កម្ពុជាចាប់ផ្តើមកម្មវិធីហ្វឹកហ្វឺននៃកាតព្វកិច្ចយោធា នៅថ្ងៃទី៩ វិច្ឆិកាខាងមុខ
- ភ្នំពេញ
នាយករដ្ឋមន្ត្រី សម្តេចធិបតី ហ៊ុន ម៉ាណែត បានប្រកាស កាលពីថ្ងៃសៅរ៍ថា កម្ពុជានឹងចាប់ផ្តើមកម្មវិធីហ្វឹកហ្វឺនយុវជនដែលបានស្ម័គ្រចិត្តចូលបម្រើកាតព្វកិច្ចកងទ័ពរបស់ប្រទេស នៅថ្ងៃទី៩ ខែវិច្ឆិកា ឆ្នាំ២០២៦ ដែលចំថ្ងៃបុណ្យឯករាជ្យជាតិ ។
នាយករដ្ឋមន្ត្រី បានថ្លែងបែបនេះ នៅក្នុងពិធីអបអរសាទរខួបលើកទី២០ នៃការចូលរួមរបស់កម្ពុជាក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ និងពិធីសម្ពោធសមិទ្ធផលនានានៅមជ្ឈមណ្ឌលបណ្តុះបណ្តាលរក្សាសន្តិភាពពហុជាតិសាសន៍ ក្នុងខេត្តកំពង់ស្ពឺ ។
សម្តេចធិបតី បានមានប្រសាសន៍ថា ថ្ងៃទី៩ ខែវិច្ឆិកា ឆ្នាំ២០២៦ គឺជាកាលបរិច្ឆេទដែលបានកំណត់សម្រាប់ការបង្កើតកងទ័ព ហើយក៏ជាថ្ងៃបុណ្យឯករាជ្យជាតិផងដែរ ។ ថ្ងៃនេះនឹងក្លាយជាចំណុចចាប់ផ្តើមនៃការអនុវត្តច្បាប់ស្តីពីកាតព្វកិច្ចយោធា ដើម្បីជួយពង្រឹងកងកម្លាំងប្រដាប់អាវុធរបស់យើង» ។
សម្តេចធិបតីបានសង្កត់ធ្ងន់ថា ចាប់ពីកាលបរិច្ឆេទនោះតទៅ កម្ពុជានឹងបន្តជ្រើសរើសយុវជនចូលបម្រើកាតព្វកិច្ចនេះជាដំណាក់កាលៗ ដោយផ្អែកលើតម្រូវការជាក់ស្តែងរបស់កងកម្លាំងប្រដាប់អាវុធ ។
នាយករដ្ឋមន្ត្រីក៏បានស្វាគមន៍ចំពោះយុវជនដែលបានស្ម័គ្រចិត្តចូលបម្រើកងទ័ព និងបានសម្តែងការកោតសរសើរចំពោះការប្តេជ្ញាចិត្តរបស់ពួកគេ ព្រមទាំងបានលើកទឹកចិត្តឱ្យពួកគេចូលរួមចំណែកក្នុងការពង្រឹងការការពារជាតិ ។
បើតាមសម្តេចធិបតី យុវជនជិត១៥.០០០ នាក់ បានដាក់ពាក្យស្ម័គ្រចិត្តចូលបម្រើកាតព្វកិច្ចយោធា ក្នុងរយៈពេល ១៣ ថ្ងៃកន្លងមកនេះ។
សម្តេចបានបន្ថែមថា គំនិតផ្តួចផ្តើមនេះគឺជាជំហានដ៏សំខាន់មួយឆ្ពោះទៅរកការអនុវត្តច្បាប់ស្តីពីកាតព្វកិច្ចយោធា និងការពង្រឹងសមត្ថភាពកងយោធពលខេមរភូមិន្ទ តាមរយៈការចូលរួមរបស់យុវជនជំនាន់ក្រោយ ៕
ចែករំលែកព័តមាននេះ