ទីក្រុងម៉ូស្គូ៖ ក្រសួងការពារជាតិរុស្ស៊ីចោទប្រកាន់ថាអ៊ុយក្រែននៅតែបន្តបាញ់កាំភ្លើងធំចូលទីក្រុងអូឡេស្គី (Oleskhy) និងបញ្ជូនដ្រូនទៅវាយប្រហារទីក្រុងដែលគ្រប់គ្រងដោយកងទ័ពរុស្ស៊ីមួយនេះជាហូរហែរហូតទៅទល់នឹងពេលកៀកអនុវត្តបទឈប់បាញ់ដែលនឹងចាប់ផ្ដើមនៅសប្ដាហ៍នេះ។ រុស្ស៊ីអះអាងបន្តទៀតថាសកម្មភាពនេះធ្វើឱ្យរំខានការបំពេញការងាររបស់ភ្នាក់ងារមនុស្សធម៌ក្នុងការដឹកជញ្ជូនស្បៀងអាហារ, ថ្នាំពេទ្យ និងរារាំងប្រជាជនរស់នៅក្នុងទីក្រុងនេះមិនឱ្យចាកចេញទៅខាងក្រៅ។
កាលពីថ្ងៃសុក្រ អ៊ុយក្រែន និងរុស្ស៊ីប្រកាសថាពួកគេឯកភាពទទួលយកបទឈប់បាញ់នៅទីក្រុងអូឡេស្គី (Oleshky) (ដែលនឹងចូលជាធរមានចាប់ពីថ្ងៃទី២៧ ខែតុលាតទៅ) ដើម្បីអនុញ្ញាតឱ្យដឹកជំនួយចូលទីក្រុងនេះផង និងអនុញ្ញាតឱ្យប្រជាជនដែលរស់នៅក្នុងទីក្រុងនេះ និងដែលចង់ចាកចេញពីទីនោះអាចចាកចេញទៅបាន ដោយធ្វើដំណើរតាមច្រករបៀងសុវត្ថិភាព។ ក្រសួងការពារជាតិរុស្ស៊ីចេញសេចក្ដីប្រកាសថាអ៊ុយក្រែនវាយប្រហារដោយកាំភ្លើងធំចំនួន១៨ដង និងបញ្ជូនដ្រូនជាង១២០គ្រឿងទៅវាយប្រហារទីក្រុងនេះ និងច្រកផ្លូវសំខាន់ៗនៃតំបន់ខ្សែក្រវាត់ក្រុង។
នៅក្នុងព្រឹត្តិការណ៍ដាច់ដោយឡែកមួយទៀត ប្រជាជនអ៊ុយក្រែនដែលទើបតែចាកផុតពីទីក្រុងអូឡេស្គីប្រមើលមើលបទឈប់បាញ់ដែលជួយសម្របសម្រួលដោយអាមេរិកនោះហាក់ដូចជាមិនទាន់គួរឱ្យជឿទុកចិត្តទាំងស្រុងទេព្រោះមិនដឹងថាពេលខាងមុខនឹងទៅជាយ៉ាងណា។ អ្នកខ្លះប្រាប់ថាពួកគេសុខចិត្តប្រថុយចាកចេញពីទីក្រុងនេះជាមួយកូន ប្រពន្ធ និងសត្វចិញ្ចឹមរបស់ខ្លួនដើម្បីព្យាយាមស្វះស្វែងរកជីវិតដែលប្រសើរជាងនោះព្រោះបន្តសំកុកនៅទីនោះទៀតអាចប្រឈមនឹងការដាច់ពោះស្លាប់។
ប្រភពខ្លះថាប្រជាជនរស់នៅទីក្រុងនោះត្រូវតែបង្ខំចិត្តដាំបន្លែ ចិញ្ចឹមសត្វ។ល។ ដើម្បីដោះស្រាយជីវភាពប្រចាំថ្ងៃ ហើយម៉្យាងទៀតត្រូវរស់នៅក្នុងការភ័យខ្លាចជាប់ជាប្រចាំដោយសារការប្រយុទ្ធគ្នា។ បន្ទាប់ពីហែលឆ្លងស្ថានភាពលំបាកវេទនាឆ្លងកាត់ប្រទេសរុស្ស៊ីផង និងបេឡារូសផងទម្រាំចូលទៅក្នុងតំបន់ដែលគេចចេញពីការប្រយុទ្ធគ្នានៅអ៊ុយក្រែន ពួកគេប្រមើលមើលបទឈប់បាញ់នេះនៅក្នុងភាពទុទិដ្ឋិនិយម។ ពួកគេមិនសូវមានសង្ឃឹមថាបទឈប់បាញ់នេះអាចមានអាយុកាលយូរអង្វែងនោះឡើយ។ អ្នកដែលបន្តរស់នៅទីក្រុងអូឡេស្គីភាគច្រើនជាមនុស្សចាស់ជរា ឬអ្នកមានជំងឺតម្កាត់ជាប់ខ្លួន។ ហេតុនេះ វាជារឿងដ៏ពិបាកសម្រាប់ពួកគាត់ក្នុងការធ្វើបម្លាស់ទីទៅកាន់ទីកន្លែងដទៃ។
អ៊ុយក្រែន និងរុស្ស៊ីដាក់ការស្ដីបន្ទោសគ្នាទៅវិញទៅមកដើម្បីនិយាយយកត្រូវរៀងខ្លួនពាក់ព័ន្ធនឹងវិបត្តិមនុស្សធម៌នៅទីក្រុងអូឡេស្គី។ ដ្រូនជាគ្រោះគំរាមកំហែងដ៏ធំបំផុតទៅលើអាយុជីវិតរបស់ជនស៊ីវិល ហើយទីក្រុងនេះស្ថិតនៅចម្ងាយដែលដ្រូនអាចវាយប្រហារទៅដល់ពីខាងរុស្ស៊ីផង និងអ៊ុយក្រែនផង។ ដោយសារម៉្យាងអស់ស្បៀងអាហារ និងម៉្យាងទៀតច្រកផ្លូវទៅភាគខាងត្បូងជាផ្លូវទ័លនឹងទន្លេឌីនីប្រូ (Dnipro) ម៉្លោះហើយ អ្នកខ្លះដាច់ចិត្តធ្វើដំណើរដោយថ្មើរជើងចម្ងាយម្ភៃគីឡូម៉ែត្រទៅរកភូមិដែលនៅកៀកជាងគេដើម្បីប្រមូលស្បៀង និងទឹកស្អាតយកទៅស្តុកទុក។ ការធ្វើដំណើររបៀបនេះពោរពេញដោយការហត់នឿយ និងគ្រោះថ្នាក់ណាស់។ អ្នកស្រុកនៅទីនោះហៅឈ្មោះការធ្វើដំណើរនេះថា «ផ្លូវមរណៈ»៕ ប្រភព៖ Reuters
ចែករំលែកព័តមាននេះ