ទីក្រុងប៉េកាំង៖ ថ្ងៃនេះ បក្សកុម្មុយនិស្តចិនចាប់ផ្ដើមបើកមហាសន្និបាតរយៈពេលបួនថ្ងៃដែលចូលរួមដោយមន្ត្រីកំពូលៗរបស់បក្ស សំដៅដាក់ចេញវិធានការដ៏ម៉ឺងម៉ាត់ក្នុងការពង្រឹងប្រព័ន្ធអភិបាលកិច្ចផ្ទៃក្នុងឱ្យបានពេញលេញ និងប្រកបដោយជំហានហ្មត់ចត់។ មហាសន្និបាតនេះរៀបចំឡើងចំពេលដែលប្រធានាធិបតីចិន លោកស៊ីជីនពីង កំពុងខិតខំពង្រឹងអំណាចរបស់លោក និងធ្វើយ៉ាងណាឱ្យមានភាពចុះសម្រុងគ្នាផ្នែកមនោគមន៍វិជ្ជាកុម្មុយនិស្ត។ លោកស៊ីជីនពីងបានបង្ហាញចំណាប់អារម្មណ៍ដោយសង្ខេបជូនគណៈមជ្ឈិមបក្សនៅលើសំណុំឯកសារព្រាងដែលទីភ្នាក់ងារព័ត៌មានស៊ីនហួចាត់ទុកថាជាបញ្ហាធំៗដែលបក្សកំពុងតែប្រឈមដោះស្រាយ។ ឧទាហរណ៍ ដូចជាការរ៉ាប់រងធ្វើកិច្ចការនៅក្នុងអភិបាលកិច្ចកាន់តែច្រើនឡើងៗ, ការមិនត្រូវមានមោទកភាពហួសហេតុរហូតដល់ភ្លេចខ្លួន, និងជាពិសេស ការប្រយុទ្ធប្រឆាំងអំពើពុករលួយដែលជាមូលដ្ឋានគ្រឹះនៅក្នុងកម្មវិធីនយោបាយរបស់លោកស៊ីជីនពីងតាំងតែពីដើមរៀងមក។
បទអត្ថាធិប្បាយនោះសរសេររៀបរាប់ថាគេត្រូវតែអនុវត្តឱ្យចេញជាសាច់ការពិតប្រាកដនូវសេចក្ដីសម្រេចចិត្ត និងផែនការនានាដែលដាក់ចេញដោយគណៈមជ្ឈិមបក្សជាជាងបានត្រឹមតែបំផ្លោងវោហារសាស្ត្រឥតប្រយោជន៍។ វាជារឿងចាំបាច់ណាស់ដែលត្រូវតែពិនិត្យសើរើឡើងវិញនូវវិធានផ្ទៃក្នុង និងបទបញ្ញត្តិនានាដើម្បីបិទភ្ជិតចំណុចចន្លោះប្រហោង ក៏ដូចជាពង្រឹងការឃ្លាំមើល និងធានាការអនុវត្តវិធាន និងបទបញ្ញត្តិទាំងនោះប្រកបដោយប្រសិទ្ធភាពខ្ពស់។ តាមគម្រោង គណៈមជ្ឈិមបក្សកុម្មុយនិស្តចិននឹងរៀបចំមហាសន្និបាតបក្សជាអសាធារណៈ (ប្រជុំបិទទ្វារ) ចាប់ពីថ្ងៃចន្ទរហូតដល់ថ្ងៃព្រហស្បតិ៍។
