យេម៉ែន-អារ៉ាប៊ីសាអូឌីត ៖ បុគ្គលិកក្រុមហ៊ុនប្រេងយក្សអារ៉ាប៊ីសាអូឌីត ARAMCO កាលពីថ្ងៃទី២២ តុលា បានទទួលបទបញ្ជាឲ្យជម្លៀសចេញពីបណ្ដាទីតាំងរបស់ខ្លួន ក្រោយការវាយប្រហារបង្ហូរឈាមលើព្រលានយន្តហោះមួយដែលស្ថិតនៅក្បែរ ខណៈពួកឧទ្ទាមហ៊ូធីស្និទ្ធិអ៉ីរ៉ង់កំពុងបង្កើនការវាយប្រហារ ។
កាលពីថ្ងៃទី១៤ តុលា អាជ្ញាធរអារ៉ាប៊ីសាអូឌីតរៀបរាប់ពីការវាយប្រហារអគារខ្ពស់មួយរបស់ក្រុមហ៊ុនប្រេងនេះ នៅក្រុងដាហ៍
រ៉ាន ។ ចាប់តាំងពីពេលនោះមក និយោជិតភាគច្រើនរបស់ក្រុមហ៊ុននេះ តម្រូវឲ្យធ្វើការពីចម្ងាយតាមអនឡាញ ។ ចំពោះបណ្ដាបុគ្គលិកដែលនៅបន្តធ្វើការក្នុងទីស្នាក់ការ ពេលនេះ តម្រូវឲ្យចាកចេញហើយធ្វើការតាមអនឡាញ រហូតដល់មានបទបញ្ជាជាថ្មី។ ទោះបីយ៉ាងណា បណ្ដាតំបន់មនុស្សរស់នៅស្ថិតនៅក្បែរទីស្នាក់ការក្រុមហ៊ុនប្រេងនោះ មិនតម្រូវឲ្យជម្លៀសចេញឡើយ។
កាលពីថ្ងៃទី២១ តុលា ក្រសួងការបរទេសអាមេរិក បានបញ្ជាឲ្យបណ្ដាបុគ្គលិកស្ថានទូតប្រចាំក្រុងរីយ៉ាដមិនចាំបាច់ និងសាច់ញាតិគ្រួសារពួកគេចាកចេញពីអារ៉ាប៊ីសាអូឌីត ដោយគូសបញ្ជាក់ថា ពួកហ៊ូធីកាន់តែវាយប្រហារខ្លាំងឡើងលើអារ៉ាប៊ីសាអូ
ឌីត។ កាលពីយប់ថ្ងៃទី២១ តុលា ពួកហ៊ូធីវាយប្រហារព្រលានយន្តហោះក្រុងដាមម៉ាម នាភាគខាងកើតប្រទេស ចម្ងាយប៉ុន្មានគីឡូម៉ែត្រពីក្រុងដាហ៍រ៉ានបណ្ដាលឲ្យមនុស្សស្លាប់២នាក់ និងរបួស៨នាក់ ។
រយៈពេលប៉ុន្មានសប្ដាហ៍ចុងក្រោយនេះ ការវាយប្រហារបស់ពួកហ៊ូធីលើបណ្ដាហេដ្ឋារចនាសម្ព័ន្ធស៊ីវិលអារ៉ាប៊ីសាអូឌីត ពិសេស បណ្ដាទីតាំងប្រេង និងព្រលានយន្តហោះ មានកម្រិតខ្លាំងក្លាពុំធ្លាប់មានតាំងពីចាប់ផ្ដើមជម្លោះនៅយេម៉ែនពីឆ្នាំ២០១៤មក។ ការវាយប្រហារបែបនេះ បង្ខំឲ្យអារ៉ាប៊ីសាអូឌីតដែលគាំទ្រខាងយោធាដល់រដ្ឋាភិបាលយេម៉ែនគាំទ្រដោយអន្តរជាតិ បិទព្រលានយន្តហោះក្រុងរីយ៉ាដ ។
សរុបមនុស្ស២២នាក់ស្លាប់ ក្នុងការវាយប្រហាររបស់ពួកហ៊ូធី សំដៅបណ្ដាព្រលានយន្តហោះអារ៉ាប៊ីសាអូឌីតក្នុងខែនេះ។ ពួកហ៊ូធីក៏ប្រកាសដែរថារយៈពេលប៉ុន្មានថ្ងៃចុងក្រោយនេះ ពួកគេតម្រង់គោលដៅវាយប្រហារលើទីតាំងមួយរបស់ក្រុមហ៊ុនARAMCO ក្នុងទីក្រុងប្រេងយ៉ានប៊ូជាប់សមុទ្រក្រហម និងចម្ការប្រេង CHAYBAH ជិតព្រំដែនជាមួយអេមីរ៉ាត់អារ៉ាប់រួម។
កងទ័ពអារា់ប៊ីសាអូឌីត ប្រកាសកាលពីថ្ងៃទី២២ តុលា ថា បានបាញ់ទម្លាក់ដ្រូនច្រើនគ្រឿងនៅតំបន់ក្រុងរីយ៉ាដ និងក្រុងមេឌីនជាទីក្រុងសក្គារៈទី២របស់អ៊ិស្លាម ។ មុននេះ មានការប្រកាសពីការបាញ់ទម្លាក់ដ្រូន៦គ្រឿង ៕
ចែករំលែកព័តមាននេះ