សំណង់ផែថ្មរឹងមាំមួយកន្លែងរបស់ឧកញ៉ាទី គគ្លើនទៅនឹងការហាមឃាត់របស់អាជ្ញាធរ !
- ព្រះសីហនុ
ខេត្តព្រះសីហនុ ៖ សំណង់ថ្មដ៏រឹងមាំមួយកន្លែង ដែលមានទីតាំងស្ថិតនៅភូមិ៣ សង្កាត់លេខ១ ក្រុងនិងខេត្តព្រះសីហនុ កំពុងតែគគ្លើនទៅនឹងអាជ្ញាធរក្រុងព្រះសីហនុ ដែលបានចុះទៅធ្វើកំណត់ហេតុហាមឃាត់សាងសង់ កាលពីខែកញ្ញា ឆ្នាំ២០២៦ កន្លងមកថ្មីៗនេះម្តងហើយ ។

បើយោងតាមកំណត់ហេតុក្រុមការងាររបស់រដ្ឋបាលក្រុងព្រះសីហនុ ដែលដឹកនាំដោយលោកជួប សីហា នាយករងរដ្ឋបាលក្រុងព្រះសីហនុ បានបញ្ជាក់យ៉ាងច្បាស់ដល់ឈ្មោះហោ ថូង ជាម្ចាស់សំណង់ផែថ្មរឹងមាំខុសច្បាប់ ដែលមានឈ្មោះឧកញ៉ាហោ សុភ័ក្រ ហៅ(ឧកញ៉ាទី) ជាអ្នកមើលការខុសត្រូវលើការសាងសង់ស្តីពីការហាមឃាត់ការលបលួចសាងសង់ផែដែលមានទទឹង៣,១ម៉ែត្រ×៥៧ម៉ែត្រ និងចាក់បង្គោលថ្មបេតុងចំនួន៧៧ដើម ឱ្យលោកហោ ថូង ដែលមានលោកឧកញ៉ាទី ជាតំណាង បញ្ឈប់ការសាងសង់សំណង់ផ្សេងៗរំលោភយកដីចំណីសមុទ្របន្តទៀត ដោយរក្សាភាពដើមដែលមានស្រាប់ និងមិនអនុញ្ញាតឲ្យម្ចាស់ផ្ទះជួលឈ្មោះ ឈួន សុផល ដែលមានទីតាំងជាប់ផែថ្មខាងលើនេះ ប្រើប្រាស់ជាដាច់ខាត ។

បើតាមការបង្ហើបឲ្យដឹងពីបងប្អូនប្រជាពលរដ្ឋដែលមានលំនៅឋានជិតទីតាំងផែខាងលើបានខ្សឹបប្រាប់ថា រហូតមកដល់ពេលនេះ លោក ហោ សុភ័ក្រ ហៅ(ឧកញ៉ាទី) នៅតែបន្តលបលួចធ្វើសកម្មភាពចាក់បង្គោលថ្មបេតុងសាងសង់ផែរំលោភចូលទៅក្នុងសមុទ្រតាមរូបភាពបែបជំហ៊ានគីង្គក់រំលោភលើកំណត់ហេតុរបស់រដ្ឋបាលក្រុងព្រះសីហនុយ៉ាងគគ្លើន ។

លោកឧកញ៉ា ហោ សុភ័ក្រ ហៅ(ឧកញ៉ាទី ) បានឲ្យដឹងតាមទូរស័ព្ទកន្លងមកថា កន្លងមកនេះ ដោយសារតែមានព័ត៌មាននៅក្នុងស្រុកមួយចំនួន មកថតយករូបភាពការសាងសង់យកទៅផ្សព្វផ្សាយ រហូតដល់អាជ្ញាធរក្រុង ចុះមកហាមឃាត់ការសាងសង់ ទើបមានការផ្អាកការសាសង់មួយរយៈ ។ លោកឧកញ៉ាទីបានអះអាងបញ្ជាក់ថា លោកមិនខ្វល់ចំពោះការផ្សព្វផ្សាយរបស់ព័ត៌មានក្នុងស្រុកមួយចំនួននោះទេ ដោយសារលោកមានខ្សែស្រឡាយជាថ្នាក់ដឹកនាំកំពូលៗ ក្នុងនោះ មាននៅក្នុងក្រសួងព័ត៌មានផងដែរ ។

លោកជួប សីហា នាយករងរដ្ឋបាលក្រុងព្រះសីហនុបានបញ្ជាក់ច្បាស់ៗថា បើម្ចាស់សំណង់ខាងលើ ដែលមានឧកញ៉ាទី ជាអ្នកកាងលើការសាងសង់នៅតែបន្តលបលួចធ្វើសកម្មភាពសាងសង់រំលោភលើកំណត់ហេតុដែលបានស្រង់ទិន្ន័យពីការសាសង់មាននៅក្នុងកំណត់ហេតុ និងមានស្នាមមេដៃនៃការព្រមព្រៀងលើការបញ្ចប់ការសាសង់លោក និងដឹកនាំកម្លាំងយកគ្រឿងចក្រចុះរុះរើ និងមិនទទួលខុសរាល់ការខូចខាតឡើយ ។

ម្យ៉ាងទៀត នៅក្នុងចំណុចទំនប់រលក ស្ថិតក្នុងភូមិ៣សង្កាត់លេខ១ក្រុង/ខេត្តព្រះសីហនុ រដ្ឋបាលក្រុងព្រះសីហនុ និងរដ្ឋបាលខេត្ត ហាមការសាងសង់សំណង់ថ្មីផ្សេងៗបន្ថែមទៀតដោយសារតែទីតាំងខាងលើ ស្ថិតក្នុងគម្រោងអភិវឌ្ឍន៍កំពង់ផែរបស់រាជរដ្ឋាភិបាលក្នុងដំណាក់កាលទី៣ ៕

ចែករំលែកព័តមាននេះ