រាជធានីភ្នំពេញ ៖ ម៉ូតូសណ្ដោងរ៉ឺម៉ក ១គ្រឿង ដឹកកុំព្យូទ័រ បានជ្រុលទៅបុករថយន្តភីអាប់ម៉ាកនីស្សាន់ ១គ្រឿង ដែលកំពុងបើកបរឆ្លងផ្លូវពេញទំហឹង បណ្ដាលឲ្យម៉ូតូសណ្ដោងរ៉ឺម៉ក រងការខូចខាតស្ទើរទាំងស្រុង រីឯអ្នកបើកបរ និងអ្នករួមដំណើរម្នាក់ទៀតរងរបួស។ ដោយឡែករថយន្តនីស្សាន់នោះវិញ បានរងការខូចខាតក្រពឹតទ្វារខាងស្ដាំទាំង២ បន្ទាប់មកម្ចាស់រថយន្តនេះបានចេញសំណងទៅឲ្យខាងភាគីម៉ូតូសណ្ដោងរ៉ឺម៉ក ចំនួន២ពាន់ដុល្លារជាការបញ្ចប់រឿង ។
ឧប្បត្តិហេតុនោះ បានកើតឡើងកាលពីវេលាម៉ោង២រសៀលថ្ងៃទី២៦ ខែតុលា ២០២៦ នៅតាមមហាវិថីសហព័ន្ធរុស្ស៊ី ត្រង់ចំណុចមុខអតីតអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
អ្នកឃើញហេតុការណ៍ខាងលើ បាននិយាយថា ជនរងគ្រោះ ដែលរងរបួសនៅក្នុងឧប្បត្តិហេតុនោះមានចំនួន២នាក់ គឺអ្នកបើកបរមូតូសណ្ដោងរ៉ឺម៉កដឹកកុំព្យូទ័រម្នាក់ និងអ្នករួមដំណើរជាមួយម្នាក់។ នៅមុនពេលកើតហេតុ ជនរងគ្រោះទាំង២នាក់ បានបើកបរ និងជិះម៉ូតូសណ្ដោងរ៉ឺម៉ក ១គ្រឿងខាងលើ ដឹកកុំព្យូទ័រ ច្រើនគ្រឿង ធ្វើដំណើរតាមមហាវិថី សហព័ន្ធរុស្ស៊ី ក្នុងទិសដៅពីកើតទៅលិច ក្នុងល្បឿនលឿនគួរសមដែរ ។
ប្រភពដដែល បានប្រាប់ឲ្យដឹងបន្តថា ចំណែករថយន្តភីអាប់ម៉ាកនីស្សាន់ពណ៍ខ្មៅ ពាក់ស្លាកលេខភ្នំពេញ CH-3038 បើកបរដោយបុរសម្នាក់ ធ្វើដំណើរតាមមហាវិថី សហព័ន្ធរុស្ស៊ីដូចគ្នា ក្នុងទិសដៅពីលិចទៅកើតបញ្ច្រាស់ទិសគ្នា។ លុះពេលទៅដល់ត្រង់ចំណុចកើតហេតុ រថយន្តនេះ បានបត់ឆ្វេងឆ្លងផ្លូវ ហើយឆ្លងជិតផុតទៅហើយ ក៏ត្រូវម៉ូតូសណ្ដោងរ៉ឺម៉កខាងលើវាក់ឈប់មិនទាន់ ក៏ជ្រុលទៅបុករថយន្តចំទ្វារខាងស្ដាំ ពេញទំហឹងតែម្ដង ។
ប្រភពខាងលើ បានប្រាប់ឲ្យដឹងបន្ថែមទៀតថា ខណៈនោះ បានបណ្ដាលឲ្យម៉ូតូសណ្ដោងរ៉ឺម៉ករងការខូចខាតស្ទើរទាំងស្រុងប្រើការលែងកើត រីឯអ្នកបើកបរ និងអ្នករួមដំណើរម្នាក់ទៀតរងរបួស។ ដោយឡែករថយន្តនីស្សាន់ខូចខាតក្រពឹតទ្វារខាងស្ដាំទាំង២ផ្ទាំង ហើយក្រោយពេលកើតហេតុអ្នករងរបួសត្រូវបានរថយន្តសង្គ្រោះដឹកទៅកាន់មន្ទីរពេទ្យ។ បន្ទាប់មក នគរបាលប៉ុស្តិ៍កាកាបទី១ បានឲ្យភាគីទាំង២សម្របសម្រួលគ្នា ហើយខណៈនោះម្ចាស់រថយន្ត ក៏បានចេញសំណងដល់ភាគីម៉ូតូសណ្ដោងរ៉ឺម៉កចំនួន២ពាន់ដុល្លារ ជាការបញ្ចប់រឿង ៕
ចែករំលែកព័តមាននេះ