ទីក្រុងតេអេរ៉ង់៖ ក្រុមឧទ្ទាមហ៊ូទីប្រកាសទទួលស្គាល់ត្រង់ៗតែម្ដងថាខ្លួនទើបតែវាយប្រហារស្ថានីយបូមប្រេងមួយកន្លែងរបស់ប្រទេសអារ៉ាប៊ីសាអូឌីតស្ថិតនៅតំបន់ខាងកើតឆៀងខាងលិច ហើយក៏វាយប្រហារផងដែរព្រលានយន្តហោះនៅទីក្រុងរីយ៉ាត។ ព្រឹត្តិការណ៍នេះកើតឡើងស្របពេលដែលការផ្គត់ផ្គត់ប្រេងឆៅទៅកាន់ទីផ្សារអន្តរជាតិជួបប្រទះនឹងបញ្ហារអាក់រអួលយ៉ាងខ្លាំង និងម៉្យាងទៀត ស្រួលមិនស្រួលសង្គ្រាមអាចនឹងបែកសាយាមោកាន់តែខ្លាំងឡើងៗព្រោះភាគីម្ខាងៗកំពុងតែសង្គ្រឺតធ្មេញដាក់គ្នាសម្បើមណាស់។
ក្រុមសម្ព័ន្ធមិត្តនៅប្រទេសយេម៉េនដែលដឹកនាំដោយអារ៉ាប៊ីសាអូឌីត និងដែលប្រឆាំងនឹងក្រុមឧទ្ទាមហ៊ូទីថ្លែងថាខ្លួនបានបាញ់កម្ទេចជើងទម្របាញ់មីស៊ីលបាលីស្ទីក២គ្រឿងនៅរដ្ឋធានីសាណា។ ក្នុងនោះ ជើងទម្រមួយគ្រឿងត្រូវក្រុមហ៊ូទីប្រើប្រាស់សម្រាប់បាញ់មីស៊ីលតម្រង់ទៅរកទីក្រុងរីយ៉ាត។ ប៉ុន្តែមីស៊ីលនោះត្រូវក្រុមសម្ព័ន្ធមិត្តបាញ់ទម្លាក់ទាន់ពេលវេលា។ អារ៉ាប៊ីសាអូឌីតរក្សាភាពស្ងៀមស្ងាត់ មិនបានធ្វើអត្ថាធិប្បាយពាក់ព័ន្ធនឹងការវាយប្រហារពីសំណាក់ក្រុមហ៊ូទីទេ។
នៅដំណាក់កាលចុងក្រោយនេះ ក្រុមហ៊ូទីបានដៃសម្បើមណាស់។ ពួកគេបន្តបាញ់មីស៊ីលបាលីស្ទីក និងបញ្ជូនដ្រូនទៅវាយប្រហារអាកាសយានដ្ឋាននានារបស់អារ៉ាប៊ីសាអូឌីត កំពង់ផែ និងទីតាំងស្តុកទុកប្រេងឆៅរបស់ប្រទេសនេះ ជាហេតុធ្វើឱ្យអារ៉ាប៊ីសាអូឌីតដែលពីដំបូងដៃហាក់ដូចជាមិនជាប់ពាក់ព័ន្ធនឹងសង្គ្រាមអុីរ៉ង់ទេ បែរជាស្ថិតនៅចំកណ្ដាលនៃសង្គ្រាម។ ចំណែកអុីស្រាអែលដែលជាអ្នកប្រឡូកយ៉ាងសកម្មពីដំបូងទី ហាក់ដូចជារួចខ្លួនទៅវិញ។ អុីស្រាអែលអាចនឹងរង់ចាំអ៊ុតលទ្ធផលបោះឆ្នោតជ្រើសរើសអ្នកតំណាងរាស្ត្រខាងមុខនេះសិន។ ស្រួលមិនស្រួល អុីស្រាអែលអាចនឹងលេងមួយក្ឌាំងទៀតក៏អាចថាបាន។ ក្រុមហ៊ូទីគ្មានកោតក្រែងចិត្តអ្នកណាទាំងអស់។ ពួកគេប្រកាសក្ដែងៗតែម្ដងថាខ្លួនទើបតែវាយប្រហារអាកាសយានដ្ឋានអន្តរជាតិឃីងខាលីត (King Khalid) នៅទីក្រុងរីយ៉ាត។
កាលពីថ្ងៃអាទិត្យ អាកាសយានដ្ឋាននេះបើកដំណើរការឡើងវិញនូវចំណតសម្រាប់អ្នកដំណើររង់ចាំបន្ទាប់ពីមានហេតុការណ៍វាយប្រហារដ៏ខ្លាំងក្លាមួយបណ្ដាលឱ្យស្លាប់មនុស្ស១៣នាក់កាលដើមខែតុលា។ មន្ត្រីជាន់ខ្ពស់នៃរដ្ឋជាសមាជិកកតិកាសញ្ញាមិចកា (Mecca Pact) ដែលមានអារ៉ាប៊ីសាអូឌីត តួកគី និងប៉ាគីស្ថានគ្រោងជួបគ្នាជាមួយមន្ត្រីរដ្ឋាភិបាលអុីរ៉ង់នៅទីក្រុងតេអេរ៉ង់ដើម្បីពិភាក្សាគ្នាដោះស្រាយបញ្ហានៅក្នុងតំបន់។ នេះជាលើកទី១ដែលមានកិច្ចជំនួបកម្រិតខ្ពស់របៀបនេះរវាងអុីរ៉ង់ និងរដ្ឋជាសមាជិកបីទៀតចាប់តាំងពីអារ៉ាប៊ីសាអូឌីតទទួលរងការវាយប្រហារកាន់តែខ្លាំងឡើងៗពីសំណាក់ក្រុមហ៊ូទី៕ ប្រភព៖ Reuters
ចែករំលែកព័តមាននេះ