កំណាយផូស៊ីលឈើលើកទី២ រំពឹងរកឃើញស្លាកស្នាមបេតិកភណ្ឌធម្មជាតិដ៏មានតម្លៃ
- ស្ទឹងត្រែង
ខេត្តស្ទឹងត្រែង៖ ក្រុមមន្ត្រីជំនាញនៃក្រសួងបរិស្ថាន បានចាប់ផ្តើមបេសកកម្មសិក្សាស្រាវជ្រាវ និងធ្វើកំណាយផូស៊ីលឈើជាលើកទី២ នៅតំបន់ភ្នំភូង៉យ ស្ថិតក្នុងភូមិកាតូត ឃុំកំភុន ស្រុកសេសាន ខេត្តស្ទឹងត្រែង ចាប់ពីថ្ងៃទី២១ ដល់ថ្ងៃទី៣០ ខែតុលា ឆ្នាំ២០២៦ ។ ការស្រាវជ្រាវនេះក្នុងគោលបំណងស្វែងរកភស្តុតាងវិទ្យាសាស្ត្របន្ថែម ព្រមទាំងរៀបចំវិធានការការពារ និងអភិរក្សធនធានបេតិកភណ្ឌធម្មជាតិឱ្យបានគង់វង្ស ។
ប្រធានការិយាល័យនៃនាយកដ្ឋានបេតិកភណ្ឌធម្មជាតិ ចំណុះអគ្គនាយកដ្ឋានសហគមនន៍មូលដ្ឋាននៃក្រសួងបរិស្ថាន លោកលឹម វណ្ណច័ន្ទ បញ្ជាក់ថា ការធ្វើកំណាយលើកទី១ នៅតំបន់ភ្នំភូង៉យ កាលពីខែកក្កដា ឆ្នាំ២០២៥ បានផ្តល់លទ្ធផលគួរឱ្យចាប់អារម្មណ៍ ដោយក្រុមការងារបានរកឃើញសំណល់ផូស៊ីលឈើដែលមានអង្កត់ផ្ចិតប្រមាណ១ម៉ែត្រ និងប្រវែងប្រហែល១៧ម៉ែត្រ ។ តាមការសិក្សាវាយតម្លៃជាបឋម សំណល់ផូស៊ីលឈើនេះអាចមានអាយុកាលចាប់ពី១០០.០០០ឆ្នាំ រហូតដល់២លានឆ្នាំ និងត្រូវបានសន្និដ្ឋានថា មានប្រភពពីរុក្ខជាតិមានផ្កា និងផ្លែ ក្នុងក្រុម Dicot ដែលជាក្រុមរុក្ខជាតិមានវត្តមានទូលំទូលាយរហូតមកដល់សម័យបច្ចុប្បន្ន ។
ក្នុងដំណើរការកំណាយកាលពីឆ្នាំ២០២៥ ក្រុមអ្នកជំនាញបានរកឃើញសំណល់ដើមឈើដែលមានប្រវែងរហូតដល់ប្រមាណ៤០ម៉ែត្រ និងអង្កត់ផ្ចិតប្រហែល១ម៉ែត្រ ព្រមទាំងបានប្រទះឃើញផូស៊ីលដើមឈើមួយទៀតនៅក្បែរនោះ ដែលមានប្រវែងប្រមាណ១០ម៉ែត្រ ។ ការរកឃើញទាំងនេះបានបង្ហាញពីសក្តានុពលនៃតំបន់នេះ ក្នុងការសិក្សាស្រាវជ្រាវអំពីប្រវត្តិនៃធនធានធម្មជាតិ និងការវិវត្តរបស់រុក្ខជាតិនៅអតីតកាល ។
ដោយសារកំណាយលើកមុនទទួលបានលទ្ធផលវិជ្ជមាន ក្រសួងបរិស្ថានបានបន្តអនុវត្តការសិក្សា និងកំណាយលើកទី២ក្នុងឆ្នាំ២០២៦ ដោយរំពឹងថានឹងអាចកំណត់អត្តសញ្ញាណ និងសិក្សាលម្អិតលើសំណល់ផូស៊ីលដើមឈើដែលមានប្រវែងលើសពី៤០ម៉ែត្រ នៅក្នុងតំបន់តែមួយ ។
