ទីក្រុងអាម៉ាន៖ ថ្ងៃនេះ សមត្ថកិច្ចនៅប្រទេសហ្សកដង់ប្រកាសថាពួកគេចាប់បានបុរសបីនាក់ដែលជាប់សង្ស័យពីបទសង្ស័យបាញ់ប្រហារនៅព្រះវិហារគ្រិស្តសាសនានិកាយអ័រតូដុក (Orthodox) ដែលបណ្ដាលឱ្យស្លាប់មនុស្ស៩នាក់ និងរបួសរាប់សិបនាក់។ អគ្គនាយកដ្ឋានផ្នែកសន្តិសុខសាធារណៈប្រកាសថាជនសង្ស័យទាំងបីនាក់នោះត្រូវបានចាប់ខ្លួនក្រោយការបាញ់ប្រហារនៅព្រះវិហារ និងថាបុរសទាំងបីនាក់ក៏ត្រូវរបួសផងដែរ។ មិនមានកងសន្តិសុខណាម្នាក់រងរបួស ឬស្លាប់ទេនៅក្នុងប្រតិបត្តិការតាមប្រមាញ់អ្នកទាំងនេះនៅទីក្រុងខារ៉ាក់ (Karak) ភាគខាងត្បូងរាជធានីអាម៉ាន (Amman)។ ខារ៉ាក់ជាទីប្រមូលផ្ដុំនៃសហគមន៍អ្នកកាន់សាសនាគ្រិស្តនិកាយអ័រតូដុក។ ការបាញ់ប្រហារទៅលើហ្វូងមនុស្សនៅព្រះវិហារអ័រតូដុកនៅខារ៉ាក់នោះកើតឡើងកាលពីថ្ងៃសុក្រនៅពេលគ្រិស្តបរិស័ទកំពុងរៀបចំពិធីបុណ្យសព។
មានសេចក្ដីរាយការណ៍ថាបុរសទាំងបីនាក់នោះនៅសុខៗស្រាប់តែលើកកាំភ្លើងបាញ់ប្រហារយកមួយឈ្នះដៃតែម្ដង។ រហូតមកដល់ពេលនេះ មិនទាន់មានក្រុមណាមួយប្រកាសថានេះជាស្នាដៃរបស់ខ្លួននៅឡើយទេ ហើយរដ្ឋាភិបាលហ្សកដង់ក៏មិនទាន់ចោទប្រកាន់ជាផ្លូវការទៅលើចលនាប្រដាប់អាវុធណាមួយនៅឡើយដែរ។ រដ្ឋមន្ត្រីក្រសួងមហាផ្ទៃហ្សកដង់ លោកម៉ាហ្សេន អាល់ហ្វារ៉ាយ៉ា (Mazen Al-Faraya) បានកំណត់មុខសញ្ញាថាគឺអ្នកទាំងបីនេះហើយដែលត្រូវតែទទួលខុសត្រូវនៅក្នុងអំពើបាញ់ប្រហារ។
លោកថ្លែងនៅក្នុងបទសម្ភាសតាមទូរស័ព្ទជាមួយទូរទស្សន៍រដ្ឋហ្សកដង់ថាសេវាសន្តិសុខបំពេញភារកិច្ចរបស់ខ្លួនបានយ៉ាងល្អ និងឈានទៅដល់ការចាប់ខ្លួនអ្នកដែលប្រព្រឹត្តអំពើភេរវកម្មនេះ។ ពួកគេ (ជនសង្ស័យ) ខំប្រឹងតស៊ូយ៉ាងក្រាញននាលដើម្បីតតាំងជាមួយសមត្ថកិច្ចរបស់យើង, ប៉ុន្តែទៅមិនរួចទេ, នៅទីបញ្ចប់ យើងសង្កត់ពួកគេជាប់ ហើយចាប់ខ្លួនបានទាំងរស់យកទៅដាក់ឃុំ។ ពួកគេក៏រងរបួសធ្ងន់គួរសមផងដែរ។ លោកបញ្ជាក់ថាមនុស្សសរុបបីនាក់ពាក់ព័ន្ធនឹងការបាញ់ប្រហារនេះ។
បន្ទាប់ពីអំពើភេរវកម្មនោះបញ្ចប់ទៅមិនយូរប៉ុន្មាន យើងអាចកំណត់មុខសញ្ញារបស់ពួកគេបានជាបណ្ដើរៗ។ សមត្ថកិច្ចរបស់យើងបានប្រើប្រាស់វិធានការសរុបដើម្បីធ្វើយ៉ាងណាត្រូវតែចាប់ពួកគេឱ្យបាន។ ដំណឹងនេះបានលេចឮដល់ព្រះមហាក្សត្រហ្សកដង់ ព្រះចៅអាប់ឌុលឡា។ ព្រះអង្គណែនាំឱ្យអាជ្ញាធរចាត់វិធានការឆ្លើយតបដោយកណ្ដាប់ដៃដែក មានន័យថាកុំបន្ធូរដៃឱ្យសោះ ចំពោះសកម្មភាពដែលខុសនឹងជំនឿរបស់សាសនាឥស្លាម និងចំពោះអ្នកដែលធ្វើឱ្យបែកបាក់សាមគ្គីភាពនៅក្នុងចំណោមប្រជារាស្ត្រហ្សកដង់៕ ប្រភព៖ AP
ចែករំលែកព័តមាននេះ