រដ្ឋមន្ត្រីក្រសួងកិច្ចការនារី៖ ភូមិហ្វ្រង់កូហ្វូនីបើកទ្វាររង់ចាំសាធារណជនចូលទស្សនាដោយឥតគិតថ្លៃរយៈពេល៥ថ្ងៃ
- ភ្នំពេញ
រាជធានីភ្នំពេញ ៖ ក្នុងរយៈពេល៥ថ្ងៃ ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ភូមិហ្វ្រង់កូហ្វូនី បានបើកទ្វារជូនសាធារណជនចូលទស្សនាដោយឥតគិតថ្លៃ ហើយរំពឹងថា នឹងស្វាគមន៍ភ្ញៀវប្រហែល១០០.០០០នាក់ ទាំងក្នុងនិងក្រៅប្រទេសកម្ពុជាមកទស្សនា ។ នេះបើតាមការបញ្ជាក់របស់រដ្ឋមន្ត្រីក្រសួងកិច្ចការនារី ។
លោកជំទាវកិត្ដិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានអនុគណៈកម្មការទី៥ ទទួលបន្ទុកព្រឹត្តិការណ៍អមនៃកិច្ចប្រជុំកំពូលហ្វ្រង់កូហ្វូនីលើកទី២០ ក្នុងពិធីបើកភូមិហ្វ្រង់កូហ្វូនី (Francophonie Village) បានលើកឡើងនៅថ្ងៃទី១៣ ខែវិច្ឆិកា ឆ្នាំ២០២៦ ថា ភូមិហ្វ្រង់កូហ្វូនីនេះ មានសមាសភាពសំខាន់ៗមួយចំនួន៖
ទី១-ពន្លាចំនួន៧៣ តំណាងឱ្យបណ្តាប្រទេស និងដៃគូហ្វ្រង់កូហ្វូនី ផ្តល់ឱកាសឱ្យភ្ញៀវបានស្វែងយល់ពីវប្បធម៌ និងប្រពៃណីដ៏ចម្រុះនៃសហគមន៍របស់យើង។
ទី២-ពន្លានៃព្រះរាជាណាចក្រកម្ពុជា បង្ហាញពីបេតិកភណ្ឌដ៏សម្បូរបែប សក្តានុពលទេសចរណ៍ និងវឌ្ឍនភាពសេដ្ឋកិច្ចសង្គម ដែលសម្រេចបានតាមរយៈសុខសន្តិភាព និងស្ថិរភាព។
ទី៣-ពន្លា OIF បង្ហាញពីសមិទ្ធផលនៃកិច្ចសហប្រតិបត្តិការហ្វ្រង់កូហ្វូនី និងទស្សនវិស័យអនាគតរបស់ខ្លួន ។
ទី៤-ស្តង់ពិព័រណ៍ចំនួន១៣០ ដាក់បង្ហាញពីជំនាញ ផលិតផល និងគំនិតផ្តួចផ្តើមរបស់ស្ថាប័ន អាជីវកម្ម សិប្បករ និងដៃគូរបស់យើង។
ទី៥-ភូមិសម្ភារៈម្ហូបអាហារ ដែលមានចំនួន៣០ស្តង់ នឹងនាំអ្នកទស្សនាធ្វើដំណើរកម្សាន្តផ្នែកអាហារសាស្ត្រ តាមរយៈរសជាតិផ្សេងៗគ្នានៃពិភពលោកនិយាយភាសាបារាំង។
ទី៦-ទន្ទឹមនឹងនេះ កិច្ចប្រជុំតុមូលចំនួន ៣០ និងការសម្តែងសិល្បៈ និងវប្បធម៌ចំនួន ៥០ នឹងផ្តល់ឱកាសសម្រាប់ការចែករំលែកបទពិសោធន៍ ការជំរុញកិច្ចសន្ទនា និងការស្វែងរកទេពកោស ល្យរបស់សហគមន៍ហ្វ្រង់កូហ្វូនី។
ក្រៅពីសកម្មភាពទាំងនេះ មហិច្ឆតារបស់យើង គឺធ្វើឱ្យភូមិមួយនេះក្លាយជារោងប្រជុំដ៏រស់រវើកដែលវប្បធម៌ជួបគ្នា គំនិតបង្កើតថ្មីរីកចម្រើន និងឱកាសថ្មីៗសម្រាប់កិច្ចសហប្រតិបត្តិការចាប់ផ្តើមបង្កើតជារូបរាងឡើង ។ លោកជំទាវបណ្ឌិតបានលើកឡើងថា ប្រធានបទនៃកិច្ចប្រជុំកំពូលហ្វ្រង់កូហ្វូនី លើកទី២០ គឺ«ការវិនិយោគលើសន្តិភាពឡើងវិញ ដើម្បីភាពរុងរឿងរួម និងស្ថិរភាពយូរអង្វែង» គឺមានអត្ថន័យសំខាន់ខ្លាំងណាស់សម្រាប់ប្រទេសកម្ពុជា។
លោកជំទាវបណ្ឌិតបានបញ្ជាក់ថា «ដោយបានឆ្លងកាត់ការឈឺចាប់យ៉ាងជ្រាលជ្រៅពីសង្គ្រាម និងជម្លោះ ប្រទេសរបស់យើងយល់ច្បាស់ជាងអ្នកដទៃ អំពីសារៈសំខាន់ដ៏វិសេសវិសាលនៃសន្តិភាព ។ សន្តិភាព គឺជាគ្រឹះដ៏ពិតប្រាកដដែលស្ថិរភាពការអភិវឌ្ឍ និងការផ្សារភ្ជាប់របស់យើងទៅកាន់ពិភពលោកខាងក្រៅត្រូវបានកសាងឡើង។
តាមរយៈការស្តារសន្តិភាពឡើងវិញនេះហើយ ដែលធ្វើឱ្យកម្ពុជាអាចស្វាគមន៍គ្រួសារហ្វ្រង់កូហ្វូនីដោយមោទនភាពនាថ្ងៃនេះ និងចែករំលែកជាមួយសមាជិកទាំងអស់នូវសមិទ្ធផល បច្ចេកទេស មហិច្ឆតា និងទំនុកចិត្តរបស់យើងចំពោះអនាគតដ៏ភ្លឺ
ស្វាង» ៕
ចែករំលែកព័តមាននេះ