ក្រុមអ្នកជំនាញនឹងបន្តប្រមូល និងចងក្រងទិន្នន័យវិទ្យាសាស្ត្រ ពិនិត្យលក្ខណៈភូគព្ភសាស្ត្រ និងសិក្សាពីស្រទាប់ដីថ្មដែលផ្ទុកផូស៊ីល ដើម្បីជាមូលដ្ឋានក្នុងការរៀបចំផែនការគ្រប់គ្រង និងការពារទីតាំងបេតិកភណ្ឌធម្មជាតិដ៏មានតម្លៃនេះ ។ ការងារនេះក៏មានសារសំខាន់ក្នុងការទប់ស្កាត់ការខូចខាត ឬការបំផ្លាញទីតាំងផូស៊ីល និងធានាឱ្យធនធានទាំងនេះអាចបន្តបម្រើដល់ការសិក្សាស្រាវជ្រាវ និងការអប់រំសម្រាប់មនុស្សជំនាន់ក្រោយ ។
យោងតាមទិន្នន័យក្រសួងបរិស្ថាន ដែលបានចងក្រង គិតត្រឹមឆ្នាំ២០២៦ ក្រុមការងារជំនាញបានកំណត់ និងចុះបញ្ជីទីតាំងស្ថានីយផូស៊ីលចំនួន៧៨កន្លែង នៅតាមបណ្តាខេត្តចំនួន១៣ រួមមាន ព្រះវិហារ បន្ទាយមានជ័យ បាត់ដំបង មណ្ឌលគិរី រតនគិរី ក្រចេះ ប៉ៃលិន ឧត្តរមានជ័យ កំពត កោះកុង កំពង់ធំ ពោធិ៍សាត់ និងស្ទឹងត្រែង ។ ទិន្នន័យនេះជាផ្នែកសំខាន់មួយសម្រាប់ការគ្រប់គ្រង និងរៀបចំផែនការអភិរក្សស្ថានីយផូស៊ីលនៅទូទាំងប្រទេស ។
កន្លងមកក្រសួងបរិស្ថានក៏បានអនុវត្តគម្រោងសិក្សា និងធ្វើកំណាយផូស៊ីលនៅតាមតំបន់មួយចំនួនផងដែរ ក្នុងនោះមានការកំណាយផូស៊ីលឈើនៅស្រុកលំផាត់ ក្នុងឆ្នាំ២០១៩-២០២០ ការរកឃើញផូស៊ីលឆ្អឹងដាយណូស័រដំបូងនៅកម្ពុជា ក្នុងឆ្នាំ២០២២ ការកំណាយផូស៊ីលឈើនៅតំបន់ភ្នំត្បែង ខេត្តព្រះវិហារ ក្នុងឆ្នាំ២០២៤ និងការធ្វើកំណាយផូស៊ីលឈើនៅស្រុកសេសាន ខេត្តស្ទឹងត្រែង ជាលើកទី១ ក្នុងឆ្នាំ២០២៥ ដែលបានបន្តមកដល់ការសិក្សាលើកទី២ នៅឆ្នាំ២០២៦ ។
កិច្ចការស្រាវជ្រាវ និងកំណាយទាំងនេះផ្តោតលើការឈ្វេងយល់ពីលក្ខណៈរូបសាស្ត្ររបស់ផូស៊ីល ប្រភេទស្រទាប់ភូគព្ភសាស្ត្រដែលផ្ទុកសំណល់បុរាណ ការប្រមូលភស្តុតាងវិទ្យាសាស្ត្រ និងការវាយតម្លៃលើវិធានការការពារឱ្យសមស្របតាមស្ថានភាពជាក់ស្តែង ។ លទ្ធផលដែលទទួលបាននឹងជួយពង្រឹងចំណេះដឹងអំពីប្រវត្តិធម្មជាតិរបស់កម្ពុជា និងបង្កើនប្រសិទ្ធភាពនៃការអភិរក្សបេតិកភណ្ឌធម្មជាតិឱ្យមាននិរន្តរភាព សម្រាប់ប្រជាពលរដ្ឋបច្ចុប្បន្ន និងមនុស្សជំនាន់ក្រោយ ៕
ចែករំលែកព័តមាននេះ