ឡានបើកឆ្លងផ្លូវ ត្រូវអ្នកជិះម៉ូតូបុ.កពេញទំហឹង ស្លា.ប់១ រ.បួ.ស១ ខណៈអ្នកបើកឡានដាក់មេប្រូចបាត់
- បាត់ដំបង
ខេត្តបាត់ដំបង ៖ អ្នកជិះម៉ូតូម្នាក់បានស្លាប់ និងអ្នករួមដំណើរម្នាក់ទៀតរងរបួសធ្ងន់ ដោយសារជិះម៉ូតូបុករថយន្តដែលកំពុងបើកឆ្លងផ្លូវជាតិខ្វះការប្រុងប្រយ័ត្ន កាលពីវេលាម៉ោង៩យប់ថ្ងៃទី២១ តុលា ស្ថិតនៅលើកំណាត់ផ្លូវជាតិលេខ៥ ក្នុងភូមិពុកឆ្មា ឃុំអន្លង់វិល ស្រុកសង្កែ ហើយអុ្នកបើករថយន្តបានបើកទ្វារចុះរត់បាត់ភ្លាមៗដែរ ។
តាមរយៈរបាយការណ៏មន្ត្រីចរាចរណ៍បានឲ្យដឹងថា ជនរងគ្រោះទាំង០២នាក់ ម្នាក់ឈ្មោះ ថន ប៊ុនធឿន ភេទប្រុស អាយុ១៨ឆ្នាំ (ស្លាប់) និងឈ្មោះ ស្រេង គឹមស្រាង ភេទប្រុស អាយុ២០ឆ្នាំ នៅភូមិបញ្ញា ឃុំកំពង់ព្រះ ស្រុកសង្កែ ជនរងគ្រោះទាំង០២នាក់ជិះម៉ូតូតាមបណ្ដោយផ្លូវជាតិពីទិសខាងត្បូងទៅខាងជើង ។ ដោយឡែក រថយន្តម៉ាកMAZDA- EZ6 ពុំមានស្លាកលេខទេ ហើយក៏មិនស្គាល់អ្នកបើកបរដែរ ព្រោះក្រោយពេលជួបគ្រោះថ្នាក់ អ្នកបើករថយន្តនេះ បានរត់ចោលរថយន្ត ។ រថយន្តនេះបើកឆ្លងផ្លូវជាតិលេខ៥ ពីទិសខាងលិចទៅខាងកើត ។
បើតាមសមត្ថកិច្ចដែលចុះពិនិត្យចំណុចកើតហេតុបាននិយាយថា បើពិនិត្យលើស្លាកស្នាម និងតាមការបំភ្លឺខ្លះពីសាក្សី កំហុសភាពច្រើនគឺផ្ដើមចេញពីភាគីរថយន្ត ដែលបើកឆ្លងផ្លូវជាតិដោយខ្វះការប្រុងប្រយ័ត្ន ធ្វេសប្រហែស មិនពិនិត្យមើលឆ្វេងស្ដាំ មុនពេលសម្រេចបើកឆ្លងផ្លូវជាតិ ដែលមានយានយន្តកំពុងមមារញឹក ទើបធ្វើឲ្យអ្នកជិះម៉ូតូមិនអាចគ្រប់គ្រងល្បឿនបានក៏ជ្រុលទីបុករថយន្តចំពាក់កណ្ដាលរថយន្ត បណ្ដាលឲ្យអ្នកជិះម៉ូតូស្លាប់ និងរបួសតែម្ដង ។
មន្ត្រីចរចារណ៍បានចុះអន្តរាគមន៍ត្រូតពិនិត្យកន្លែងកើតហេតុ ។ ក្រោយធ្វើការវាស់វែងមន្ត្រីចរាចរណ៍បាននាំយកមធ្យោបាយភាគីទាំង០២យកទៅរក្សាទុកនៅការិយាល័យជំនាញ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