ម៉ូតូ២គ្រឿងទាក់ដៃចង្កូតគ្នាដួ.លខ្ទា.តលើផ្លូវ រថយន្តមកដល់កិ.នបុគ្គលិកធនាគារម្នាក់របួ.សធ្ងន់
- ភ្នំពេញ
រាជធានីភ្នំពេញ ៖ បុរសជាបុគ្គលិកធនាគារម្នាក់ បានរងរបួសធ្ងន់ ខណៈពេលគាត់កំពុងជិះម៉ូតូ១គ្រឿង ស្រាប់តែមានម៉ូតូ១គ្រឿងទៀត ធ្វើដំណើស្របគ្នាទៅដល់មិនប្រយ័ត្នបានទាក់ដៃចង្កូតម៉ូតូរបស់គាត់ បណ្ដាលឲ្យគាត់ដួលខ្ទាតលើផ្លូវ ។ ស្របពេលនោះក៏មានរថយន្ត១គ្រឿងបើកស្របគ្នាដែរ ទៅដល់ជាន់ហ្វ្រាំងឈប់ក៏មិនទាន់ ហើយគេចចេញក៏មិនទាន់ ក៏បានកិនគាត់ចំស្មាចំហៀងខាងឆ្វេង បណ្ដាលឲ្យរងរបួសបាក់ឆ្អឹងដងកាំបិតឆ្វេងតែម្ដង ។
ឧប្បត្តិហេតុគ្រោះថ្នាក់ចរាចរណ៍ខាងលើបានកើតឡើងកាលពីវេលាម៉ោង៩ព្រឹកថ្ងៃទី២៣ ខែតុលា ឆ្នាំ២០២៦ នៅតាមមហាវិថីសហព័ន្ធរុស្ស៊ី ត្រង់ចំណុចខាងលិចអតីតអាកាសយានដ្ឋានអន្តរជាតិភ្នំពេញ ជិតវត្តទួលសុភាឃួន ស្ថិតនៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បុរសរងគ្រោះឈ្មោះផន កក្កដា អាយុ៤៣ឆ្នាំ ជាបុគ្គលិកធនាគារ ស្នាក់នៅក្នុងបុរីលឹមឈាង ហាក់ ភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុ បុរសរងគ្រោះបានជិះម៉ូតូ១គ្រឿងម៉ាកHonda PCX ពណ៍ខ្មៅលាយក្រហម ពាក់ស្លាកលេខភ្នំពេញ1IO-3444 ធ្វើដំណើរតាមមហាវិថីសហព័ន្ធរុស្ស៊ី ក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុ ស្រាប់តែមានម៉ូតូ១គ្រឿងទៀតបើកស្របគ្នាទៅដល់ទាក់ដៃចង្កូតម៉ូតូគាត់ បណ្ដាលឲ្យដួលខ្ទាតទៅលើថ្នល់ ។
សមត្ថកិច្ចបានប្រាប់ឲ្យដឹងបន្តទៀតថា ស្របពេលនោះក៏មានរថយន្ត១គ្រឿងម៉ាកJMC ពណ៍ខ្មៅ ពាក់ស្លាកលេខ ភ្នំពេញ 2CE-2398 ធ្វើដំណើរក្នុងទិសដៅស្របគ្នាដែរ ទៅដល់ជាន់ហ្វ្រាំងឈប់ក៏មិនទាន់ ហើយគេចចេញក៏មិនទាន់ ក៏បានកិនគាត់ចំស្មាចំហៀងខាងឆ្វេង បណ្ដាលឲ្យរងរបួសបាក់ឆ្អឹងដងកាំបិត ។ បន្ទាប់មកម៉ូតូបង្កមិនចាំម៉ាក ដែលបានទាក់ដៃចង្កូតម៉ូតូបុរសរងគ្រោះ បណ្ដាលឲ្យមានគ្រោះថ្នាក់កើតឡើងនោះ ក៏បានគេចបាត់ស្រមោលតែម្ដង ដោយឡែកអ្នកបើកបររថយន្តJMC ត្រូវបាននគរបាលឃាត់ខ្លួននាំយកទៅសួរនាំ ។
សមត្ថកិច្ចបានបញ្ញាក់ប្រាប់ឲ្យដឹងបន្តថា ក្រោយពេលកើតហេតុ រថយន្តសង្គ្រោះមន្ទីរពេទ្យបង្អែកពោធិ៍ចិនតុងបានដឹកយកបុរសរងគ្រោះទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ ។ ចំណែកនគរបាលចរាចរណ៍ខណ្ឌពោធិ៍សែនជ័យ បានធ្វើការវាស់វែង រួចនាំយករថយន្តនិងម៉ូតូទៅរក្សាទុករង់ចាំការដោះស្រាយតាមផ្លូវច្បាប់ ៕
ចែករំលែកព័តមាននេះ