ទីក្រុងប៉ារីស៖ ប្រធានាធិបតីបារាំង លោកម៉ាក្រុង ប្រកាសថាលើកនេះរដ្ឋាភិបាលនឹងមិនបន្ធូរដៃតទៅទៀតទេក្នុងការប្រើប្រាស់វិធានការក្ដៅទៅលើក្រុមអ្នកនិយមចូលចិត្តប្រើប្រាស់អំពើហិង្សា ឬលួចទ្រព្យសម្បត្តិអ្នកដទៃ។ រដ្ឋាភិបាលរបស់លោកត្រៀមប្រកាសដាក់ចេញនូវវិធានការក្ដៅដើម្បីឆ្លើយតបទៅនឹងចលនាតវ៉ាដ៏ពុះកញ្ជ្រោលទូទាំងប្រទេសបារាំង។ នៅក្នុងចំណោមនោះមានទាំងក្រុមដែលតវ៉ាដោយសន្តិវិធី និងមានរបៀបរៀបរយ និងក្រុមដែលឆ្លៀតឱកាសបង្កភាពវឹកវរដល់សន្តិសុខសង្គម។
ទន្ទឹមនឹងនោះ លោកម៉ាក្រុងក៏ទទួលស្គាល់ផងដែរថាប្រទេសជាតិអាចប្រឈមនឹងហានិភ័យនៃអស្ថិរភាព។ នាយករដ្ឋមន្ត្រីបារាំង លោឡឺគ័រនូ ត្រៀមរៀបចំសន្និសីទសារព័ត៌មាននៅពេលបន្តិចទៀតនេះបន្ទាប់ពីលោកជួបពិភាក្សាគ្នាជាមួយក្រុមសម្ព័ន្ធសិស្សសាលាមធ្យមសិក្សាដែលស្នើសុំឱ្យរដ្ឋាភិបាលគិតគូរឱ្យបានច្រើនថែមទៀតចំពោះវិស័យអប់រំ និងពិនិត្យមើលឡើងវិញទៅលើនីតិវិធីនៃការជ្រើសរើសបេក្ខជនចូលរៀននៅតាមសាកលវិទ្យាល័យ។
ពួកគេគិតថានៅមានវិសមភាពច្រើនណាស់នៅក្នុងបញ្ហានេះ។ លោកម៉ាក្រុងប្រាប់អ្នកសារព័ត៌មានថាលោកបានស្នើសុំឱ្យរដ្ឋាភិបាលឆ្លើយតបចំពោះការទាមទារស្របច្បាប់ដែលជាឫសគល់នៃបញ្ហានាំទៅដល់ការហែបាតុកម្ម។ លោកទើបតែវិលត្រឡប់ពីចុះពិនិត្យមើលទំហំនៃការខូចខាតដែលបង្កឡើងដោយពួកបះបោរ។ លោកម៉ាក្រុងបានលើកយកពាក្យសម្ដីរបស់រដ្ឋមន្ត្រីមហាផ្ទៃមកនិយាយឡើងវិញថាភាពរំជើបរំជួលទំនងជាកើតមានជាថ្មីនៅចុងសប្ដាហ៍ក្រោយ។
សម្រាប់ពេលនេះ មានសញ្ញាតិចតួចណាស់ដែលថាការតវ៉ានឹងថមថយទៅវិញ បន្ទាប់ពីអំពើហិង្សាផ្ទុះឡើងយ៉ាងកក្រើកទីក្រុងតូចធំនានារាប់សិបកន្លែងរហូតដល់បង្កជាការព្រួយបារម្ភថារដ្ឋាភិបាលអាចនឹងទប់ទល់នឹងបាតុកម្មនេះមិនជាប់ទេ។ ឆ្លើយតបទៅនឹងភាពចលាចលនេះ រដ្ឋមន្ត្រីមហាផ្ទៃបារាំងបានបញ្ចេញកម្លាំងនគរបាល៧ម៉ឺននាក់ដើម្បីត្រៀមទប់ទល់នឹងចលនាបាតុកម្មដែលក្រុមសម្ព័ន្ធសិស្សវិទ្យាល័យអះអាងថាធ្វើឡើងដើម្បីតវ៉ាថ្លៃចំណាយលើជីវភាពប្រចាំថ្ងៃកាន់តែច្រើនឡើងៗ និងការកាត់បន្ថយសេវាសាធារណៈរបស់រដ្ឋ៕ ប្រភព៖ Reuters
ចែករំលែកព័តមាននេះ