ផ្លូវបេតុងកសាងដោយក្រសួងអភិវឌ្ឍន៍ជនបទ បា.ក់ស្រុតដោយគ្រោះធម្មជាតិនៅកោះសូទិន
- កំពង់ចាម
ខេត្តកំពង់ចាម ៖ ផ្លូវបេតុងមួយខ្សែប្រវែងជាច្រើនគីឡូម៉ែត្រ ឆ្លងកាត់តាមឃុំនានាប្របតាមដងទន្លេតូច ក្នុងទឹកដីស្រុកកោះសូទិន ទើបកសាងរួចមិនទាន់បានប៉ុន្មានឆ្នាំផង ក៏ត្រូវគ្រោះធម្មជាតិបំផ្លាញបណ្ដាលឲ្យបាក់ស្រុតជាច្រើនកន្លែង នៅក្នុងឃុំពាមប្រធ្នោះ និងឃុំល្វេ ។
នៅក្នុងស្ថានភាពនេះ អាជ្ញាធរមូលដ្ឋានបានស្នើឱ្យអង្គភាពពាក់ព័ន្ធជួយពន្លឿនការជួសជុលដើម្បីឲ្យពលរដ្ឋធ្វើដំណើរបានជាធម្មតាឡើងវិញ ហើយចាត់ទុកជាសំណាងល្អដែរ ដែលនៅក្នុងហេតុការណ៍នេះមិនមានអ្នកណាម្នាក់រងគ្រោះថ្នាក់ដល់ជីវិតឡើយ ។
អ្នកស្រី ឌុច ចាន់ណា អាយុ៦១ឆ្នាំ នៅភូមិព្រែកតាកែ ឃុំល្វេ និយាយថា ផ្លូវបេតុងរលោងស្អាតកាត់តាមមុខផ្ទះរបស់គាត់ជាប់ដងទន្លេត្រូវបានគេស្ថាបនាជាច្រើនឆ្នាំមកហើយ។
ពេលនេះស្រាប់តែខូចខាតដោយស្រុត នាំយកទាំងរោងបណ្ដុះបន្លែរបស់គាត់ រួមទាំងគុម្ពឫស្សីធំមួយគុម្ពបានស្រុតចុះទៅក្រោមជម្រៅ៤ទៅ៥ម៉ែត្រ ។ ការបាក់ស្រុតនេះ បានកើតឡើងតាំងពីអំឡុងភ្ជុំបិណ្ឌកន្លងទៅ និងមិនធ្លាប់ដែលជួបប្រទះទាល់តែសោះនាពេលកន្លងមក ហើយពេលនេះ ធ្វើឲ្យគាត់ខ្លាចបាក់រាលដល់ផ្ទះថែមទៀត ។
លោក លុច លីម មេឃុំល្វេ មានប្រសាសន៍ថា កាលពីមុនផ្លូវឆ្លងកាត់តាមភូមិមានការលំបាកក្នុងរដូវវស្សា ព្រោះតែរអិលពិបាកធ្វើដំណើរឯនៅរដូវប្រាំងហុយទ្រលោម ។ ប៉ុន្តែក្រោយមកក្រសួងអភិវឌ្ឍន៍ជនបទបានស្ថាបនាផ្លូវបេតុងមួយខ្សែកាត់តាមឃុំល្វេ ជាប់មាត់ទន្លេ មានប្រវែងជាង១០គីឡូម៉ែត្រ ដែលបានបង្កលក្ខណៈងាយស្រួលដល់បងប្អូនអ្នកភូមិធ្វើដំណើរទៅមក រួមទាំងអ្នកនៅខេត្តព្រៃវែងក៏បានឆ្លងកាត់ទីនេះដែរ ។
រូបលោកពិតជាមានការសោកស្ដាយ ដោយសារគ្រោះធម្មជាតិបណ្ដាលឱ្យបាក់ស្រុតដីរួមទាំងផ្លូវបេតុងជាច្រើនម៉ែត្រ ដែលបានកាត់ផ្ដាច់មិនអាចឱ្យធ្វើដំណើរឆ្លងកាត់បាន ។ ចំពោះមូលហេតុនៃការបាក់ស្រុតនេះ គឺដោយសារតែមានភ្លៀងធ្លាក់ខ្លាំង រួមជាមួយទឹកស្រកលឿនខុសពីធម្មតាផង ។
លោកមេឃុំលើកឡើងថា កន្លែងបាក់ស្រុតខូចខាតមាន៦ទៅ៧កន្លែង ដែលសូម្បីតែផ្ទះរបស់ប្រជាការពារនៅភូមិទំពូងក៏បាក់ស្រុតដែរ និងត្រូវបានអាជ្ញាធរជួយអន្តរាគមន៍ ។ អាជ្ញាធរក៏បានអំពាវនាវដល់បងប្អូនប្រជាពលរដ្ឋ សូមកុំសាងសង់លំនៅឋាននៅតាមច្រាំងទន្លេដែលប្រឈមនឹងហានិភ័យបាក់ស្រុត ព្រោះនាំឱ្យខាតបង់ប្រាក់កាសក្នុងគ្រួសារ ។
សូមបញ្ជាក់ថា ផ្លូវបេតុងត្រង់ចំណុចឃុំពាមប្រធ្នោះ ត្រូវបានអាជ្ញាធរបិទមិនឱ្យរថយន្តបើកបរឆ្លងកាត់ទេ គឺអាចបើកវាងតាមផ្លូវបេតុងមួយខ្សែទៀតដើម្បីចៀសវាងកុំឲ្យមានគ្រោះថ្នាក់ជាយថាហេតុ ។ ជាមួយនោះ លោក យី វណ្ណៈ អភិបាលស្រុកកោះសូទិន នារសៀលថ្ងៃទី២១ ខែតុលា ឆ្នាំ២០២៦ បានបញ្ជាក់ថា ចំពោះការជួសជុលឡើងវិញគឺអាស្រ័យទៅលើថ្នាក់ជាតិដែលជាអ្នកសម្រេចជុំវិញបញ្ហានេះ ។ ទោះជាយ៉ាងណា កន្លែងដែលបាក់ស្រុតនោះមិនមានការបាក់បន្ថែមទៀតទេ មកដល់ពេលនេះ ។
លោក អ៊ឹង វិសុទ្ធ ប្រធានមន្ទីរអភិវឌ្ឍន៍ជនបទខេត្ត មិនអាចសុំការបំភ្លឺបានទេនារសៀលថ្ងៃទី២១ ខែតុលានោះ ដោយទូរស័ព្ទរោទ៍ជាច្រើនដង តែមិនមានអ្នកទទួល ៕
ចែករំលែកព័តមាននេះ