកនាំថាមពលរបស់ប្រទេសសិង្ហបុរី បានប្រកាសដោយមោទនភាពថា សិង្ហបុរីនឹងអភិវឌ្ឍជំនាញក្នុងស្រុកផ្តោតលើវិស័យថាមពលនុយក្លេអ៊ែរតាមរយៈគម្រោងថ្មីៗចំនួនបី ខណៈសេដ្ឋវិទូ និងជាអ្នកជំនាញខាងថាមពលបានអះអាងថាប្រទេសជាច្រើនកំពុងតែផ្តោតលើការផលិតថាមពលនុយក្លេអ៊ែរកម្រិតខ្ពស់។
ថ្លែងនៅថ្ងៃទី១នៃការបើកឆាកព្រឹត្តិការណ៍សប្តាហ៍ថាមពលអន្តរជាតិសិង្ហបុរីឆ្នាំ ២០២៦ Singapore International Energy Week 2026 លោកបណ្ឌិត Tan See Leng រដ្ឋមន្ត្រីក្រសួងថាមពល ពាណិជ្ជកម្ម និងឧស្សាហកម្ម (ទទួលបន្ទុកផ្នែកថាមពល និងឧស្សាហកម្ម) របស់ប្រទេសសិង្ហបុរី បានលើកឡើងថា សិង្ហបុរីនឹងអភិវឌ្ឍជំនាញក្នុងស្រុកលើវិស័យថាមពលនុយក្លេអ៊ែរ តាមរយៈគម្រោងថ្មីៗចំនួនបី។ គម្រោងទាំងនេះនឹងជួយកសាងសមត្ថភាពក្នុងការវាយតម្លៃថា តើបច្ចេកវិទ្យាថាមពលនុយក្លេអ៊ែរកម្រិតខ្ពស់ មានភាពសមស្របសម្រាប់ការផលិតថាមពលអគ្គិសនីនៅក្នុងប្រទេសសិង្ហបុរីដែរឬទេ។
គម្រោងទាំង៣ ដែលសិង្ហបុរី កំពុងសម្លឹងនោះ គឹរួមមាន កម្មវិធីអភិវឌ្ឍធនធានមនុស្សផ្នែកនុយក្លេអ៊ែរសម្រាប់មន្ត្រីរដ្ឋាភិបាល កម្មវិធីបណ្តុះបណ្តាលអ្នកជំនាញក្នុងវិស័យឧស្សាហកម្ម និងកម្មវិធីអាហារូបករណ៍សម្រាប់អ្នកដឹកនាំវិស័យថាមពលនាពេលអនាគត។ កម្មវិធីទាំងនេះនឹងជួយពង្រឹងចំណេះដឹង និងសមត្ថភាពរបស់សិង្ហបុរីក្នុងការវាយតម្លៃបច្ចេកវិទ្យាថាមពលនុយក្លេអ៊ែរទំនើប។
លោកបណ្ឌិត Tan See Leng មានប្រសាសន៍បានបញ្ជាក់ថា រដ្ឋាភិបាលនៅមិនទាន់សម្រេចចិត្តប្រើប្រាស់ថាមពលនុយក្លេអ៊ែរនៅឡើយទេ ប៉ុន្តែការកសាងជំនាញ និងចំណេះដឹងចាប់ពីពេលនេះ គឺមានសារៈសំខាន់សម្រាប់ការសម្រេចចិត្តនាពេលអនាគត។ លោកក៏បានបញ្ជាក់ពីការប្តេជ្ញារក្សាស្តង់ដារសុវត្ថិភាព និងសន្តិសុខនុយក្លេអ៊ែរខ្ពស់បំផុត ប្រសិនបើប្រទេសសម្រេចប្រើប្រាស់បច្ចេកវិទ្យានេះ។