នេះជាកិច្ចប្រជុំលើកទីប្រាំចាប់តាំងពីគណៈមជ្ឈិមបក្សបច្ចុប្បន្នបង្កើតឡើងកាលពីឆ្នាំ២០២២។ ហេតុនេះ កិច្ចប្រជុំលើកនេះត្រូវគេស្គាល់ថាជាមហាសន្និបាតបក្សលើកទី៥។ ក្រុមអ្នកវិភាគយល់ថាការជួបគ្នាលើកនេះប្រហែលជាលើកចុងក្រោយបង្អស់មុនពេលមានការរុះរើថ្នាក់ដឹកនាំកំពូលៗនាឆ្នាំ២០២៧។ គេរំពឹងថាលោកស៊ីជីនពីងនឹងជាប់ឆ្នោតក្លាយជាប្រធានាធិបតីនៅអាណត្តិទីបួន។ គួរកត់សម្គាល់ថាប៉ុន្មានឆ្នាំចុងក្រោយនេះ លោកស៊ីជីនពីងបានដឹកនាំយុទ្ធនាការប្រយុទ្ធប្រឆាំងអំពើពុករលួយយ៉ាងខ្លាំងក្លា។ មន្ត្រីជាន់ខ្ពស់រាប់រយនាក់ មិនថានៅក្នុងស្ថាប័នស៊ីវិល និងយោធានោះទេ ត្រូវបានដកចេញពីតំណែង។
សូម្បីតែសម្ព័ន្ធមិត្តចិត្តមួយថ្លើមមួយដែលស្គាល់រាប់អានគ្នារាប់សិបឆ្នាំមកហើយ ហើយជាមនុស្សជិតស្និទ្ធខ្លាំងជាមួយនឹងលោកស៊ីជីនពីងក៏ត្រូវអស់តំណែងផងដែរ។ ក្រុមអ្នករិះគន់បានលើកជាទឡ្ហីករណ៍ថាយុទ្ធនាការបោសសម្អាតនេះ អាចបង្កអស្ថិរភាព និងធ្វើឱ្យចុះខ្សោយកម្លាំងប្រយុទ្ធ ជាពិសេស ការបោសសម្អាតមន្ត្រីយោធាកំពូលៗ។ ទោះជាយ៉ាងណាក្ដី បក្សកុម្មុយនិស្តចិនមិនគិតដូច្នេះទេ។ បក្សចាត់ទុកយុទ្ធនាការនេះជាការចាំបាច់ដែលត្រូវតែធ្វើដោយខានពុំបាន ហើយត្រូវតែធ្វើឡើងជាលក្ខណៈអ្នកជំនាន់ថ្មីស្នងអ្នកជំនាន់ចាស់។ កងទ័ពត្រូវតែធ្វើខ្លួនឱ្យដូចជាដែកដែលត្រូវគេយកទៅលត់ហើយដំ ដំហើយលត់ជាច្រើនលើកច្រើនសា។
បទអត្ថាធិប្បាយរបស់ទីភ្នាក់ងារព័ត៌មានស៊ីនហួបានជួយបន្ទរយុទ្ធនាការប្រយុទ្ធប្រឆាំងអំពើពុករលួយ នេះ ហើយចាត់ទុកថានេះជាការបង្ហាញនូវប្រព័ន្ធអភិបាលកិច្ចដែលប្រកបដោយចីរភាព និងជាខ្សែសង្វាក់ សំដៅធានាថាមន្ត្រីទាំងនោះមិនហ៊ាន, មិនអាច និងមិនចង់ប្រព្រឹត្តអំពើពុករលួយ។ ស៊ីនហួចុះផ្សាយបន្តទៀតថាសម្រាប់ក្រុមអ្នកវិនិយោគអន្តរជាតិ និងអ្នកតាក់តែងគោលនយោបាយសាធារណៈ ទិដ្ឋភាពបែបនេះជួយឱ្យគេអាចព្យាករដឹងអំពីអនាគតនាពេលខាងមុខកាន់តែច្បាស់លាស់។ ស៊ីនហួអះអាងថាប្រទេសចិនក៏កំពុងបង្កើតបរិយាកាសវិនិយោគកាន់តែមានតម្លាភាពសម្រាប់ជួយសម្រួលដល់កិច្ចសហប្រតិបត្តិការជាអន្តរជាតិ។ នីតិរដ្ឋត្រូវតែមានជ័យជម្នះនៅទីបំផុតលើការអាងខ្សែ អាងខ្នង និងការផ្ដល់សំណូក៕ ប្រភព៖ AP
ចែករំលែកព័តមាននេះ