ទីក្រុងគូឡាឡាំពួ ៖ យោងតាមប្រភពពីសារព័ត៌មានម៉ាឡេស៊ី BusinessToday កាលពីថ្ងៃទី២៤ ខែតុលា បានរាយការណ៍ថា នាយករដ្ឋមន្ត្រីម៉ាឡេស៊ី លោក Anwar Ibrahim បានថ្លែងថា ប្រទេសម៉ាឡេស៊ីត្រៀមខ្លួនជាស្រេចក្នុងការចំណាយថវិការហូតដល់ ៤៥ ពាន់លានរីងហ្គីត ឬជាង ១១ ពាន់លានដុល្លារអាមេរិក ក្នុងមួយឆ្នាំ សម្រាប់ការឧបត្ថម្ភលើតម្លៃប្រេងឥន្ធនៈ ដើម្បីការពារប្រជាពលរដ្ឋពីផលប៉ះពាល់នៃការកើនឡើងតម្លៃថាមពលសកល។
លោក Anwar បានលើកឡើងថា រដ្ឋបាលរបស់លោកនៅតែបន្តប្តេជ្ញាចិត្តរក្សាថ្លៃប្រេងសាំងធម្មតា RON95 (ម៉ាឡេស៊ី RON95 ជាសាំងធម្មតា) នៅក្នុងតម្លៃ ១,៩៩ រីងហ្គីត ឬស្មើប្រហែល ២ ០០០រៀលក្នុងមួយលីត្រ បើទោះបីជាតម្លៃប្រេងឆៅអន្តរជាតិហក់ឡើងដល់ពី ១២០ ដល់ ១៣០ ដុល្លារអាមេរិក ក្នុងមួយបារ៉ែល ក៏ដោយ។
ការឧបត្ថម្ភនេះ នឹងជួយការពារប្រជាពលរដ្ឋ ជាពិសេសគ្រួសារចំណូលទាប និងមធ្យមពីការកើនឡើងថ្លៃដើមឥន្ធនៈ និងសម្ពាធកើនឡើងលើការចំណាយប្រចាំថ្ងៃ។ នេះបើតាមលោក Anwar ថ្លែងនៅក្នុងកម្មវិធី Sentuhan Kasih MADANI និងពិធីបើកផែនការសកម្មភាពចំណាយជីវភាពរស់នៅជាតិឆ្នាំ ២០៣០ នៅឯពហុកីឡដ្ឋាន Hang Jebat ក្នុងតំបន់គ្រូបុង (Krubong) កាលពីថ្ងៃទី២៤ ខែតុលា។
លោកបានបន្តថា ការដំឡើងថ្លៃឥន្ធនៈ ស្របទៅតាមអត្រាទីផ្សារអាចធ្វើឱ្យការចំណាយប្រចាំថ្ងៃរបស់អ្នកប្រើប្រាស់កើនឡើងពី ២ ទៅ ៥ រីងហ្គីត ឬច្រើនជាងនេះ។ សម្រាប់ឪពុកម្តាយប្រើប្រាស់រថយន្តជូនកូនទៅសាលារៀន មុននឹងបន្តដំណើរទៅកន្លែងធ្វើការនោះ ការចំណាយបន្ថែមអាចឡើងដល់ ១០ រីងហ្គីតក្នុងមួយថ្ងៃ។ លោកនាយករដ្ឋមន្ត្រីម៉ាឡេស៊ីបានបន្ថែមដូច្នេះថា «វាប្រសើរជាងដែលរដ្ឋាភិបាលជាអ្នកទ្រាំទ្របន្ទុកនេះ ជាជាងការទម្លាក់បន្ទុកទៅលើប្រជាពលរដ្ឋ»៕
ចែករំលែកព័តមាននេះ