រាជធានីភ្នំពេញ ៖ បន្ទាប់ពីមានការផ្សព្វផ្សាយនៅក្នុងបណ្ដាញសង្គម ដោយចោទប្រកាន់ថា ជនស៊ីវិលឃាត់យុវជន គ្មានមូលហេតុ នៅសង្កាត់បឹងសាឡាង ខណ្ឌទួលគោក នគរបាលរាជធានីភ្នំពេញ បានធ្វើការបំភ្លឺថា ករណីនោះ គឺជាករណីដែលសមត្ថកិច្ចស្លៀកពាក់ឯកសណ្ឋាន និងស៊ីវិល បង្ក្រាបក្រុមក្មេងទំនើង ដែលបង្កហិង្សាវាយប្លន់យកម៉ូតូមិនបានសម្រេច ។
តាមក្រុមការងារព័ត៌មាន និងប្រតិកម្មរហ័ស នៃស្នងការនគរបាលរាជធានីភ្នំពេញ បានធ្វើការបំភ្លឺឲ្យដឹងថា នាថ្ងៃទី២២ ខែតុលា ឆ្នាំ២០២៦ វេលាម៉ោង១៩:០០នាទី កម្លាំងការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងប៉ុស្តិ៍នគរបាលរដ្ឋបាលបឹងសាឡាង នៃអធិការដ្ឋាននគរបាលខណ្ឌទួលគោក ប្រើប្រាស់កម្លាំងស្លៀកពាក់ឯកសណ្ឋាននគរបាល និងស៊ីវិលផង ចុះស្រាវជ្រាវឃាត់ខ្លួនជនសង្ស័យជាក្មេងទំនើង០១នាក់ នៅចំណុចផ្លូវលេខ៣៣៥ សង្កាត់បឹងសាទ្បាង ខណ្ឌទួលគោក រាជធានីភ្នំពេញ និងឃាត់បក្ខពួកបន្តបន្ទាប់ចំនួន៥នាក់ នៅទីតាំងផ្សេងទៀត នៅក្នុងភូមិសាស្ត្ររាជធានីភ្នំពេញ សរុបឃាត់ខ្លួនចំនួន៦នាក់ ពាក់ព័ន្ធអំពើលួចមានស្ថានទម្ងន់ទោស ដោយសារការប្រើអំពើហិង្សាវាយកាប់ប្លន់យកម៉ូតូមិនបានសម្រេច (បង្កដោយក្មេងទំនើង) បណ្តាលឲ្យជនរងគ្រោះ២នាក់ រងរបួសធ្ងន់ នៅចំណុចផ្លូវលំ ភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ វេលាម៉ោងប្រហែល១២និង៥៧នាទីយប់កាលពីថ្ងៃទី១៧ ខែតុលា ឆ្នាំ២០២៦។
តាមក្រុមការងារព័ត៌មាន និងប្រតិកម្មរហ័ស បានអោយដឹងទៀតថា ករណីនេះ នៅមុនពេលកើតហេតុជនរងគ្រោះ២នាក់ ជិះម៉ូតូ០១គ្រឿងឌុបគ្នា ចេញពីបន្ទប់ជួលដើម្បីរកអីហូប។ លុះធ្វើដំណើរមកដល់ចំណុចខាងលើ ក៏ជួប និងក្រុមក្មេងទំនើង០១ក្រុម ជិះម៉ូតូ៥គ្រឿង មានគ្នាប្រហែល១០នាក់ និងដាវ០១ដើម បានជិះម៉ូតូដេញវាយ និងកាប់ទៅលើជនរងគ្រោះ ខណៈនោះជនរងគ្រោះក៏បានជិះគេច និងជ្រុលចង្កូតទៅបុកនឹងបង់ថ្មអង្គុយតាមផ្លូវ បណ្តាលឲ្យដូលម៉ូតូហើយជនល្មើសក៏កាប់ និងវាយជនរងគ្រោះទាំង២នាក់ ដោយម្នាក់ត្រូវចំក្បាល និងម្នាក់ទៀតបាក់ថ្គាម បណ្តាលឲ្យរងរបួសធ្ងន់ ហើយជនល្មើសក្រោយធ្វើសកម្មភាពនាំគ្នាគេចខ្លួនបាត់ ។
ដោយឡែកជនរងគ្រោះ ត្រូវបានគេដឹកយកទៅសង្គ្រោះបន្ទាន់ នៅមន្ទីរពេទ្យមិត្តភាព កម្ពុជា-ចិន ព្រះកុសុមៈ។ ចំពោះម៉ូតូជនរងគ្រោះរងការខូចខាតធ្ងន់ ក្រុមជនល្មើសមិនបានយកទៅនោះទេ ដោយទុកចោលកន្លែងកើតហេតុ ។
តាមនគរបាលបានឲ្យដឹងទៀតថា នៅក្នុង ការឃាត់ខ្លួនជនសង្ស័យ សមត្ថកិច្ចដកហូតវត្តុតាង ម៉ូតូធ្វើសកម្មភាពចំនួន ២គ្រឿង។
បច្ចុប្បន្នជនសង្ស័យ ត្រូវបានកម្លាំងការិយាល័យជំនាញព្រហ្មទណ្ឌកំរិតស្រាល កំពុងឃាត់ខ្លួនយកមកសាកសួរអនុវត្តតាមនីតិវិធី។
ចំណែកបក្ខពួកនៅសេសសល់កំពុងគេចខ្លួន កម្លាំងជំនាញព្រហ្មទណ្ឌ បន្តស្រាវជ្រាវ ដើម្បីនាំយកមកផ្តន្ទាទោសតាមផ្លូវច្បាប់។
ចំពោះការបង្ក្រាបឃាត់ខ្លួនជនសង្ស័យជាក្មេងទំនើងខាងលើ គឺសមត្ថកិច្ចអនុវត្តតាមគោលការណ៍ច្បាប់ និងមានការសម្របសម្រួលនីតិវិធី ពីតំណាងអយ្យការអមសាលាដំបូងរាជធានីភ្នំពេញ ផងដែរ ។
ក្រុមការងារព័ត៌មាន និងប្រតិកម្មរហ័សនៃ ស្នងការនគរបាលរាជធានីភ្នំពេញ សូមអោយសាធារណជនមេត្តាជ្រាបជាព័ត៌មាន ដើម្បីកុំឲ្យមានការយល់ច្រឡំ ចំពោះករណីបង្ក្រាបឃាត់ខ្លួនជនសង្ស័យជាក្មេងទំនើងខាងលើនេះ ៕
ចែករំលែកព័តមាននេះ