មន្ត្រីបរិស្ថានខេត្តក្រចេះបង្ក្រាបទីតាំងរុករករ៉ែខុសច្បាប់នៅស្រុកសំបូរ ដកហូតគោយន្ត៤គ្រឿង និងសម្ភារពាក់ព័ន្ធទៀត
- ក្រចេះ
ខេត្តក្រចេះ ៖ មន្ត្រីជំនាញនៃមន្ទីរបរិស្ថានខេត្តក្រចេះ បានចុះប្រតិបត្តិការទប់ស្កាត់សកម្មភាពរុករករ៉ែខុសច្បាប់មួយកន្លែង នៅតំបន់អូរឃ្មង ស្ថិតក្នុងឃុំកំពង់ចាម ស្រុកសំបូរ ខេត្តក្រចេះ ដោយដកហូតគោយន្តចំនួន៤គ្រឿង ក្បាលបូម៤គ្រឿង និងទុយោប្រវែង៦០ម៉ែត្រ ដើម្បីចាត់ការតាមនីតិវិធីច្បាប់ ។
ប្រតិបត្តិការនេះ ធ្វើឡើងនៅថ្ងៃទី២៣ ខែតុលា ឆ្នាំ២០២៦ ក្រោមការដឹកនាំរបស់អនុប្រធានការិយាល័យដែនជម្រកសត្វព្រៃ ដោយមានការចូលរួមពីប្រធានស្នាក់ការ និងមន្ត្រីឧទ្យានុរក្សតាមការបញ្ជា និងការណែនាំរបស់លោក គា បូ ប្រធានមន្ទីរបរិស្ថាន ខេត្តក្រចេះ ។
បើតាមមន្ត្រីជំនាញអោយដឹងថា ទីតាំងដែលមន្ត្រីចុះអនុវត្តវិធានការនេះ ស្ថិតនៅចំណុចអូរឃ្មង ក្នុងភូមិសាស្ត្រឃុំកំពង់ចាម ។ ក្រោយបញ្ចប់ប្រតិបត្តិការ វត្ថុតាងទាំងអស់ត្រូវបានដឹកជញ្ជូនទៅរក្សាទុកជាបណ្តោះអាសន្ននៅស្នាក់ការគម្ពោតគយ ដើម្បីរៀបចំសំណុំរឿង និងបន្តនីតិវិធីពាក់ព័ន្ធ ។
លោក គា បូ ប្រធានមន្ទីរបរិស្ថានខេត្តក្រចេះបានលើកឡើងថា ការបង្ក្រាបបទល្មើសធនធានធម្មជាតិនៅតាមតំបន់ព្រៃការពារ និងដែនជម្រកសត្វព្រៃ នៅតែប្រឈមនឹងបញ្ហាប្រឈមជាច្រើន ដោយសារទីតាំងស្ថិតនៅតំបន់ដាច់ស្រយាល ផ្លូវធ្វើដំណើរមានការលំបាក និងសកម្មភាពល្មើសដែលតែងកើតឡើងដោយលួចលាក់នៅពេលយប់ ឬពេលគ្មានមន្ត្រីអនុវត្តច្បាប់នៅក្បែរ ។ ទោះជាយ៉ាងណា មន្ត្រីឧទ្យានុរក្សនៅតែបន្តបំពេញភារកិច្ច ដើម្បីទប់ស្កាត់ការបំផ្លិចបំផ្លាញធនធានធម្មជាតិ ។
លោកបានបញ្ជាក់បន្ថែមថា ការរុករករ៉ែមាសដោយខុសច្បាប់អាចបង្កផលប៉ះពាល់យ៉ាងធ្ងន់ធ្ងរដល់បរិស្ថាន ដូចជាការបំផ្លាញដីព្រៃ និងប្រព័ន្ធអេកូឡូស៊ី ការបាត់បង់ជម្រកសត្វព្រៃ ការប្រែប្រួលលំហូរទឹកធម្មជាតិ ព្រមទាំងហានិភ័យនៃការបំពុលប្រភពទឹកដោយសារធាតុគីមីដែលអាចប្រើប្រាស់ក្នុងដំណើរការលាងរ៉ែ ។ ផលប៉ះពាល់ទាំងនេះ ក៏អាចគំរាមកំហែងដល់ជីវចម្រុះ និងសុវត្ថិភាពធនធានធម្មជាតិនៅក្នុងតំបន់ការពារផងដែរ ។
ជាមួយគ្នានេះ មន្ទីរបរិស្ថានខេត្តក្រចេះ បានបញ្ជាក់ពីការប្តេជ្ញាចិត្តក្នុងការបង្កើនការចុះល្បាត និងពង្រឹងវិធានការទប់ស្កាត់បទល្មើសធនធានធម្មជាតិគ្រប់ប្រភេទ ដោយផ្តោតលើការការពារព្រៃឈើ ជីវចម្រុះ និងប្រព័ន្ធអេកូឡូស៊ី ដើម្បីធានាការអភិរក្សធនធានធម្មជាតិប្រកបដោយចីរភាពសម្រាប់មនុស្សជំនាន់ក្រោយ ៕
ចែករំលែកព័តមាននេះ