ឈឺពោះគ្រប់ខែ! ប្តីជូនមិនទាន់ដល់ពេទ្យផង សម្រាលកូនតាមផ្លូវ ក្នុងបរិវេណក្រុងអង្គរធំ
- សៀមរាប
ខេត្តសៀមរាប ៖ ស្ត្រីម្នាក់បានឈឺពោះសម្រាលបានទារកមួយនៅតាមផ្លូវខាងជើងខ្លោងទ្វារទន្លេអុំ ក្នុងបរិវេណក្រុងអង្គរធំ បង្កការភ្ញាក់ផ្អើលដល់សមត្ថកិច្ច ត្រូវបានក្រុមគ្រូពេទ្យសម្ភពនៃមន្ទីរពេទ្យបង្អែកខេត្តសៀមរាប មកជួយសម្រាលបានទាន់ពេលវេលា នៅតាមផ្លូវធ្វើឱ្យម្តាយនិងកូនមានសុវត្ថិភាពទាំង២នាក់ ។
ហេតុការណ៍ស្ត្រីឆ្លងទន្លេតាមផ្លូវនេះបានកើតឡើងនៅថ្ងៃទី២៣ តុលា ២០២៦ ក្នុងភូមិគោកតាចាន់ សង្កាត់គោកចក ក្រុងសៀមរាប ។
បើតាមប្រភពពីមន្ត្រីនគរបាលមូលដ្ឋានសង្កាត់គោកចក បានប្រាប់ឱ្យដឹងនៅល្ងាចថ្ងៃទី២៣ ខែតុលា ឆ្នាំ២០២៦ថា ក្រោយទទួលបានដំណឹងថា មានស្ត្រីឈឺពោះសម្រាលកូនតាមផ្លូវនៅខាងជើងខ្លោងទ្វារទន្លេអុំ ក្នុងបរិវេណក្រុងអង្គរធំ ត្រូវបានក្រុមគ្រូពេទ្យផ្នែកសម្ភពនៃមន្ទីរពេទ្យបង្អែកខេត្តសៀមរាប បានចេញទៅជួយសង្គ្រោះ និងជួយសម្រាលបានទារក ទម្ងន់៣គីឡូក្រាម ដែលការសម្រាលនោះនៅវេលាម៉ោង៨និង៣០នាទីព្រឹកថ្ងៃទី២៣ ខែតុលា ឆ្នាំ២០២៦ ដោយសុវត្ថិភាពទាំងម្តាយ និងកូន ។ ម្តាយរូបនេះមានអាយុ៣១ឆ្នាំ និងឪពុកអាយុ៤០ឆ្នាំ ។
បច្ចុប្បន្នស្ត្រីជាម្តាយនិងកូនប្រុសកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប ។
សូមបញ្ជាក់ថា ស្ត្រីដែលសម្រាលកូននេះជាអ្នកភូមិអង្គរក្រៅ ក្នុងសង្កាត់គោកចក ក្រុងសៀមរាបបានព្យាយាមជិះម៉ូតូជាមួយប្តីមកកាន់មន្ទីរពេទ្យព្រោះឈឺពោះគ្រប់ខែ ។ ប៉ុន្តែពេលប្តីជូនតាមម៉ូតូមកមិនទាន់បានដល់ពេទ្យទេ ដោយសារឈឺពោះខ្លាំក៏ឈប់ម៉ូតូនៅក្បែរខ្លោងទ្វារអង្គរធំសម្រាលកូនតែម្តង ។ គាត់ឱ្យដឹងថា នេះជាកូនទី២ដែលគាត់បានសម្រាល តែកូនទី១ បានស្លាប់ទៅហើយ ៕
ចែករំលែកព័តមាននេះ