ក្រុមល្បាតសហគមន៍ភូមិអណ្តូងក្រឡឹង សហការដោះអន្ទាក់ និងចុះពិនិត្យបទល្មើសព្រៃឈើនៅស្រុកអូររាំង
- មណ្ឌលគិរី
ខេត្តមណ្ឌលគិរី ៖ កម្លាំងក្រុមល្បាតសហគមន៍ភូមិអណ្តូងក្រឡឹង បានសហការជាមួយមន្ត្រីស្នាក់ការអូរប៉ាមចុះល្បាតទប់ស្កាត់ និងបង្ក្រាបបទល្មើសធនធានធម្មជាតិ នៅតាមបណ្តោយផ្លូវជាតិលេខ៧៦A ដោយប្រមូលបានអន្ទាក់ខ្សែគោជិត៣០ខ្សែ និងបានប្រទះឃើញវត្ថុតាងនៃបទល្មើសព្រៃឈើមួយចំនួន ។
យោងតាមរបាយការណ៍ផ្លូវការពីក្រុមល្បាតសហគមន៍ភូមិអណ្តូងក្រឡឹងបានឱ្យដឹងថ កាលពីថ្ងៃទី២២ តុលា ឆ្នាំ២០២៦ កន្លងទៅនេះ ក្រុមការងារដែលមានសមាសភាពសរុបចំនួន០៨នាក់ បានចុះបេសកកម្មល្បាតនៅចំណុច «ខ្ទមអ្នកតាថ្លាន់» ស្ថិតក្នុងភូមិសាស្ត្រស្រុកអូររាំង ខេត្តមណ្ឌលគិរី។
នៅក្នុងប្រតិបត្តិការល្បាតនេះ ក្រុមការងារបានដោះ និងប្រមូលអន្ទាក់ខ្សែគោបានចំនួន ២៧ខ្សែ ដែលក្រុមជនល្មើសដាក់លួចទាក់សត្វព្រៃ យកទៅរក្សាទុកនៅស្នាក់ការអូរប៉ាម។ បន្ថែមពីនេះ ក្រុមល្បាតក៏បានត្រួតពិនិត្យឃើញគល់ឈើប្រភេទ «គគីរ» ចំនួន១៣ដើម ដែលត្រូវគេកាប់បំផ្លាញផងដែរ ។
ទន្ទឹមនឹងការបង្ក្រាបបទល្មើស ក្រុមល្បាតក៏បានកត់សម្គាល់ឃើញវត្តមានសត្វព្រៃកម្រជាច្រើនប្រភេទដែលកំពុងរស់នៅក្នុងតំបន់នោះ រួមមាន៖ ការប្រទះឃើញសត្វ ស្វាកន្ទុយស ផ្ទាល់ភ្នែកចំនួន១៥ក្បាល ដានហ្វូងជ្រូកព្រៃ ប្រហែល២០ក្បាល ព្រមទាំងបានចុះអង្កេតដានសត្វខ្ទីង ចំនួន០១ក្បាលផងដែរ ។
សកម្មភាពចុះល្បាតនេះ រៀបចំឡើងក្រោមការសម្របសម្រួល និងគាំទ្រពីគណៈបញ្ជាការឯកភាពរដ្ឋបាលស្រុកអូររាំង ស្នាក់ការរងអូររាំង អាជ្ញាធរឃុំសែនមនោរម្យ អាជ្ញាធរភូមិអណ្តូងក្រឡឹង និងអង្គការ WCS ក្នុងគោលបំណងការពារ និងអភិរក្សធនធានធម្មជាតិសត្វព្រៃ និងព្រៃឈើឱ្យបានគង់វង្ស ៕
ចែករំលែកព័តមាននេះ