ចំណែកលោក Dr. Fatih Birol គឺជាសេដ្ឋវិទូ និងជាអ្នកជំនាញខាងថាមពលជនជាតិទួរគី ដែលបច្ចុប្បន្នកំពុងកាន់តំណែងជា នាយកប្រតិបត្តិនៃទីភ្នាក់ងារថាមពលអន្តរជាតិInternational Energy Agency – IEA) បានថ្លែងនៅថ្ងៃទី២ នៃព្រឹត្តិការណ៍សប្តាហ៍ថាមពលអន្តរជាតិសិង្ហបុរីឆ្នាំ ២០២៦ ថាពិភពលោកកំពុងបង្កើនសមត្ថភាបផលិតថាមពលនុយក្លេរអ៊ែរ។ លោក Dr. Fatih Birol លើកឡើងថា សមត្ថភាពផលិតថាមពលនុយក្លេអ៊ែរកម្រិត ៩៩ ជីហ្គាវ៉ាត់ (GW) កំពុងស្ថិតក្នុងដំណាក់កាលសាងសង់នៅជុំវិញពិភពលោក ដែលជាតួលេខខ្ពស់បំផុតមិនធ្លាប់មាន៤ ទសវត្សរ៍ចុងក្រោយនេះ ខណៈដែលបណ្តាប្រទេសនានាកំពុងស្វែងរកប្រភពថាមពលដែលមានសុវត្ថិភាព និងអាចទុកចិត្តបាន ក្នុងបរិបទដែលទីផ្សារថាមពលកំពុងមានភាពប្រែប្រួលមិននឹងនរ។
លោកបានបន្តថា មិនត្រឹមតែមានការសាងសង់ប៉ុណ្ណោះទេ ប៉ុន្តែថែមទាំងមានចំណាប់អារម្មណ៍យ៉ាងខ្លាំងក្នុងការបង្កើតគម្រោងថ្មីៗបន្ថែមទៀត ដែលនេះឆ្លុះបញ្ចាំងពីការផ្លាស់ប្តូរផ្នត់គំនិត និងប្រតិកម្មនៅក្នុងបរិបទបច្ចុប្បន្ន។
ការប្រើប្រាស់ថាមពលមានការកើនឡើងជារៀងរាល់ថ្ងៃ ទាំងការប្រើប្រាស់តាមផ្ទះនិងឧស្សាហកម្មពាណិជ្ជកម្ម។
ការកើនឡើងនៃការប្រើប្រាស់ថាមពលក្នុងវិស័យរថយន្តក៏ហក់ឡើងដែរ។ បើតាម លោក Dr. Fatih Birol ក្នុងរយៈពេល ៨ ខែចុងក្រោយនេះ វិស័យរថយន្តអគ្គិសនីមានការរីកចម្រើនយ៉ាងខ្លាំង។ ជាក់ស្តែង នៅក្នុងប្រទេសចិន ការប្រើប្រាស់រថយន្តប្រភេទនេះបានកើនឡើងយ៉ាងខ្លាំង។ ទោះបីជាមានបញ្ហាប្រឈមមួយចំនួនក៏ដោយ ប៉ុន្តែនៅក្នុងតំបន់ផ្សេងទៀតនៃពិភពលោក ចំនួនរថយន្តអគ្គិសនីបានកើនឡើង ៦០% ក្នុងរយៈពេល ៨ ខែចុងក្រោយនេះ។ ការផ្លាស់ប្តូរទាំងនេះ គឺជាប្រតិកម្មដំបូងចំពោះវិបត្តិដែលកំពុងកើតមាន ប៉ុន្តែយើងនឹងឃើញការផ្លាស់ប្តូរជាមូលដ្ឋានកាន់តែធំធេងជាងនេះទៅទៀត។
លោកបានបន្តថា ខ្ញុំចង់លើកឡើងពីចំណុចសំខាន់មួយសម្រាប់តំបន់អាស៊ី៖ យើងកំពុងឈានចូលដល់យុគសម័យនៃថាមពលអគ្គិសនី។ ទោះបីជាយើងនៅតែបន្តប្រើប្រាស់ប្រេង និងឧស្ម័នធម្មជាតិសម្រាប់ថាមពលក៏ដោយ ប៉ុន្តែតម្រូវការថាមពលអគ្គិសនីនឹងកើនឡើងយ៉ាងខ្លាំង។
នៅក្នុងបណ្តាប្រទេសអាស៊ី តម្រូវការថាមពលកំពុងកើនឡើងយ៉ាងខ្លាំង ដោយតម្រូវការថាមពលអគ្គិសនីកើនឡើងលឿនជាងតម្រូវការថាមពលសរុបដល់ទៅពីរដង។ នេះរួមបញ្ចូលទាំងការផ្លាស់ប្តូរទៅប្រើប្រាស់ថាមពលអគ្គិសនីនៅក្នុងវិស័យឧស្សាហកម្ម វិស័យរថយន្ត និងវិស័យទិន្នន័យផងដែរ៕
ចែករំលែកព័តមាននេះ